公司開工大吉，除咗老細派開工利是之外，已婚嘅人亦都有繞場一周派利是，後來去廁所嗰陣咁啱同Manager一齊，一開門就見到洗手盤有一大疊利是，起碼50封，但係當時廁所空無一人，唔知邊個咁大頭蝦。
同我一齊入廁所嘅Manager見到即刻嘩嘩聲，尿都唔屙走咗去拆其中一封，仲自言自語咁話：「成嚿水喎，呢度幾廿封，如果封封都係$100，呢度咪幾千銀？今次真係過肥年喇喂！」我喺尿兜屙尿都唔得閒理佢，我仲以為佢講笑。
屙完擰轉身想洗手，Manager仲喺度「抽樣」拆緊利是，然後又同我講：「真係封封都一嚿水喎！大家一齊執到，一人一半。」
我：「你認真㗎？喺得呢個廁所漏低，失主一定係呢層樓嘅人，頭先行過8成公司仲未開，好大機會係我哋啲同事嚟㗎！」
Manager：「咁又點呀？交落管理處呀？實Q隨時獨吞添啦，就算係同事又點啫，呢層樓咁多人，實Q會巡廁所，清潔阿姐又會洗廁所，你點肯定邊個拎咗呀？」
我：「咪玩啦！一陣入去問下邊個漏低，冇人認就交管理處，有晒record點獨吞呀！」
Manager：「問呢，我就一定唔會問㗎喇，管理處我都一定唔會交落去，地上執到寶，問天問地攞唔到，調返轉講吖，如果啲利是係你跌，我敢肯定執到嘅人都唔會拎返出嚟，點先？一人一半，落街食支煙拆晒佢對分，順手丟埋啲利是封，銀紙冇得認啦，唔係張張都背到number啩！」
我：「唔要，真係勸你交出嚟，拾遺不報畀人捉到就唔好啦，新年流流唔好搞啲咁嘅嘢！」
Manager：「你鍾意啦吓，我就一定要晒，麻煩你唔好爆響口，之後請你食飯，再頒多個好市民獎畀你！」
叫極Manager交返出嚟都唔聽，咁唔通我報警拉佢咩，返入office我已經冇出聲㗎喇，點知過咗唔夠半個鐘，有個50幾歲嘅senior同事周圍問人有冇見過疊利是。
失主：「普通紅色利是封，金字印住我個姓，圓框有個『鄺』字，有冇見過呀？」
其他人問佢有冇印象行過去邊，呢位失主話去過廁所，好似有印象隨手放低，又唔係好肯定，可能係插隻手落褸袋嘅時候跌咗都唔奇，唔使諗啦，即係廁所疊利是係佢㗎囉！
當我想指出係邊個執到嘅時候，Manager原來一直都離遠望住我，又不斷打眼色同搖頭，示意我唔好篤爆。
失主咁彷徨，仲要係同事，你竟然冇打算拎返出嚟，仲要同我打眼色？我一嘢就同嗰位失主同事講：「Ricky喺廁所執到呀！你問佢吖！」（Ricky即係我Manager）
畀足落台階你啦，話你執到，冇話你打算據為己有。
Manager：「喂，係呀，諗住拎落管理處，又唔知邊個跌，係咪呢疊呀？」佢即時喺自己個袋拎疊利是出嚟，一定信你啦，有心拎落管理處仲會袋埋先然後咁冷靜坐喺度，頭先失主打晒鑼咁問又唔出聲，當時有幾個同事都望住我Manager。
Manager交返啲利是出嚟之後，我隔咗陣先擰轉頭望，條友係睥住我㗎！好恐怖呀！頂你個肺我嬲嬲地走去搵個失主講返成件事，點知個失主話：「算數啦，我都睇得出，咁唔通當眾揭穿佢咩，一場同事咪盞無癮，多謝你提我就真，呢度幾千銀㗎，唔見晒又要包過，一定畀老婆鬧。」
雖然唔後悔踢爆Manager，但我係咪擺咗自己上枱呢？即係好似喺公眾場合捉到條友非禮，然後事主話唔報警唔告佢就咁算數，跟手就走咗去，留低我、色魔，仲有周圍嘅人喺度，最慘係色魔唔係成日見到，Ricky就日日都喺工作上有交接，話晒係我Manager，以後肯定仲尷尬。
可能我真係處理得唔好，但當時真係諗唔到有咩方法，係咪應該唔好出聲，過多陣先靜靜雞同個事主講呢？因為Manager講過會落街食支煙丟晒啲利是封，我又真係驚佢咁做之後死無對證。
雖然我唔知Manager幾錢人工，不過你做得呢個位都唔會低啦下話？幾千蚊你都貪，嗰日全層樓連埋我哋得幾間公司有開，自己同事漏低嘅機率極高，會唔會咁都做得出呀？大人大姐咪鬼咁cheap啦！
唉，而家先係新一年開始，呢鑊嘢肯定積怨，條友連同事啲利是都貪，有幾小家都唔使解釋啦，遲啲實有排受。