「嘩，咩嚟㗎，咁核突嘅，白色嗰啲係白汁呀？見到就想嘔，另外嗰格呢？牛肉呀？咁熟唔好食㗎！一定要整到medium rare咁吖嘛，嘥晒啲牛肉，你兜飯真係……睇見都唔開胃，所以我永遠唔會帶飯盒，隔夜餸絕對唔食。」
以上呢段說話係出自女同事Donna把口，佢指住另一位同事Anson個飯盒評頭品足，一臉嫌棄，我真係唔知點解會關Donna事，個飯盒係Anson媽咪整嘅餸，難為Anson仲要笑笑口答唔係佢諗咁樣，強調啲嘢好好食冇問題。
唔知「自我中心」呢個字係咪咁樣用，或者我應該用冇家教去形容，不如講下個同事Donna平時係點樣先，佢嘅世界淨係得「我鍾意」同埋「我覺得」，成日彈人哋啲嘢，正宗百彈齋主，唔止飯盒，就算出街食飯都係咁。
記得有一次喺公司附近間茶記，Donna指住同事碗麵喺度發表偉論：「呢啲普通茶記嘅沙嗲牛肉邊度好食㗎！又薄，啲汁又稀，長洲嗰檔啲沙嗲牛麵先係最正囉！我超鍾意呀，所以除咗入長洲之外，平時我係唔會喺出面食沙嗲牛肉麵，完全唔係嗰回事，一睇就知唔好食啦！」
仲未開始食已經畀Donna彈到一文不值，難得嗌呢碗麵嘅同事仲好有EQ咁答佢：「咁呢度係觀塘，工廠區茶記係咁㗎啦，幾廿蚊個常餐唔通要求米芝蓮咩，點入長洲食呀？」
除咗食嘢係咁，Donna仲會彈人哋嘅衣著同品味，有一次佢就彈另一位同事Zuki個手袋。
Donna：「你個手袋好老土呀，我覺得啡色通常係上咗年紀嘅女人或者大陸喱先會用，梗係買黑色啦！」
Zuki聽完都唔知畀啲咩反應，最後禮貌笑一笑講咗句鍾意啡色多啲，諗住結束個話題，點知Donna仲係好唔識做。
Donna：「後生女一定係孭黑色袋啦！下次唔好再買啡色喇，深啡淺啡都唔好，我覺得好似啲自由行落嚟嘅大陸女人呀！」
如果你身邊都有Donna呢類人，唔知有冇發現一樣嘢，就係佢哋好鍾意彈人哋嘅同時，自己啲嘢其實係好唔掂，你以為Donna對飲食好講究咩？佢咪又係同大家一齊食公司附近啲茶記，講到自己食家咁款，又唔會見佢去大酒店食㗎喎！
彈人哋衫褲鞋襪，其實Donna自己都唔係著得好睇，襯衫九唔搭八，咁當然啦，佢自己應該唔會咁覺得。
世界上有咁多種顏色，係咪個個都要跟佢鍾意黑色先至好呢？牛肉唔係medium rare就唔食得？食隔夜餸又關你咩事先？點解人人都要跟佢嗰套？
其實有個類似Donna呢種同事或者朋友，身邊嘅人真係好不幸，鬧佢又有失身份，解釋又傷腦筋，反面又好似顯得好小器，嬲佢又死好多細胞，忍佢又谷住道氣，所以最佳嘅方法就係直接無視，當佢透明同埋左耳入右耳出。
不過Donna最終都有受到教訓，因為佢有一次彈某同事件外套好肉酸：「好心你唔好著呢隻色啦，唔係人人都carry到㗎！真係唔好睇囉！好肉酸呀！」
當時公司個part time清潔阿姐咁啱倒緊每個人枱底個垃圾筒，估唔到清潔阿姐會插嘴：「唔係喎！我覺得好靚喎！」
Donna仲想攞共鳴：「你唔覺得好肉酸咩？佢個look都唔啱呢啲色。」
清潔阿姐：「冇話啱唔啱嘅，最緊要自己著得開心啫！」
Donna：「但係我睇到唔開心喎，都唔靚！」
清潔阿姐：「車！你睇得唔開心關佢咩事呀？咁我都覺得你係呢間公司裡面最唔靚嗰個啦，唔通我又話睇得唔開心，叫你唔好喺度喇喎！我唔鍾意啫，冇理由要影響人吖嘛，你有你返工自由，佢有佢著衫自由。」
嘩！清潔阿姐果然大無畏，又難怪嘅，返part time啫，大家每日見面前前後後都冇半粒鐘，佢有咩好顧忌喎！
我哋當中直頭有同事即場拍手掌，講咗句：「阿姐好波！」
Donna受到突如其來嘅重擊，真係紅都面晒，但佢嬲住仲要問清潔阿姐：「我係最唔靚嗰個咩？」
留意返少少嘢先，清潔阿姐頭先窒Donna嘅時候係冇動真火嘅，畢竟Donna唔係批評佢，所以個阿姐一直係好從容咁樣回答：「講真，你呢度個個女同事都好瘦，係你最圓，塊面好似包咁，咁真係其他人靚啲嘅。」
Donna：「我唔靚關你咩事呀？」嬲喇嬲喇，Donna愈嚟愈嬲喇！
清潔阿姐：「唔關我事㗎，你問我咪答囉，正如你頭先話同事件衫好肉酸，其實都唔關你事㗎，一樣道理之嘛！」
Donna望住我哋嘅眼神好似想搵救兵，傻豬嚟嘅，唔好話Anson同Zuki呢啲「苦主」睇得好開心，連未試過畀Donna話嘅我都笑到卡卡聲，清潔阿姐每講一句說話都有根有據，我哋冇全體起立致敬已經算係咁啦！
不過清潔阿姐倒晒啲垃圾準備走嘅時候仲要對住Donna加多句：「你又唔使咁介意嘅，我覺得你圓潤啫，你男朋友實覺得你好睇㗎嘛，你屋企人都會覺得你好睇㗎，所以各花入各眼，你可以話人肉酸，點解又唔可以接受人哋話你唔好睇呢？」
Donna：「我唔想同你講囉！」
清潔阿姐：「好好好，唔講喇，唔使咁小器嘅。」然後阿姐拎住一大袋垃圾走咗，英雄呀！
Donna等到阿姐走咗之後係咁同我哋班同事鬧，話個阿姐好多嘴，嬲到跳晒掣，好在Donna呢啲小角色冇能力操生殺大權咋，否則佢肯定會換走個part time清潔阿姐。
不過咁，Donna可能都察覺到大家當日好支持清潔阿姐，又拍手又叫好，自從嗰次之後真係少咗彈呢樣彈嗰樣，成個人靜晒，仲要每次清潔阿姐嚟倒垃圾佢都keep住黑面唔講嘢，咁咪好囉，把口咁臭，又唔夠人講，收下聲仲好啦！