辦公室賊仔

「我放咗盒口罩喺公司,畀人偷咗一半呀!」朋友頭先lunch time發現,結果打嚟嘈。

「但係你打畀我做咩呢?一係同老細講,一係大大聲問邊個偷吖嘛。」

其實呢個朋友間公司成日唔見嘢,初時以為得佢班同事咁痴線啦,點知見到連登有人分享「聽過最誇張喺office比人偷咗嘅嘢」,我先真真正正大開眼界,將部分節錄如下:

偷無線mouse……粒電,再換返粒冇電嘅落去

偷同事樽人奶(佢標註上埋報紙,我都記得睇過呢單新聞)

舊公司有人買散水餅放入雪櫃,畀人掟咗落垃圾桶(個人認為唔算偷,呢單明顯係欺凌或者報復性行為)

偷女同事隻杯

偷女同事對鞋(有人唔明點解著緊嘅鞋會畀人偷到,其實好多返office嘅人都會擺多一兩對鞋喺公司)

偷女同事丟咗落垃圾桶對絲襪 (咩料呀……)

偷仙人掌

成個飯盒

半個飯盒(佢話偷食咗飯盒裡面啲餸,然後啲飯冇郁,放返入雪櫃😂😂😂)

偷公司兩排檸檬茶

電腦mon,24吋變咗16吋

Pantry啲方糖 (方糖都偷又真係幾荒唐)

唔計聽返嚟,齋計親身經歷,我見過最嚴重係偷老細張支票再冒簽去拎錢,後來發現係平時負責處理老細本支票簿個女會計做嘅,前前後後提取咗幾廿萬,因為嗰次之後佢冇再返工,我又唔係會計部,就冇再跟進喇,淨係知要坐監。

至於偷濕碎嘢都見過一單,好耐之前做過一間公司,有個女同事會將啲原子筆呀、螢光筆呀、萬字夾呀、膠紙呀、釘書機呀、塗改液呀……呢啲小型文具擺喺枱邊,枱下面已經有個打開咗嘅Longchamp大袋,佢用手肘推下推下,啲筆就一支支跌落去Longchamp入面,有次鬼佬同事發覺三日唔埋兩日就冇晒筆用,結果周到個女同事偷文具,再向老細揭發,不過老細又冇乜反應,話咁平由得佢偷😳,但訓示咗個女同事唔好再咁貪心,跟住啲文具就正常番喇,而個女同事就嬲咗鬼佬😂呢個世界啲人都幾惡,偷嘢嘅人嬲個舉報佢嘅人,office真係咩人都有。

error: