有個男仔同我講：「嗰次join活動第一次見佢，印象好深刻，因為呢個女仔放工過嚟，著得好成熟，傾計亦表現得好成熟，好有女人味，冇同場其他女仔咁嬌嗲同埋鍾意笑，所以最後喺張紙上面，我淨係剔咗佢個名，點知拍拖之後佢原來唔係咁，都係低低BB。」
佢最後成功同咗呢個女仔一齊，至於「喺張紙上面淨係剔咗佢個名」嘅意思，係因為speed dating活動當中，我哋公司會派畀男女雙方各一張紙，女仔嗰張就會列晒今次活動所有男仔個名，例如1）Alex 2）Peter 3) David……而男仔嗰張亦會印上活動中所有女仔個名，1）Sarah 2) Mary 3）Yuki……始終每次都係十幾男十幾女，冇呢張嘢記唔到咁多。
當男女雙方都喺張紙剔咗對方個名，例如Peter有剔Sarah，Sarah又有剔Peter，咁公司先會喺活動後email返電話畀佢哋，假設Peter有剔Sarah，而Sarah冇剔Peter，我哋就唔會畀Sarah個電話Peter。基本上我哋冇限制你剔幾多個，但會勸你唔好剔晒，要真係搵個覺得適合先剔。
言歸正傳，我問返個男仔：「咁你當日剔佢，追佢，都係因為鍾意佢成熟，而家唔鍾意人低低BB呀？」
「唔係呀，更鍾意，只係想講下一齊之前同之後嘅感覺有啲反差，冇諗過佢有時會拍啲Snapchat嘅低能片send嚟，第一次收到嚇親我，不過好可愛。」
其實好正常，以前都有女朋友咁樣話過我，原因好簡單，成熟係做畀陌生人睇嘅，幼稚嘅一面先係畀最close嘅人睇。