講開辦公室戀情，做咗咁多年嘢，真係咩男男女女嘅關係都見過，正正常常拍拖開花結果又有，互相有另一半偷食偷到正印上公司吵鬧嘅又有，結咗婚扮單身溝新入職小妹妹都有，要傾肯定可以傾足幾集，不過我發現靚仔靚女雖然喺日常工作中會有著數，但亦都有好多不便。
著數係我唔止一次見到靚仔靚女有人爭住請，其中一次係個靚仔去見工，本身阿客（50幾歲女士）見到已經嗒晒糖，順順利利出埋offer，我都諗住等收佣㗎喇，點知個靚仔candidate自己又去見咗幾份工，最後揀另外一份，阿客好似癲咗咁，不斷叫我落嘴頭氹個靚仔turn down其他offer，一定要返佢嗰間，冷靜啲先啦，你最多請唔到人再請過啫，我直情成份佣冇咗喎，勸得掂一早勸咗啦！
好記得嗰份工本身offer HK$ 26000，阿客為奪美男歸，一千一千咁加，27000、28000、29000、30000，最後去到33000先放棄，仲好意思責怪我冇盡力，點解可以甩咗個candidate，大姐呀！人哋靚仔話要睇公司前景呀，唔想為份糧咁短視，咁關我咩事呀？
不過我都見過有老闆開晒聲話要靚女，最初冇理佢，以為係講笑，點知佢嚟真，嫌我介紹去個candidate唔夠靚女，不知所謂！好記得佢講咗句：「我想請啲個樣望落去有少少混血兒feel，你知唔知邊個譚筠怡呀？唔知就自己google啦，我要嗰種！」嗰你老味呀！你當我爸爸生呀？Headhunt國際夜總會呀？都唔記得講個重點畀你哋聽，佢話要混血靚女，而呢份工只不過係CS，係唔使出街，喺公司對住四面牆聽call嗰種，係人都知你不懷好意啦！
所以有時靚仔靚女出嚟社會做嘢有其優勢，亦有其苦處，好似我呢啲有自知之明嘅醜男一樣有生存空間，起碼我係靠工作能力，個樣蝕章啫，不過做得嘢吖嘛，我信自己去到邊都可以搵食㗎！雖然失業中……