關於阿輝嘅少少後續。
噚日登稿之後，好多讀者留言問可唔可以開公司名？大家想幫襯呢個好老闆，今日同阿輝傾過，佢話老闆性格低調，之前都有出手買口罩返嚟，再透過第三方免費派出去，但一直唔想大鑼大鼓，原因係怕風高浪急，處理得差會好似做show一樣，既然原意只係想幫人，用唔用公司牌頭都冇乜所謂，故此佢都冇特登再去問老闆喇，因為自己原意一樣係想鼓勵大家逆境自強，咁多位嘅心意同埋留言，阿輝已經逐個睇晒，冇諗過有咁多人同佢講打氣說話，要我代轉達一句：多謝！
阿輝話今朝公司收到張order，銀碼係萬幾蚊，呢個時勢已經算好好，後來先知係一位朋友落嘅，對方有睇到fb個post，雖然識咗阿輝好耐，但唔知佢老闆堅決齊上齊落唔cut人呢件事，所以想少少地支持下。
佢老闆完全唔知咩事，見到有單仲講咗句：「4月似乎會好啲喎，幾好運！」
聽完阿輝口述就隨手打咗呢段交代出嚟，今日有少少攰，冇整圖唔好意思，最後只想補充一句：
老闆
呢個世界冇咁多好運同埋僥倖，其實所有嘢都係你善良嘅累積。👍🏻