今日喺屋企執嘢，搵到幾張細個嘅相，一個讀書時踢波拎嘅獎牌，一個Sony Ericsson電話，一本交通銀行存褶，啲回憶湧晒返嚟，次次執返啲舊嘢都會諗起年少多好，所以執親屋都係斷斷續續執好耐。
嗰部sony ericsson電話，插earphone個位唔係好似而家iPhone咁，當時係好易甩，一旦甩咗個earphone，啲音樂係唔識自己停，會繼續播但變咗speaker，有次搭小巴就正正係甩咗，而我又因為好鍾意衛蘭，download咗隻《你有老婆點解要溝我》，突然間覺得啲聲好遠，成架小巴嘅人擰晒過嚟，原來好大聲播緊：
🎤🎧🎼你有老婆點解要溝我 終於溝到有咗
捉姦捉正我 點樣去閃躲
忘記輩份駁火
從此之後，我戴親earphone聽歌都有陰影，就算聽緊歌都會不斷重複撳下個earphone插入位有冇鬆？即使而家用緊AirPods，完全無線，仍然會間唔中除低，make sure真係connect緊，當年嘅陰影真係太大喇。
至於本交通銀行存褶，就曾經成為我某次寫廣告嘅題材，當年係想開個冇乜分行嘅戶口儲錢，一出糧就提晒現金想擺入交通銀行，點知呢間嘢真係太少分行，少到袋住份糧用Q晒都未去到入錢，失敗！揭開佢見到最後得20蚊兼且冇拎返，失敗中嘅失敗！
老喇老喇，成日懷舊，呢句真係好啱～～～回得了過去，回不了當初，一轉身就一輩子。