投稿讀者：Blair
記得當日9:15返到公司，receptionist見我入門口就嗌咗我埋去：「今日返工個新仔超唔掂！」
「你咁快就知佢唔掂？」
我哋公司冇人準時，得receptionist搭正9點鐘返嚟開門，其他同事基本上會喺10點前陸陸續續返到，不過當日個新仔就好乖，始終第一日返工吖嘛，佢同receptionist講自己早10分鐘已經企喺門口呆等。
Receptionist：「我今日遲咗3分鐘，一出電梯見個新仔棟咗喺度，我一路開門佢就一路話：『企咗十幾分鐘都冇人，以為公司執咗，呢度冇人準時咁搞笑嘅。』哈，我真係廢事睬佢，講嘢咁臭串。」
我返埋位之後，又親耳聽到個新仔問其他同事：「我而家等咩？等HR定係等我阿head？係咪冇人會返9點？」
有同事回答唔知，叫佢坐陣先，但人人個樣都變晒，私下WhatsApp group仲講緊佢好冇禮貌，好似好唔耐煩。
新仔返咗工幾日，問題天天都多，某次我條team要同佢條team一齊開會，而佢上司同我上司又係煙鏟，最鍾意開會前落樓下煲完煙先上嚟，當佢兩個行入會議室，個新仔竟然舉起手掃走煙味，而且一臉嫌棄，我哋都睇到O晒嘴，新仔仲要補多句：「嘩，好臭喎陣煙味，呢間房啲窗開唔開到㗎？通通風吖唔該！」
兩個上司塊面黑過墨斗，再四目交投，我哋兩條team嘅同事你眼望我眼，唔使翻譯同埋解讀啦，大家嘅眼神應該講緊同一句嘢：「呢條新仔都幾惡㗎喎！」
新仔成程會議都喺度用手撥下撥下作勢掃走煙味，我作為旁觀者都睇到心驚膽顫，好驚兩位上司會忍唔住開佢波，好在最後冇事，但係新仔嘅印象分就肯定扣晒㗎喇。
得罪兩位男上司唔算最差嘅情況，因為嗰兩條煙鏟其實唔算小器，錯愕完就冇擺喺心，最正係新仔返工嘅第三個星期，呢次佢得罪咗幾個old seafood，堪稱公司開業以嚟最經典一幕。
呢班old seafood本身就係山寨王，年資最少嗰個都做咗7年，另外有3個拎埋10年長期服務金牌，難聽啲講句，佢哋死咗之後都應該會將骨灰灑喺公司㗎喇，得罪佢哋肯肯定冇運行。
今次新仔又做咗咩呢？話說嗰日食完lunch返嚟，老細行過見到新仔上網睇漫畫，真心講老細已經好好EQ，笑笑口行埋去新仔度：「年青人（我老細係咁樣叫人），返工時間唔應該睇呢啲喎，放工先睇啦！」
正常人會笠水同say sorry，不過新仔冇，佢兜頭兜腦就話：「吓，我以為冇嘢做可以睇，佢哋幾個啱啱先喺度煲韓劇同埋TVB喎（同時間用手指住嗰幾個old seafood），係見你行埋嚟先轉走個網頁之嘛！」
嗰幾個old seafood紅都面晒，又尷尬又想殺人，何其矛盾，老細唔出聲行開咗，因為都唔知可以畀咩反應。過咗一陣，其中一個old seafood企起身睥咗新仔一眼，然後走入老細房唔知傾乜，一傾就係成個鐘，我哋都預計必定有事。
隔咗一個weekend，新仔接到上司通知話唔續約，做到月尾就走得。喺度解釋返少少先，新仔係contract base，主要係公司budget用晒，本身打算請個人返嚟正正常常做到2021年就轉返full time，行住幾個月contract先，點知個新仔返工一個月就被終止合約。
其實我都分唔清呢個新仔係性格天生臭串，定係唔鍾意份工，抑或真係唔識睇人眉頭眼額，畢竟我同佢冇乜幾句，但我要承認新仔出聲嗰幾個問題，包括上司成陣煙味行入meeting room，仲有幾個old seafood從來唔做嘢只顧煲劇，我哋一班同事已經忍受咗好耐，或者你公司都有呢啲人存在，只係大家都冇出聲，或者唔敢出聲，新仔某程上係幾勇，好可惜佢嘅一連串行為得罪咗太多人，出嚟社會搵食如果下下都唔修飾同埋橫衝直撞，對自己嚟講確實好蝕底。
可能係我杞人憂天，唔排除新仔day one已經唔鍾意呢間公司，覺得好多嘢睇唔順眼，所以完全唔怕得罪人，希望佢之後可以搵到自己鍾意嘅工作啦！