呢幾日返超市真心攰，唔係講緊工作量，而係睇住啲人瘋狂搶購，仲要各出奇謀，望到啲客又傍偟又失望嘅樣，再望下空空如也嘅貨架，嗰種唏噓同埋精神疲勞唔知應該點樣形容。
無意批評啲人係又搶唔係又搶，始終我唔知道人哋嘅家庭狀況，可能佢有十兄弟姐妹呢，又可能要幫啲仔女買埋餸亦唔出奇，有個婆婆就係咁，一個人買3包米，N咁多嘅罐頭、肉、廁紙，就算有架車仔都見到佢非常吃力。
有職員同事見個婆婆咁辛苦，想叫佢定啲嚟，唔好人搶佢又搶，咁多米邊會食得晒呀，就算嚟緊真係禁足封城都唔使買咁多，點知婆婆話：「呢啲全部係幫我兩個仔買㗎！」
「你一個老人家點拎呀，有車仔都唔掂啦！」
「唔得呀，買唔到會畀佢哋鬧㗎！」
「咁你叫佢哋落嚟幫你吖嘛！」
「佢哋要返工，頭先打畀我話周圍啲超市都畀人掃清，所以特登叫我早啲落嚟買㗎！」
唉！個婆婆其實有少少駝背，雖然未致於好嚴重，但見到佢咁樣幫仔女掃貨，個心的確幾唔舒服。
當然啦，唔係個個都好似婆婆咁樣有「苦衷」，早幾日就見到兩個師奶為咗買Panadol而鬧交，其中一個將架上面嘅剩餘嘅4盒必理痛同2盒幸福傷風素擺晒落購物車，緊隨其後嗰個師奶只能望門輕嘆，再請求對方畀一盒佢，仲話屋企有人真係頭痛，跟住就一觸即發喇。
師奶A：「點解我要讓畀你呀？」
師奶B：「你使唔使一個人買6盒止痛藥呀？真係有需要嘅人點算？」
師奶A：「你又知我唔係有需要？」
師奶B：「咁你係咪全家都病吖！食得晒咁多藥？」
師奶A：「我食唔晒派畀隔籬鄰舍都唔益你，咒我全家都病咁黑心？我咒返你陷家鏟呀！」
師奶B：「你做咩話我陷家鏟呀？你個仆街死八婆，鬼唔望你呢世日日都要食止痛藥呀！」
有個男同事去勸交，結果畀兩個師奶鬧埋一份，真係典型嘅好佬怕爛佬，爛佬怕潑婦，最後師奶A都係冇讓到Panadol出嚟，仲見佢架購物車有十幾包菜心……
超市嘅米、藥、菜、杯麵、凍肉鮮肉、蛋，通通被一掃而空，附近有個菜檔就坐地起價，菜心一斤$28蚊，但係都聽到有人去買，點解會搞成咁㗎？
同事仲分享咗另一件事，有個女人走埋嚟畀張$50蚊紙佢，同事心諗咩事？新年都過咗啦？派利是呀？但佢唔識得個女人㗎喎，雙方四目交投之際，女人講咗句：「靚女，拎去飲茶，聽朝我一早嚟搵你，你放我入嚟買定啲菜呀肉呀生果呀，我好快搞掂㗎喇！」
同事真心唔明，所以就同返個女人講：「唔使畀錢我，你入嚟咪得囉！」
「我意思唔係你開門先入嚟，係超市開門前畀我入嚟買咗先，我唔想同人爭呀！」
同事：「唔得咁樣㗎喎！點可以畀你入嚟先呀？」
「$70得唔得？一係$80啦！」
同事：「唔係錢嘅問題呀，總之唔得啦！」
「妖！我去搵你經理，我就唔信唔得！」
最後個女人唔知有冇搵到經理，不過呢段時間喺超市返工真係見盡人生百態，要怪就怪個政府措施混亂，特首呢頭話唔會，隔幾日又會有官員出嚟話即刻執行，朝令夕改，市民無所適從又充滿不安，最後就搞到個個都去搶糧，超市變咗地獄咁，莫講話掃貨嘅客辛苦，我喺旁邊睇住都覺得心很累。