我同女同事Sherming不嬲好感情，除咗同team有好多話題之外，大家亦係住埋同一區，平時放工有3至4晚係搭同一架巴士，仲坐埋一齊傾計，我對佢當然有好感啦，Sherming咁靚女，可惜我其貌不揚，可以近距離接觸已經好幸運㗎喇，否則示愛不成，做同事坐埋同一個office就會好尷尬。
早排老細話Work from Home，其實我有一刻難過，因為有排唔可以見到Sherming，感情疏遠咗好多，大家只會喺公司個WhatsApp大group講下公事，睇個走勢，起碼要4月先有得返office，咁耐冇得見心儀嘅女仔，梗係囉囉攣啦！
點知上天好似特別眷顧我，唔好意思，咁講好似冇乜人性，因為Sherming有一晚突然私下WhatsApp我：「唉，我老豆頭先做快速測試，兩條線，中咗呀，我check過自己就冇事，阿媽都冇事，而家唔知點算。」
我：「下，有冇check清楚呀，快啲叫老豆入房自我隔離先啦，你報咗上去都唔會安排到地方畀老豆住，竹篙灣都冇晒位，救護車同醫院又超負荷，政府都係叫人居家隔離。」
Sherming：「我知呀，早排老豆返工嗰度有同事確診，我都心知不妙㗎喇，而家真係中招，阿媽話想搬去婆婆度住下先，佢叫我一齊，但婆婆嗰度好細㗎，又冇裝上網，我要做公司嘢應該搞唔掂，聽日仲有個網上meeting要開。」
我：「喂，我哋嗰頭咪有兩間濕鳩酒店嘅，啲房好細，不過四、五百蚊有找，book嚟住囉，始終係正式酒店，起碼有上網先。」
我承認自己當時並未有邪念，所以好正義咁提議Sherming住酒店。
Sherming：「上網search咗啦，勁衰囉！可能知道而家好多人要住酒店自我隔離，附近嗰兩間都坐地起價，要千幾蚊一晚。」
我：「千幾蚊，有自由行嗰陣都唔使咁貴喎，我記得之前都係$800至$1,000一晚，我幫你check check吖！」邊講邊開個酒店網，真係喎！
Sherming：「千幾蚊一晚，出面有好啲嘅酒店直頭可以staycation喇！不過我唔想去到油尖旺，始終唔想距離屋企咁遠，一陣老豆有咩事就麻煩。」
我：「咁又係，而且你仲要住好多晚，千幾蚊都唔係辦法。」
Sherming：「其實我將個日子search遠啲，個幾星期後有返正常價，但係而家留喺屋企等到下星期先住又冇意思。」
我：「去我屋企住囉，咁近，你真係做咗快測冇事？」
Sherming：「得咩？係喎，你一個人住㗎喎，係咪得㗎？咁我做多次快測，冇事就嚟㗎喇！」
就係咁，Sherming當晚就拎咗幾件衫去咗我屋企，本來冇得見心儀嘅女同事，但最終竟然可以同住，我係咪發緊夢？雖然我同Sherming嘅關係不嬲都好close，不過同居就真係諗都唔敢諗，多謝啲酒店坐地起價呀！感謝主！
當晚我都有做快速測試，又係冇事，換言之我同Sherming暫時都安全，估唔到要同個密切接觸者有咁密切嘅接觸，但係我心甘情願，而家都發展到好似傷風感冒一樣，難聽啲講句，可以近水樓台，真係中招都抵啦！
Sherming：「多謝你呀，你唔驚我係密切接觸者咩？雖然頭先check咗兩次都冇事。」
我：「驚咩吖，要中一早中咗啦！同埋社區咁多隱形患者，可能呢棟大廈都有，自己小心啲咪得囉！」
我間屋得一間房，但係有張梳化床，咁梗係要讓張床畀女仔瞓啦，何況仲係一個有好感嘅女仔，睇得出Sherming好感激我，不過佢都有好多嘢擔心，嗰晚不斷要打畀佢老豆同阿媽溝通，人又靚又孝順，邊到搵呀？
當晚一切平靜，我相信自己同Sherming都要時間適應，第二日起身我哋如常做返平時Work from Home嘅嘢，朝九晚六嘅時間好似火箭咁快就過咗，因為真係幾忙，夜晚本來想煮飯仔，不過雪櫃冇食物，唯有粗粗地煮即食麵，但佢話自己始終係密切接觸者，所以點都要分開食，冇所謂啦，最緊要我哋喺同一個空間生活，保持距離都係勁浪漫超溫馨。
Sherming：「我沖涼先喇。」
可能已經住咗一晚，Sherming明顯自在咗好多，但佢沖完涼之後就不得了，換咗件背心同埋短褲，呢次真係天時地利人和，唔止酒店坐地起價幫到手，連早排嘅寒流都走埋，可以著短袖喇，Sherming條短褲先攞命，真係好似啲PE褲咁，對腳又白又滑，救命呀！
Sherming：「不如我下星期住返酒店啦，因為見到7日後可以用正常價book到。」
我：「點解呀？住得唔舒服？」唔係見到我偷望佢對腳啩……
Sherming：「住得舒服呀，但我唔好意思，搞到你要瞓梳化，而家等阿爸好返，可能要住好耐㗎！」
我：「我冇所謂呀，其實平時我成日瞓梳化㗎，酒店都好危險㗎，可能呢區都有好多密切接觸者甚至確診者入咗去住，到時唔中招都變中招啦！」
Sherming：「咁又係，不如我交租畀你吖！」
我：「妖，講呢啲！」
唔好走呀，住得愈耐愈好，參考返啲人從外國抵港住酒店，最低消費都住21日啦！Sherming坐喺床做嘢又係熱褲，煮嘢食又係熱褲，路過斟水又係熱褲，因為佢最初六神無主冇乜執到啲衫褲鞋襪，難怪得一條熱褲仔走天涯啦！
好，既然上帝幫我開咗呢扇窗，我亦要把握機會好好利用同居嘅日子，將Sherming由女同事變成我嘅女朋友，之前傾計已經知佢冇拍拖㗎喇，如果而家都唔表白，之後個世界正常返，有返社交活動，Sherming隨時會畀其他人搶咗去。（未完待續）