好耐之前有個男人上嚟join member，公司班女同事個個依嘩鬼叫，抬起頭睇下咩料啦，我真係有一秒以為係吳彥祖，須知道嗰陣仲未全民「戴罩」，所以五官都好清楚，呀生，靚仔到咁嘅地步你同我講溝唔到女要玩speed dating？你似玩我哋多啲喎，完全冇說服力囉！
當時所有同事得兩個諗法，一係就競爭對方派無間道嚟扮客索料，一係就天生玩家，純粹想借speed dating為名去識多啲女仔玩弄感情，都係嗰句，閣下9成似吳彥祖，咁都要嚟join memeber，你叫其他男會員情何以堪呀？
一如所料，每次畀翻版吳彥祖張相其他女會員睇，一個二個都趨之若鶩，其實莫講話女會員，就連我啲女同事都想將佢「私有化」，咁當然唔可以啦，而大家亦覺得咁靚仔好快就會搵到另一半，點知結果令我哋大跌眼鏡。
肺炎搞咗幾耐吖？由冇口罩年代入會，去到人人戴口罩，再嚟到第五波疫情，全民強檢都嚟緊喇，翻版吳彥祖仲係單身，雖然每個女會員一開始定必心心眼，無奈出嚟食過幾次飯就肯定冇後續，呢個亦正正係翻版吳彥祖咁靚仔都冇辦法喺現實生活中溝到女，輾轉間要幫襯我公司嘅原因。
聽返啲女會員嘅feedback，翻版吳彥祖爛飲爛玩同爛賭，試過食緊飯打去馬會買馬……等等先，好多人都賭馬，好平常咋喎！
女會員：「賭馬唔係問題，但係食緊飯可唔可以上網買？佢打去投注熱線勁大聲喝人哋：『5場3號！快啲啦！買唔切係咪你賠呀？5場3號呀，要我講幾多次呀？』嗰次周圍啲人望晒過嚟，好尷尬，臨走仲見佢後面褲袋攝住份馬經，唔知以為包住把西瓜刀準備劈友。」
翻版吳彥祖係煙鏟，每餐飯都要行出行入食好多支煙，另一個女會員話：「其實我唔介意另一半食煙，但佢真係勁誇張，唔好話一齊行，就算坐喺佢對面都聞到好大陣煙味，入晒骨嗰隻，嗰次入埸睇戲坐隔籬最難頂，佢連睇戲期間都出咗去食煙兩三次。」
翻版吳彥祖亦愛杯中物，有次佢晏晝4:00叫個女會員出嚟食Tea，咁人哋就奇怪點解閒日呢啲鐘數唔使返工，問佢係咪放假？翻版吳彥祖就好老實咁話：「唔係呀，噚晚同班friend飲酒，一起身已經係晏晝3:00，咪索性唔返工囉，而家好得閒，出唔出嚟食嘢？」
據說，翻版吳彥祖係完全冇事業心同埋計劃，3年幾轉咗7次工，因為爛飲爛玩，係典型嘅月光族，同埋佢好鍾意車，將大部分嘅錢投放喺呢方面，但每次揸車就好似變咗另一個人咁，有個女會員話上佢架車好似玩緊Formula 1，癲過搭亡命小巴，有人喺馬路上爬佢頭，佢就會唔輸得咁要爬返對方，行為充滿挑釁性。
另外，翻版吳彥祖嘅談吐舉止亦係嗰種，「一早知啦！」「唓，我唔做之嘛，如果做一定叻過佢！」總之就覺得自己係最勁最醒，但其實除咗車、酒、馬之外，其他嘢乜都唔識，咁又真係幾難頂嘅。
其實缺點多過翻版吳彥祖嘅人可謂大有人在，擁有呢副靚外殼仲走嚟話溝唔到女，點講都有啲牽強，後來負責佢個case嘅女同事解釋，翻版吳彥祖對擇偶有一定要求，佢自己係咁講：「喺酒吧溝啲MK妹梗係冇問題啦，以前都食唔少，但係而家30幾歲，會諗結婚，唔想搵呢一類女仔做人世，諗起細個醉醉地都可以拉一件MK妹入酒吧廁所搞嘢，我就會同自己講，第日娶嘅老婆一定唔可以係呢種女仔。」
女同事問：「咁你想要邊一類型嘅女仔呢？」
「我想要成熟型，識得照顧自己，唔會黐身，我出去飲嘢唔好問長問短。」
女同事：「但你自己唔係成熟型喎！」
「所以咪要取長補短囉！」
唔怪得要嚟幫襯我哋，佢嘅世界根本識唔到呢一類型嘅女仔，圈子都唔同，而且磁場有咁大出入，畀你用外型吸引到，出一兩次街都會露晒餡，咁梗係冇後續啦！
雖然由冇疫情join到有疫情，世界都變了樣，不過翻版吳彥祖嘅擇偶條件同性格就一直冇變過，無論勸咗幾多次，佢仍然係將馬經攝喺後面褲袋，仍然係一日食兩包煙，就算禁晚市冇酒吧，佢都仲可以搵到啲私竇可以去飲酒，仲叫埋我哋一齊去飲。
各位女士，如果你遇到一個9成似吳彥祖嘅型佬，但係完全冇內涵，你又接唔接受到呢？會因為呢副俊朗外表而覺得可以遷就，定係好似一班女會員咁，出咗幾次街就唔想再繼續落去？