舊同事毅然辭去headhunt工作，準備返另一份In House HR，新工作嘅salary低過而家份老底，不過佢ok，原因係做headhunt壓力太大，個個月追數，個個禮拜開KPI大會，佢發現自己嘅身體同埋心情都差咗好多，各方面都開始吃不消，結果搵到新工就辭職。
由於佢有一定年資，之前條數亦唔差，所以老細親自出馬留人：「In House爭好遠喎，人工係咁多就咁多，Headhunt你可以月月爆數，其實成功嘅人係要承受壓力㗎啦，好正常啫！你頂唔到追數嘅壓力，就自然搵唔到大錢，啱唔啱先？」
最後舊同事都冇留低，佢話好多朋友都覺得佢戇居，因為賺嘅錢比以前少咗。
其實成功嘅定義唔一定要賺大錢，有人鍾意靜靜地過平淡生活；有人寧願賺少啲都唔想schedule塞到滿一滿；我亦見過有人鍾意一段時期做一份工，儲夠錢就去個冇set歸期嘅旅行，等自己見識多啲，返嚟再重新起步。
可以按照自己鍾意嘅方式生活，已經代表你係一個成功嘅人。
賺錢係工作嘅目的，工作只係賺錢嘅方式。