話說我哋成班男仔friend經常約埋打機，獨沽一味玩足球game FIFA，大家會組隊online挑戰世界各地嘅人。
本身玩得好地地，點知其中一個friend阿堅喺年頭同女友同居，自此我哋嘅FIFA世界變得不一樣，首先佢經常甩底，雖然少佢一個都可以照踢，但就唔過癮囉。
其次係我哋成班男仔以前玩得好開心，一路打機一路戴住earphone吹水，講粗口講咸嘢咩都傾一餐，不過此情只待成追憶，就算阿堅有online，佢都只可以用默劇形式咁打，有一次阿堅入波，我哋成班人yeah晒，唯獨阿堅冇講嘢，我問佢係咪啞咗？定係off咗line斷線？畀少少反應好喎！阿堅就好似無間道啲摩斯密碼咁，用手指篤篤篤個咪發出聲響，後尾先知佢女友話阿堅打機好嘈，所以就入波都唔敢yeah，只可以做陳永仁……篤兩次即係同我哋講：「X你！」，篤三次即係講：「仆街啦！」，狂篤即係佢同我哋慶祝緊入波，一下長一下短即係：「我要quit game喇，條女睥緊我。」
真係人間悲劇！
不過阿堅嘅人生喺兩個月前重現曙光，佢豪擲幾千蚊送咗部Switch加「動森」畀女友，每日好畀心機咁教女友玩，又不斷搜尋嗰啲佈置得好靚嘅屋同埋場景畀女友睇，最重要係佢女友幾個best friend都玩，而家晚晚一齊online去潛水、釣魚、捉蟲，前幾晚仲約埋睇煙花，佢女友打動森已經打到傻晒，阿堅亦變返以前咁同我哋一路打FIFA一路講粗口，唔使再用摩斯密碼篤篤篤。
阿堅話：「動森呢隻game應該要攞諾貝爾和平獎！」
佢以過來人身份作出呼籲，各位男士如果想爭取更多私人空間同埋時間，應該要買部Switch加「動森」畀你老婆或者女朋友，只要佢哋打到傻晒，你就會有好日子過。