賺唔到錢得一個原因

我表弟已經失業咗好耐,之前都提過佢老竇叫我幫手搵工,本身真係好唔想,但係不敵奪命追魂call,仲有我阿媽不斷做說客,結果都係心軟打畀表弟傾兩句,冇工介紹都試下搵出問題所在。

我:「你之前搵咗咩工啫?」

表弟:「冇呀,銀行工咋,但唔想做teller,因為想入內部學多啲投資技巧。」

我:「你好似讀傳理系喎,唔搵返啲media嘅工?」

表弟:「嗰陣覺得傳理系同Marketing呢啲型吖嘛,但見啲friend做都搵唔到錢。」

我:「有咩工係一嚟就搵到錢?我都想知。你對投資有研究有興趣咩?冇聽你提過嘅。」

表弟:「冇㗎,不過想搵啲賺到錢嘅工,teller嗰啲冇前途㗎,淨係幫人提款開戶,學唔到嘢。」

我:「咁你去證券行做囉。」

表弟:「我又唔想sell嘢。」

我:「唔怪得你一直搵唔到工啦!」

表弟:「表哥你headhunt呢行係咪好賺錢?」

我:「你冇sales又冇HR經驗,一起步都係萬幾蚊底薪,賺唔賺到錢睇你點做,不過應該唔會請你。」

語重心長講一番說話,做咩都好,唔好齋諗點樣賺錢,而係要諗點樣令自己值錢,冇任何工作或者行業係包好賺,如果你而家做緊嘅工作唔賺錢,就先賺知識、賺技術、賺經驗、賺人生閱歷、賺人脈,你賺到以上嘅嘢,自然會賺到錢。

行行出狀元,你睇下幾多有錢佬純粹係老粗冇學歷,因為賺唔到錢得一個原因,就係諗得太多,做得太少。

error: