好多人非君不嫁，或者非卿不娶，為咗想要心目中嘅愛情，為咗搵最適合嘅人，願意一直默默等待，寧缺莫濫，但係亦有好多人為結婚而結婚，認為去到某個年紀就一定要成家立室，當中有人識得慢慢去學習同欣賞，由唔係咁愛變成好愛，亦有人結完婚之後一直埋怨，以致共枕千日，竟是一聲不愛。
Kelly，我哋公司嘅熟客，第一次係join一個14 vs 14嘅speed dating活動，佢睇中一位做公務員嘅男會員，可惜神女有心，襄王無夢。Kelly隔咗一排又join我哋另一個20 vs 20嘅活動，今次佢睇中另一個男教師同埋一個工程師，只係出過幾次街之後，佢又嫌呢兩個男仔食飯睇戲都要AA制，如是者，再隔一排Kelly又join我哋第三個活動，而今次佢終於成功搵到男朋友，仲結埋婚。
Lucas，一樣係前後玩咗3次，第一次佢睇中一個做會計嘅女會員，只係嗰位女會員比較鍾意另一位大隻仔參加者，先後同兩個男仔出街之後，都係揀咗同大隻仔發展。Lucas第二次再嚟嗰陣學精咗，識得漁翁撒網，同時約一個空姐，一個Marketing，同埋一個任職服務業嘅女仔，不過你揀人時人揀你，3個女仔同Lucas去咗一次街之後都冇下文，然後佢嚟join第三次，一樣係多線發展，終於畀佢搵到女朋友，仲雙雙步入教堂。
Kelly同Lucas就係喺第三次speed dating中相遇，然後拍咗半年拖就結婚，而其實佢兩個係join晒上述3次活動，換言之一早見過，喺呢度稍稍解釋下speed dating做法先，例如一個14 vs 14嘅活動，每人係有一張表格，我哋會寫晒今次參加者嘅名上去（男嗰張得女member名，女嗰張得男member名），如果覺得對方適合，你可以剔對方個名，完咗活動交畀我哋，若然男女member有互剔對方，我哋先會email返雙方嘅電話畀呢對男女。
喺第一次活動當中，Lucas同Kelly都冇剔對方，第二次都係冇剔，直至第三次相遇，佢兩個都互剔。
佢哋結婚，Lucas特登拎張喜帖上嚟畀我，恭喜完再同佢傾咗一輪，期間我忍唔住問：「其實你知唔知第一次join已經有Kelly？」
Lucas：「坦白講，第一次完全對佢冇印象，第二次Ice breaking認得佢，佢都認得我，不過我當時想追個空姐嘛，我冇同佢講呀，我話兩次遇到嘅女仔都唔係好啱，佢話自己又係咁，直至第三次，大家就開始有話題喇，咁睇睇下佢都ok嘅，講真吖，我同佢都唔細啦，仲揀咩！總之到時早啲到，唔好同佢講空姐單嘢呀！」
放心啦！正如我都冇同你講佢男教師同埋工程師單嘢一樣。
望住Kelly同Lucas嘅請帖，我個腦不期然喺度諗，有時大家只係對方嘅後備或者Plan B、Plan C、Plan D，偏偏就要喺婚禮上承諾一生一世。