手上拎住一份有5個月空白期嘅CV，循例問求職者呢段時間做過咩？因為我唔問，佢去其他公司見工嗰陣都會被問及，不如預早練習，同我傾好先出去公海，冇咁易畀大白鯊咬死。
求職者：「呢5個月有返工，不過唔知個職位叫咩名，坊間又冇一份工可以融入，點寫都好似唔啱，所以索性唔寫，人哋問到先算。」
唔通你係鴨王？？？
我：「咁即係做咩？」
求職者：「幫人燒豬扒牛扒腸仔。」
我：「……哦，原來你喺燒烤場定唔知嗰啲咩韓式燒肉店做嘢。」
求職者：「唔係，我老細賣燒烤爐，但只係target啲住高尚住宅嘅客，即係住半山獨立屋嗰類，我要教啲客用個爐。」
我：「哦，咁你計落都算係promoter或者sales吖。」
求職者：「我唔使做銷售，雖然唔知老細點樣搵到班半山客，但真係經常有order，我淨係負責送個爐同埋示範燒嘢食。」
咁屌鬼既…..
我：「哈哈，咁吊詭既？平時工作就係坐喺office等order送貨？」
求職者：「冇office架，都冇同事，我同事就係得一個老細，佢有份正職，呢份係佢嘅freelance，但啲客又好穩定，平時會畀架車我揸，通常都知邊日要送貨，咁我就會買定啲豬扒牛扒腸仔，送貨時喺人哋花園裝爐，裝完就燒一次畀個客或者間屋嘅工人睇，有時屋主已經叫咗成班朋友嚟，咁第一次就順手燒埋，人哋買爐已經包咗呢個服務。」
我：「幾錢人工呀？」
求職者：「12500，嗰時覺得幾得意，好似冇咩壓力咁，份工唯一嘅要求就係有車牌，但係乜嘢福利都冇，最後覺得唔係辦法，成日喺架車度又好無聊，所以辭咗職。」
我：「其實份工點搵架？」
求職者：「Agency介紹，唔係睇招聘網站。」
太奇怪嘅工作真係有害無益，貪一時得意去接受offer，最後都係搞到自己，特別係後生仔，青春雖然仲有配額，但唔可以過得不明不白。
其實幫手燒嘢食都可以兼容好多工作，例如酒店自助餐都要搵呢類師父，如果你喺一間正正經經嘅公司攞經驗，將來話唔定可以搵酒店工作，人工都唔錯架，大前提當然係自己想喺飲食業發展啦！不過呢位求職者之前做文職，而家亦係搵緊office工，所以呢段經驗真係幫唔到佢。
多啲考慮career path，將來就唔使兜咁多冤枉路，有時一子錯滿盤皆落索，搵工始終係寧缺莫濫，否則你燒嘅就唔係豬扒牛扒腸仔，而係自己嘅青春同時間。