Headhunt行家同我分享佢接到一隻奇怪job，本來好早已經想投稿，但又唔想咁張揚，所以特登隔成年先同我講，佢話驚我忍唔住出咗post。
話說佢有個客係男人，40出頭左右，想請個無合約形式嘅人陪出trip陪瞓覺。
「我最初以為佢當呢度係夜總會。」
我：「有咩分別？」
行家同我講真係有分別，首先呢位男客人唔係想請女仔，唔係要咩後生女呀，18歲呀，362436呀，佢想搵一個正正常常嘅男性陪佢出trip，咩年齡都冇所謂，之前做咩工作都唔緊要，最重要有陽剛味。
聽到呢度，我忍唔住插嘴：「哦，即係老細唔鍾意女人，鍾意男人，咪一樣。」
「真係冇色情成份，你聽埋我講先，呢個客自稱出trip住酒店成日撞鬼，有次喺美國，夜晚瞓覺有人喺佢耳仔邊講嘢，仲勁扯佢張被。」
我：「咁隻鬼講英文定中文？」
「冇問呀。仲有一次喺馬來西亞，酒店房門口盞感應燈理論上係有人行過或停留先會著，不過當佢瞓喺床上嗰陣，房門口走廊盞感應燈自己著咗，個客話佢落lobby坐咗成晚通宵，另外有一次喺越南，房裡面個水煲自己啪一聲煲水，佢話當時距離個水煲好遠，根本唔會掂到。」
我：「咁樣樣，其實叫個員工同行，再同房咪得囉！」
「佢話自己係煙鏟，會住吸煙房，幾個頭馬都唔食煙，加上唔想同事知佢驚鬼，住喺房又多醜態，所以就要請外人，最重要係銀包電話passport喺晒房，個客唔希望亂咁請人，有headhunt中介會安心啲，仲話曾經考慮喺越南請當地人，希望慳返喺香港請人要包埋機票嘅錢，但佢覺得當地人信唔過，想請香港人。」
我：「人工點計呀？」
「Freelance形式，1000蚊一晚，機票食宿佢包，有以下要求 1）夜晚佢瞓覺嗰陣，呢個freelance一定唔可以瞓著，佢可以開酒店書枱燈做自己嘢，因為呢個客都唔會book細房，空間會有，最緊要睇住佢瞓，有咩事要即刻幫手；2）佢出去做嘢嘅時候，唔會限制同管束呢個freelance做乜嘢，去行街又得，留喺房瞓覺養足精神夜晚做『看更』又得，無所謂，但係佢如果要返酒店，呢個freelance就要即刻返去陪佢，舉例老細好早做完嘢，夜晚7點已經返酒店休息，個freelance就要7點返到；3）當然要手腳乾淨，唔好搞佢啲嘢；4）唔介意佢食煙，個freelance就算一齊食都得；5）唔好多嘴阻住佢做嘢，唔係要請個人返嚟陪傾計，只係想請個人返嚟睇住佢瞓，等佢安心。」
我：「你肯定個freelance執番梘會冇事？」
「冇事呀，佢咸濕過我同你呀！佢話做嘢還做嘢，出去玩還出去玩，所以無謂請個女仔，唔想有咩事惹官非。」
我：「但係出trip出得幾耐呀？個Freelance賺好少咋喎。」
「其實就唔算少嘅，例如佢去美國次次都十幾日，佢計日數，你坐飛機來回兩程照比，你當佢日薪啦，兩星期都輕鬆執萬幾蚊，佢仲會每日畀大約500蚊港紙咁上下嘅當地錢你食飯，你識慳嘅話，嗰度又每日執少少，係去亞洲地方短啲囉，3至5日，如果一個人係冇工作，當freelance其實爽㗎，但好少人長期冇嘢撈，所以次次出trip都要再請人。」
我：「呢排等錢使，佢仲請唔請人？」
「呢排都冇人飛到，疫情過後搵你。」
OK，一言為定。