投稿讀者：Billy.T
上一份工嘅同事忽然聯絡我：Hi Billy.
掃返對上一次同佢嘅msg紀錄，原來已經係2016年4月。大家講咗幾句客氣說話，佢終於入正題。
「我家姐間美容院唔掂，我想幫佢籌錢，可唔可以借萬五蚊畀我？一定會還返畀你。」
其實我同佢以前做同事已經唔係熟，唔同department，偶爾有嘢會夾一夾，大部分時間都係hi bye friend，WhatsApp 2016年4月個msg，係我講：「份文件擺咗喺影印機隔離個tray。」佢答：「okok…thx.」
一來唔熟，二來而家咁嘅環境同市道，我自己都唔好得去邊，所以直接回覆：「唔好意思呀，我都唔係太鬆動。」
心裡面有少少唔舒服，係咪拒絕得太直接呢？一場同事，係咪唔借都應該慰問下呢？
諗下諗下，我都係send多句msg畀佢：「除咗錢，有冇其他嘢可以幫你呀？」
我發現msg send出去之後一直單剔，更發現本來WhatsApp有相片嘅佢，突然變咗灰色人形，冇咗張相。頭先問借錢嘅時候，明明佢個WhatsApp係有相，轉頭已經block咗我，真係冇嘢好講。
我冇追尋任何答案，亦已經冇再諗，不過第二日有另一位舊同事contact我，佢問阿Don有冇搵我？
我：「有呀，但係你點知？」
「Don問我借錢話用嚟幫你，我心諗Billy都走咗幾年啦，無啦啦點會搵阿Don去幫呀？而且阿Don幫你出面問我借錢？講唔通喎！」
我：「吓！相反喎，點都好，我真係冇問阿Don借錢。」
「得喇，唔使講，明，求證下啫！」
原來Don一早已經借盡舊公司同事，我係隔離team所以當時冇波及，而家contact我呢位同事，仲有其他同阿Don比較熟嘅人，好多已經中過招，呢位同事仲話我知：「我哋自己個department有個WhatsApp group，淨係冇add阿Don，大家會分享Don點樣問借錢，家姐美容院生意唔好講得最多，爸爸過咗身呢個原因都用咗好多次，之前呃公司同事訂口罩㖭！」
我：「其實Don屋企會唔會真係有事？」
「佢屋企有冇事就唔知，不過賭外圍長期周身債就肯定㗎喇，有次佢喺公司冇熄電腦，個mon係外圍賭波網，佢應該啱啱落完注行開咗，網頁左手邊有個column見到佢買乜，場場都一萬幾千咁賭。留意咗佢好耐，嗰晚啲波如果爆冷，佢第二日就會問我哋借錢。」
我：「咁你哋有冇借？」
「初時唔知佢咩料都有借，後來知佢賭外圍咪冇借囉！有次借咗5000蚊畀佢，兩年後先還，仲要係咁追佢，大家關係都差咗好多，基本上喺公司都冇乜幾句㗎喇，點知佢忽然又放咗工call我話借錢幫你，係咪奇怪喇，反咗面咁滯都仲要call我。」
借錢見人心，還錢見人品，當一個唔熟嘅人走嚟問你借錢，除咗山窮水盡之外，對方亦肯定問身邊嘅人借到爛晒，最清楚佢嘅親人同朋友都唔願意借，先會走去問關係咁疏嘅人，可憐之人必有可恨之處，如果Don有借有還，根本唔使行到呢步。
我認為拒絕借錢嗰陣要果斷啲同埋將心比心，唔好刻意挖苦同埋留難對方就夠喇，每個人都有自己嘅困難，有時真係幫唔到咁多人。