當年阿叔我都拎過「學業成績進步獎」同埋「最顯著進步獎」㗎！仲要喺伊館頒獎，雖然得一年貨仔，中學張成績表大部分時候都寫住「試升」，話時話，而家中學仲興唔興寫「試升」㗎？
Anyway，呢張獎狀失蹤咗好多年，直至有一次我拎毛巾沖涼……
「媽咪！」
「咩事？」
「點解我個學業成績進步獎用咗嚟墊櫃桶底㗎？」
「唓！有咩所謂啫，都冇用。」
好傷心，人生都冇乜拎過獎，叱吒樂壇最佳男歌手又未頒畀我。
呢個獎對我嘅發展有咩幫助呢？答案係－－－冇嘅，純粹內心畀咗自己少少肯定，然後見到「試升」嘅時候，我又會當睇唔到🙈
成績好，固然可喜可賀，成績唔好，都唔需要氣餒，人生漫漫長路，唔係一戰定輸贏，最終成為一個點樣嘅人，有一個點樣嘅結局，其實仲有好多嘢等緊你經歷。
只要你有足夠嘅勇氣，每日都係一個新開始。