想問問大家，如果一旦辭職唔做，你會幾時quit咗公司或者一啲公事嘅WhatsApp group？Last day嗰日定係隔幾日？會自己quit定係等人出聲，抑或咩都唔做，等個group嘅admin主動踢你走？
我自問已經處理得好好，last day臨放工前同大家講聲thank you同take care，跟住就自己退group，真係搭正6點鐘，早一分鐘都冇，因為費事畀人話我睇漏msg，一陣有咩跟甩咗令到新同事為難就唔好啦！
其實我當日退group前嘅msg就係以下咁簡單：
「各位同事，我今日last day，多謝你哋一直以嚟嘅照顧，Thank you，大家Take Care，得閒約出嚟食飯。」
然後我就陸續收到其他同事嘅祝福同埋say goodbye，隔咗一陣我就自己退group喇，始終唔再係公司員工，大家又會喺個WhatsApp group裡面傾公事，我仲喺度唔係咁方便，咁個admin遲早都要踢我㗎啦，所以就自己quit咗先，叫做好來好去有交代喇啩！
隔咗一日，有個senior私底下WhatsApp我（因為我已經唔喺公司個group度），雖然只係文字，唔係voice msg聽唔到語氣，不過傻嘅都睇得出佢係訓斥緊我。
「你知唔知你噚日喺個group裡面say goodbye，咁樣係打擊緊同事啲士氣㗎？點解你要咁做？」
我：「你冇嘢呀？我同大家講聲多謝照顧，叫大家take care，同大家say個goodbye，咁都有問題？你有冇病呀？仲要特登WhatsApp我講呢啲？」
由於我已經辭咗職，名義上佢都唔再係我嘅senior同事，所以我嘅reply亦唔需要畀面，你咁樣講嘢，我都唔使兜兜轉轉。
「我同你解釋點解會打擊同事嘅士氣，首先你自己走，其他人仲要喺度做，難免會影響其他同事嘅心情；第二，而家嘅同事肯定會諗，係唔係公司對你唔好先至要走呢？第三，你會令到其他同事都考慮搵工，呢個係風氣問題；第四，你覺得公司或者老細知道會開心咩？邊個人要遞信走，工作都係照舊㗎啦！你要say thank you可以私下WhatsApp佢哋，好似我而家私下WhatsApp你咁，而唔係喺個group公開講。」
我：「呢啲係咩道理呀？係你嘅諗法定係公司叫你傳話？如果你哋連一個員工last day講句多謝都接受唔到，視呢樣嘢為禁忌，不如由一開始就寫落員工守則度，叫晒所有人臨走都唔准公開講多謝啦！」
「呢樣唔講住，講埋quit group先，禮貌上你應該等admin踢你走，而唔係自己就咁quit囉！」
因為我都有少少慶，走咗仲要畀你話，有交代有禮貌又要畀你話，所以當時二話不說就block咗佢，唔想再睇埋佢啲謬論影響心情。
其實我曾經有過一次經驗，喺再對上一間公司離職嘅時候，我冇quit到公事WhatsApp group，唔係特登，係因為我set咗靜音，所以冇咩為意，一早已經當嗰個group透明，亦都冇入去睇，點知有一日嗰間公司個舊老細打畀我，劈頭就話：「乜你一直喺個group入面㗎？咁我哋講報價啲嘢你咪睇晒！」
得鬼閒睇你咩，當年我唔止轉工，仲轉埋行，啲咩報價資料完全唔關我事，最後佢講完就踢咗我出個group，坦白講真係幾尷尬，所以我汲取咗之前嘅經驗，今次先會主動退group，咁又有錯？
關於last day喺個group入面同成班同事道別，我就堅持自己冇做錯，逐個私底下say thank you同bye bye煩唔煩啲呀！WhatsApp group嘅作用就係一個msg畀全部人睇到，所以我絕對唔同意咩影響士氣，甚至會搞到其他同事想走嘅荒謬講法。
反而係quit group嘅時間問題，好想多啲人講下自己嘅處理方法，究竟大家會last day就quit定係等人踢呢？我喺成個過程裡面又係咪有做錯呢？