我英文名叫Renee，喺公司已經做咗3年，今日老細開會嘅時候咁樣叫我：「Rain，蕭生嗰邊有冇進展呀？佢覆實未？跟緊啲喎，阿Rain你跟緊啲。」佢叫咗兩次阿Rain，不過我都有應，因為正確嚟講呢3年以嚟，佢每日都係叫我阿Rain。
有冇糾正過老細？梗係有啦，婉轉又有，直接又有，特別係入職頭半年，不過我讀完一次，佢又跟我讀一次之後，再下次都係會叫我阿Rain，其他同事都一樣，試問可以糾正得幾多次？重點係叫錯我個名嘅同事，啲讀法都係唔一致。
「Winnie，你join唔join我哋食唔食lunch呀？」邊個係Winnie？正是我！Admin個女同事每次見到我都叫Winnie，情況同老細差唔多，頭幾個月我會不厭其煩咁讀一次自己個名，然後佢就會話：「Renee？OK，Renee，Renee，好！」
再下次佢見到我：「Winnie，個袋新買㗎，幾靚喎！」🤦🏻♂️
仲有我哋公司個Sales Manager，佢係咁叫我：「Vani，幫我喺張單度加多個item吖！」
我：「冇問題，不過我叫Renee呀！」
Sales Manager：「Sorry，Renee？Ok！記得幫我加多個item，唔該！」
隔咗一個鐘，呢位Sales Manager搵咗佢下屬過嚟check張單，佢下屬又咁叫我：「Re-An，大佬叫我提你，張單個新item係唔落銀碼，free畀個客㗎，淨係想佢見到加多咗個item，記得唔好打銀碼。」
由於我唔知佢口中嘅Re-An係點串，所以我只好拼出佢嘅讀音。
講開客，有個客打親嚟搵我都叫Rainy，我做咁耐，佢叫咁耐，亦有客會叫我Really，當我聽到對方叫我Really嘅時候，我都好想問返佢：「Really？你Really要叫我做Really？」
又有一次個同事叫我做阿Win，我嘗試教返佢讀正確之後，佢咁樣同我講：「Renee？嘩，好心你哋唔好改埋啲名咁難讀啦，你知唔知好蝕底㗎？見到又唔敢叫，叫咗又驚讀錯，正正經經改個英文名吖嘛，第日你轉工點算呢？HR收到你份resume都唔敢打畀你啦！」
Ok，即係你讀錯，其實係我嘅錯……明白！唔知以為Renee係咩咁複雜嘅英文名，簡單嚟講，呢個名讀出嚟都係得兩粒音，點聽點串都簡單過Olivia, Ophelia, Angelina, Patricia同埋Priscilla呢啲啩！
我做過一個粗略嘅統計，叫我阿Rain嘅人佔大多數，包括老細，其次係Winnie，跟住就輪到Vani，另外Rainy都唔少，Re-An、阿Win、阿Van、Really就屬於個別例子，不過有個同事唔知點解懶熟，會叫我Van妹，真係唔該晒。
經過頭半年嘅努力糾正，最終讀返啱嘅人得一兩個，其他都係「我行我素」，你有你叫Renee，佢有佢讀自己鍾意同埋認為正確嘅發音，所以呢幾年喺公司我已經習慣咗，算啦，都係一個稱呼啫，反正解釋都解釋到口水乾。
而家我喺office係點過㗎呢……
老細：「Rain，份嘢搞掂未？」
我：「搞掂喇，擺咗喺你枱面。」
Sales Manager：「Vani，你幫我改改個payment date吖，個客想要30日數期。」
我：「Ok，而家幫你改。」
同事：「阿Win，一陣食唔食飯？」
我：「唔喇，今日帶咗飯，你哋食得開心啲。」
其實我得一個英文名，由F.1用到而家，估唔到出到嚟社會工作之後要「被改名」，「被改名」都算喇，仲要一個人有N個英文名，N種讀法，初時畀同事或者客叫錯都好執著教佢哋點讀，而家我都認命喇，完全冇晒感覺。
有理由相信我公司啲人真係唔識英文，因為有個新嚟嘅女同事叫Christine，佢都keep住畀人叫Christy、Cathy，仲有Catherine，不過佢so far都係得3個英文名啫，唔夠我多，唔通喺度返工要叫Amy、Ada、Mary先至搞得掂？