10年前我太太小產，因為需要貼身照顧佢，加上舊老細調我去中山，所以我最終決定辭職，諗住先照顧太太一段時間再重新出發，嗰段日子應該係我人生最低潮，小朋友冇咗，自己都需要平伏，但又要收起情緒，否則我太太肯定更加傍偟。
不過最低潮嘅係之後再搵工嘅經歷，鑑於之前嗰份工足足做咗8年咁耐，我當然唔可以喺resume上面抹走啦，而呢個experience亦應該係我嘅優勢，點估到喺見成咗一份工之後，竟然會因為個reference check而白白錯失機會。
我記得當時去見工，雙方言談甚歡，對方亦好鍾意我，講晒工作細節同埋福利畀我聽，甚至介紹咗幾位「準同事」我認識，然後對方就話循例要做個reference check，由於佢哋係一間好出名嘅大企業，呢個招聘流程其實屬於正常，點知我等下又一日，等下又一日，始終收唔到最終confirm offer個電話。
然後我決定打去搵嗰間公司嘅HR問：「你好呀，唔好意思，我叫Herman，兩星期前嚟過second in，嗰陣黃生同我講咗好多細節，仲問我月頭返工得唔得，不過到而家都未收到你哋confirm，我怕係行開行埋miss咗你哋電話，email又唔覺有。」
個HR支吾以對，欲言又止咁樣，耍埋啲官腔不著邊際，唔緊要，反正second in嗰陣黃生有畀卡片，不如我直接打去搵呢位本應係我上司嘅人傾啦。
我打去道明來意，黃生亦快人快語：「你個reference check過唔到，之前個僱主對你評價好差，幾乎全部都係負面，佢仲打咗嚟我哋公司，叫HR千祈唔好請你，呢一part係令我有啲為難，你份reference check仲要上去畀其他人睇，希望你明白。」
其實嗰段時間我仲見咗幾份工，另外有兩份都有回音，又係傾到好實之後冇下文，其中一間公司嘅HR曾經打嚟反問我：「你同舊老細好大仇口㗎？佢踩到你一文不值，個Manager睇完佢寫啲comment之後就放棄咗，我哋請咗第二個人喇。」
我聽到之後好嬲，接二連三因為咁樣而喪失offer，我忍唔住打畀舊老細對質，佢亦毫不忌諱承認：「唔會畀你有好日子過，你咪搵份唔使reference check嘅工囉！不過通常呢啲都係細公司，屈就你喇！」
可能係有返咁上下規模嘅公司都要做reference check，加埋我喺舊公司做咗8年咁耐，呢個動作無可避免，而我個舊老細仲衰到一路都冇畀reference letter，追過無數次依然冇下文，對於我搵工係好大嘅障礙，初期interview可以話舊公司未畀，但我當時前前後後失業咗7個月，7個月都拎唔到reference letter？
係呀，我舊老細真係咁樣對我。
舊同事反而會打嚟慰問，不過聽完之後更加唔開心，佢哋話老細已經落咗order唔出reference letter畀我，收到reference check就要交畀佢親自處理，邊個偷偷幫我做，或者拎公司個印幫我出reference letter一定會追究到底。
有個舊同事好好，佢同我講：「老細係小家種唔係今日先知，但如果你真係需要reference check，一係叫新公司打畀我啦，唔一定要老細同上司先可以做，我可以用同事身份幫你做reference check，填我個名同公司email啦，畀埋我直線都得。」
好感激呢位舊同事咁有義氣，不過我選擇咗另一個做法，就係見工嘅時候坦白。
好多人都話去interview唔好講舊僱主壞話，咁樣會扣分，可惜我真係無計可施，所以決定唔加鹽唔加醋，照直講發生過咩事，點解做唔到reference check，點解離開咗咁耐都冇reference letter，我全部坦承告知。
唔係每一個人都識得體諒你，因為對方未必有相同遭遇，所以之後去見工受到唔少質疑，有人話老細冇理由咁樣對一個舊員工，懷疑我係咪犯咗咩大錯，覺得有問題嘅一定係我；亦有人問我點解因為老婆小產而走去辭職，仲問如果請咗我，將來係咪又會因為家事而選擇唔做……
我唔敢講問呢啲問題嘅人冇人性或者閱歷少，我只可以咁樣形容：你哋真係好幸福，人生無風無浪，所有嘢都係理所當然。
喺我心目中，打工就係為咗同另一半有好生活，當時我太太情緒咁唔穩定，真係好擔心佢會做咩傻事，所以喺我嘅立場，太太永遠重要過份工，如果對方覺得工作應該排第一，證明我哋價值觀唔同，再講落去已經冇意思。
太太心情平伏之後，到我陷入谷底，當時累積失業時間已經去到第8個月，除咗reference check呢個大難題，仲有啲工係in唔成，錢係一大擔心，個人自信亦所剩無幾，我甚至會覺得自己係咪被社會淘汰咗，點解想搵份工都咁難。
直至遇到我而家呢份工，佢哋都有做reference check，收返嚟嘅feedback亦一如以往咁差，但最後都請咗我。
我當時單刀直入問新老細，佢嘅回覆一字一句我仲記得好清楚。
「Reference check只係一個程序，公司要做，我覺得多餘，同埋我會信自己對眼同埋感受，既然我已經面對面見咗你，如果覺得適合，最終又因為個reference check而推翻決定，咁我咪即係認自己眼光差？你唔覺得reference check有時幾好笑㗎咩，好似你現任女友走去問你前女友評價一樣，如果樣樣100分，你同前度都唔會分手啦，咁現任徵求前度意見唔係好多餘咩？」
黑歷史都要承認，最谷底嘅時候我真係有諗埋一面，太太大肚時辭咗職，然後小產，我哋冇咗個BB，然後我冇埋份工，兩公婆齊齊失業，搵工處處撞板，所以後期直情係太太安慰返我轉頭，嗰陣我睇唔到希望，貧賤夫妻百事哀。
好慶幸喺一個咁絕望嘅時候遇到我而家呢間公司，佢哋仲同我講，其實reference letter純粹要證明你真係喺嗰度做過，所以show入職時嘅合約，配合最後幾個月嘅糧單已經足夠，reference letter只係一封信嚟啫，點解唔可以變通，反而拘泥於細節上呢？咁樣好容易會錯失人才。
我未必係佢哋口中嘅人才，但新公司一定係我嘅曙光，有時我會諗，最初驚太太做傻事所以拒絕去中山同埋辭職，後來發覺最有機會做傻事嘅係我自己，新公司冇理到舊老細嘅惡意評論，最終堅持請我，其實係救咗我一命。
所以喺之後嘅日子裡面，除非個同事做咗啲好過份嘅事（例如虧空公款等嚴重罪行，so far我冇遇過），轉工需要reference check我都會盡力配合，救人一命勝造七級浮屠呢個講法太誇張，我只係想喺能力範圍內開方便門，唔好阻人搵食，唔好立心不良去破壞。
正如Tony個case，雖然我知道佢屋企發生咗啲事，所以做完reference check都仲向佢嘅新僱主力推，但即使係咩都唔知，我一樣會咁做，大家曾經係同事，我當然想佢好啦，唔通見到佢落泊我會好開心咩？
你永遠唔知對方有幾需要一份工，你亦唔會知道其他人為生活承受咗咩苦難，何必要趕狗入窮巷呢？有好多公司唔覆reference check，甚至拖住reference letter唔畀舊員工，我完全唔理解係咩心態，舉手之勞啫，可能人哋等住開飯㗎！（完）