早排請人，有個男同事走埋嚟人事部同我講：「喂！出面個女仔嚟見工㗎？唔使見，直接請啦！求下你一定要請佢呀！」先生，你邊位呀？你Sales嚟咋，公司請個receptionist由你決定請唔請呀？講到驚為天人咁，住開少林寺好耐冇見過女人？
呢個世代唔係份份CV都有照片，畢竟大家都學精咗，保障自己私隱之餘，亦唔希望有啲公司「以貌請人」，偏偏今日interview呢位candidate就係連埋張相send嚟，我開返個file睇～～～好普通咋喎，公道講仲有啲豬膽鼻同四方面，唔通我女人睇女人特別苛刻？
因為呢個position係receptionist，所以要搵埋Admin個阿姐一齊in，入房見到個求職者真係有少少眼前一亮，不過亮點係來自另一方面—真人同CV張相差好遠喎！
一般嚟講，無論send CV或者整profile picture，大家都會P靚張相，然後見到真人就有落差，但眼前呢位candidate恰恰相反，正如我頭先所講，張相明明係豬膽鼻同四方面，點解會變成高鼻V面㗎？難道你反操作P醜自己，想我哋見到真人會有驚喜？
一齊in人嘅Admin阿姐比我更驚訝，見佢多次來回望CV張相，再抬頭望個candidate，好似要重覆確認係同一個人。
Interview嘅過程冇乜特別，我甚至可以斷言，之前in嘅幾位求職者比佢更出色，我指interview表現同埋應對方面。
Admin阿姐去到中段率先忍唔住，佢直接問呢位candidate：「唔好意思，我跳一跳出嚟先，因為我覺得你同CV張相唔係同一個人，我想confirm下真係你本人？雖然我咁講有啲好笑，唔會係send CV一個人，見工另一個人，返工又變返CV裡面嗰個人呀？」
意想不到係呢位candidate大方回答：「我嚟㗎！你覺得唔同咗樣，係因為我做咗醫美，所以我先會停工一年。」
冇錯，佢份CV係有一年冇返工，不過我哋請receptionist所以唔care，有啲求職者因為生完BB做全職媽媽，小朋友大咗先返出嚟搵工，冇做嘢幾年我哋都照見。
Admin阿姐：「即係整容呀？」
求職者仍然笑得大方：「都可以咁講嘅……雖然醫美同整容係有分別，不過我真係整咗幾樣嘢，所以先至會休息一年。」
醫美又好，整容又好，我個人冇乜意見，畢竟我怕痛，做下Facial或者脫毛就ok，但勢估唔到開啟咗呢個話題之後，Admin阿姐即刻由一個嚴肅in人mode，變成興致勃勃朋友交流mode……
Admin阿姐：「我都想打鳳凰電波呀！你覺得香港做定係日本做好呀？」
求職者：「香港sell嘢好勁，我唔鍾意，又貴！日本我都唔會考慮，因為日本通常輕手啲，佢哋怕孭鑊，效果冇咁顯著，不過就安全啲囉！」
Admin阿姐：「咁你去邊度做呀？可唔可以介紹我？即係你之前個樣係CV張相？效果好好喎！痛唔痛呀？」
其實我想插咀問句，既然整到咁靚，點解CV唔換張新相呢？可惜我冇辦法打斷佢哋嘅熱烈交流。
求職者：「我喺韓國整，痛㗎！不過真係好明顯，係我要嘅效果，通常我會去4日3夜，最後一日先至整囉！塊面實會紅晒，出晒粒粒，返到香港仲要抖一排㗎！開刀你接唔接受到？」
Admin阿姐：「開刀少少驚，你好勇喎！你塊面係咪做咗削骨呀？韓國邊間？有冇中文翻譯㗎！」
由呢一刻開始，個interview已經冇我嘅事，後尾我索性出返去先，由得Admin阿姐同個candidate慢慢傾。
我諗佢哋傾咗兩個鐘左右啦！Admin阿姐親自送人出門，再行返嚟同我落order：「我同佢講好咗㗎喇！你出封email正式confirm offer，星期一返工。」
你點話點好啦！始終receptionist係隸屬於admin department，最緊要你滿意，後來先知佢兩個已經約好去首爾…..
認真，我相當佩服呢位求職者，正確嚟講，佢已經成為我同事喇，整唔整容都好，絕對係個人自由，如果佢對自己外表唔滿意，花錢之餘再用一年時間執到靚，嗰份決心同毅力都好值得尊重，何況又冇影響到其他人。
最難得係佢大方承認，返工短短一兩個星期已經同公司啲女同事好friend，個個請教佢關於醫美嘅問題，靚唔靚係主觀感覺，不過呢位新同事嘅人緣就真係好好。（完）