定期做身體檢查！定期做身體檢查！定期做身體檢查！重要嘅嘢講三次，因為人其實好化學。公司有位40幾歲嘅女同事某日開始體重急降，仲試過放工時間暈喺地鐵站，佢初時以為只係貧血之類，點知入醫院檢查先知係癌症嘅第四期。
呢位女同事叫Icy（化名），喺公司做咗8年，性格上好易相處，經常笑容滿面，我自己真係未聽過Icy講人是非。佢間唔中更加會煲湯返嚟請同事飲，所以Icy喺office裡面有個暱稱，就係「媽媽」，女同事特別鍾意咁樣叫，因為Icy的確好識得照顧別人。
據了解Icy近年已經發覺身體唔係太舒服，當然詳細係點樣，我哋作為同事未必了解得咁清楚，但相信大部分人未去到「唔對路」嘅情況，真係唔會特登去睇醫生或者做身體檢查，Icy正正係處於呢種狀態，直至喺出面暈倒，佢先知道情況比想像中嚴重好多。
癌症，第四期，由於發現得太遲，癌細胞已經擴散，至於更詳細嘅病情唔係不便透露，而係以Icy當時嘅情況，無論身體定係精神上都好難向我哋交代咁多，其實亦唔需要交代，最緊要係佢好好休息，醫生都有鼓勵Icy，仲話第四期唔代表冇治癒機會，所以成班同事不斷鼓勵佢要振作同埋堅強，一定要打贏呢場仗。
局外人講句「加油」係好容易，但真正受到病魔折磨嘅當事人，其實係有苦自己知，Icy嘅意志頗為消沉，同時辭去公司嘅職務，老細唔畀佢resign，Icy又以時日無多為由多番婉拒好意，班同事個心都好唔舒服，我都認為停薪留職係最好，對於Icy嚟講係一種心理上嘅support，點知老細有情有義，佢話唔使停薪，直接留薪留職。
「好返，留個位畀你；好唔返，出糧出到你斷氣。」呢句係老細向Icy傳達嘅訊息，佢覺得醫病要錢，斷糧可能會令Icy嘅財務狀況出現拮据，希望對方可以全心全意同病魔搏鬥，唔需要有任何後顧之憂，或者老細呢次嘅處理手法唔係最正宗，但就非常人性化。
當然啦，我相信老細唔係開善堂，Icy喺度做咗8年，佢都有衡量過呢位員工之前嘅付出，然後先會有咁嘅決定，其實親情、友情、愛情，甚至係一場賓主之間嘅關係，大原則都係你對我好，我對你好。
因為Icy唔係病發後即刻同我哋講，亦唔係即刻辭職，初期我哋見到佢暴瘦同埋個樣好攰，真係冇辦法唔擔心，後來Icy連續幾日冇返工，老細先將呢件事講出嚟，大家亦透過WhatsApp向Icy送上支持同祝福，其後分批去探望，盡量點到即止，唔想打擾佢休息。
嗰段日子睇住Icy由一個充滿正能量嘅人變成好悲觀，及後情況有啲好轉，佢明顯開朗返少少，但係治療過程加上藥物等等嘅反應，又見佢撐得好辛苦，起起落落，反反覆覆，記得Icy喺我哋面前咁樣講過：「總好過突如其來嘅天災橫禍，而家起碼可以自己參與部分身後事安排，叫做有啲預備。」
雖然大家嘅反應都係叫佢𦧲口水講過 ，唔好講埋呢啲咁負面又唔吉利嘅說話，但係聽完之後個心難免會揦住揦住。
現實生活冇咁多奇蹟，大約半年之後，Icy已經唔喺度喇，老細一直有遵守承諾，繼續出糧直至Icy離開，亦畀咗筆錢佢屋企人。
由細到大都聽過「人真係好化學」，原來呢句係真㗎，回想返前幾年同Icy一齊工作，飲佢帶返嚟公司啲湯，但轉眼間佢已經走咗，感覺好唔真實，生命的確好脆弱，消逝嘅速度隨時比我哋想像中更快。
經過呢件事之後，我即刻去做咗個Body Check，Icy係一個唔煙唔酒嘅人，所以更令我覺得生命無常，希望咁啱睇到呢段文字嘅你，從今以後會養成定期做身體檢查嘅習慣，唔好忽視每一個唔舒服嘅訊號。
我唔識講嘢，寫唔到好流暢嘅文章，但最後想講一句最最最老土嘅說話～～～祝身體健康！
上司懶過下屬 幫佢執屎好忙碌
「佢人工係我哋幾個總和，好難接受」
https://hkofficedaily.com/?p=21479