我同Bryan當年只係做咗兩個月同事，不過我哋好friend，最近佢同我講升咗職，一定要分享下佢嘅經歷。
Bryan當年喺我間headhunt公司做咗兩個月就畀上司炒咗，如果一直有睇開《辦公室日報》嘅讀者，應該記得之前講過，我呢行如果有數返，你喺走廊屙尿都冇人理你，所以Bryan過唔到試用期得一個原因，就係無數，開唔到單。
佢其實好勤力，雖然大家唔同team，但有眼見Bryan晚晚OT，基本上亦係成個office最準時返，可惜性格始終唔適合，佢嗰組嘅同事又唔幫忙，經常係一副睇住你死嘅態度，Bryan喺度做咗兩個月，最熟最傾得埋就係茶水姐姐。
我記得佢被炒之前畀佢上司捉咗入房照肺，出嚟就開始執嘢走，當時係下晝4點鐘左右，所以收拾枱面離開係十分礙眼，佢同team嘅人一眼都冇望過佢，我同緊求職者phone interview睇住成個過程，然後Bryan臨走之前入Pantry同佢喺公司唯一嘅朋友－－－茶水姐姐say goodbye，我趕得切收線，入咗Pantry同佢道別，只見佢雙眼通紅，我搭下佢膊頭亦冇再講乜啲嘢喇，畢竟大家之前唔同team，本來只係點頭之交，然後我就送佢出去電梯大堂，期間receptionist想八卦，我哋一齊當佢隱形，好心就八少陣唔好幸災樂禍啦！
出到去冇人，Bryan同我講咗一句：「試用期內畀人炒真係好冇面。」可能係麻甩佬之間嘅對話，佢始終冇畀自己流眼淚，不過雙眼keep住紅晒。
我同佢講：「試用期內畀人炒絕對唔係冇面，打工係雙向，唔一定得公司有權覺得你唔適合，你都有權覺得呢份工唔適合，我相信你自己都做得辛苦，如果認清咗呢個事實，可以向你有信心又做得好嘅工作埋手，而家係你唔使再畀呢間公司浪費自己時間，咁樣諗會唔會好啲？」
Bryan聽完之後除咗講多謝，仲主動問我拎電話keep contact，不過電梯到咗，我唯有匆匆遞上卡片，叫佢跟住上面個手提add我WhatsApp，以為成個動作只係「得閒飲茶」，冇諗過佢第二日真係add我，之後大家keep住聯絡，佢亦好快搵到另一份In House HR嘅工作，亦即係佢未做headhunt之前嘅工種，一直做到而家，剛剛升職。
Bryan仍然堅持試用期畀人炒係好冇面嘅事，佢仲自爆當年唔敢同屋企人講出事實，寧願話自己唔鍾意份工，係自己炒老闆魷魚。
不過我都好堅持一個觀點，就係試用期係雙向，公司試用你，你都可以試用公司，interview時間有限，睇一個人適唔適合，睇一間公司啱唔啱做，真係要靠試用期。
即係你拍咗拖兩個月就分手，傷心同無奈梗有，但總好過大家互相磋跎一大段日子，然後先知道彼此浪費光陰，倒不如早啲知道，早啲搵到更合適對象。