我朋友，29歲，smart……只限思想方面。
點解話佢只限思想方面smart？因為佢所有嘢都係諗多過做。
剛剛過去嘅weekend同呢位朋友食飯，一如以往，我又聽到佢話轉工，佢好唔滿意人工同埋環境，不過講咗10萬次都係未轉，對前途好迷惘，佢話怕遇到嘅同事會更差，我話你唔試又點知？但係佢都係繼續諗，繼續諗，然後繼續怨，繼續怨……
佢話想讀日文，粗略估計我聽咗3年，初班都未報，我問佢等乜？佢話擔心學咗之後用唔着，嘥咗啲錢。
由我未有《辦公室日報》，佢已經話要開個page，結果我開咗做到而家，佢都仲停留喺一個階段：「我都想學你咁開個page。」一想就想咗兩年，page名同主題都不斷轉變，仍然未見到起點。
我叫佢改，同時徵求咗佢同意，將呢個故事分享出嚟，只為帶出一個訊息：
「仍然有能力去求變嘅時候，仍然有精力去搏殺嘅年紀，千祈唔好諗得太多，做得太少，時間係最殘忍嘅小偷，佢的確畀過機會你，但從來唔會為任何人停留。」
唔止我朋友，我見到有唔少讀者都留言講過想開page，大家有冇興趣聽下我由開page到而家嘅心路歷程同埋遇過咩困難？
我知道有啲朋友仔純粹想喺度睇到職場資訊，未必會想了解真實中嘅我，包括點樣營運個page同埋私生活，所以我唔迫十萬人陪我發癲，好似技安……呀唔係，係胖虎迫人聽佢唱歌咁，公事睇辦公室日報，公事以外可以睇 聶瞳 Page