《診所低能奇觀》專欄 拐帶睇醫生

有日一位阿姨帶住個小朋友嚟到診所。

佢行埋嚟登記處問:「我個孫唔知有冇喺度睇過,你可唔可以幫我睇吓有冇呀?」

我:「俾個電話號碼我,我CHECK CHECK先呀」

佢:「應該係佢阿媽電話號碼嚟」

佢問小朋友:「你記唔記得你媽電話幾號呀?」

小朋友擰擰頭,阿姨拎自己部電話出嚟,打電話問:「喂?阿仔呀?阿乜電話幾多號呀?」

佢再同電話講:「我帶咗佢(孫仔)嚟睇醫生呀,你老婆唔知㗎,你唔好話佢知呀」

咁搞笑嘅?睇醫生都要暪住個媽媽?

佢同我講:「XXXX-XXXX,你睇吓係咪呢個?」

我搵到紀錄:「小朋友名係咪乜乜乜呀?」

佢:「係呀」

佢再同電話講:「有啦有啦,你唔好同你老婆講呀」

收線後,登記埋,佢哋兩個坐低等睇醫生。

到佢哋入咗房一陣後,診所門突然俾人好大力咁推開,一位小姐未入到嚟已經好大聲問:「我個仔係咪喺度呀?」

我:「請問咩事呀小姐?」

佢望望四周:「我個仔呢?」

醫生房門打開,阿姨同小朋友行出嚟。

小姐即刻捉住個小朋友,同阿姨講:「你做咩帶走我個仔呀?」

阿姨:「你瞓緊嘛,我咪…」

小姐大聲喝:「我個仔要睇醫生我識自己帶佢嚟睇!唔駛你呀!我報警告你拐帶呀!」

冷靜啲冷靜啲。

阿姨:「我係佢阿嫲嚟呀,你唔好咁樣嚇親我個孫呀」

小姐望住我同我講:「姑娘!同我報警!」

我:「一場誤會啫…」

小姐:「誤會?冇誤會呀!佢成日想搶走我個仔㗎!」

阿姨:「返屋企先再講啦」

小姐『嘖』咗一聲,再講:「我而家就去報警!」,然後捉住小朋友離開診所。

留低阿姨自己一個喺度,阿姨同我講:「啲藥我都係唔要啦,廢事一陣話我落毒害佢個仔…」

連阿姨都走埋。

…醫生,今次唔係我趕客呀。

👉🏻即睇其他診所低能奇觀嘅文章

我叫珍寶豬,係一個診所助護,只係一個無能無專業資格無牌照的大嬸。做過晒港九新界中西醫診所,見盡低能白痴暴力感動可悲可笑之人生百態。亦歡迎各在職離職姑娘護士醫生分享診所醫院內的奇趣事窩心事爆笑事,但請勿公開任何病人個人資料或病人相片。看此PAGE時請勿對號入座,信則有,不信則無。

error: