上了岸就別提海裡的事 完結篇
前文提要，Dada接受Nelson提出嘅「Offer」，兩人正式成為情侶，Dada初時感覺不大，純粹為未來著想，希望及早離開PTGF行業，但拍拖後慢慢欣賞Nelson，愈嚟愈鍾意對方，兩人亦把臂同遊日本。
同Nelson去旅行，我自己都唱咗Yen，唔想下下攤大手板問人拎，不過佢好好，一早就唱定畀我，喺機場夾硬塞落嚟。
你估下去到大阪之後，我第一樣買嘅係乜？唔係衫褲鞋襪，亦唔係化妝品，而係M巾。
我係經期超唔準嘅人，加上今次旅行要就Nelson假期，根本計唔到咁多，只係估唔到擺低行李走入心齋橋商店街冇耐，「親戚」就突然到訪，趁住Nelson睇衫，我去咗買M巾。
夜晚返酒店沖完涼，我哋好似情侶咁攬攬錫錫，當佢想咩咩嗰陣，我即刻截住：「嚟M呀，第一日。」
Nelson：「嚟M？」
我：「係呀，頭先你去買衫，我話自己行陣，其實係去咗買M巾。」
Nelson面色忽然變晒：「有冇咁橋呀？你一早唔講？」
我：「你覺得我唔畀你搞？你自己摸下，再唔信就入廁所睇下個垃圾筒。」我捉住佢隻手放落下體，畀佢feel下內褲入面厚厚嘅感覺。
雖然知道佢會失望，但冇諗過佢會嬲。
本來佢嬲，我都嬲，不過Nelson第二三日同我出街嗰陣，又同平時一樣，都係對我咁好，都係咁細心同體貼，特別喺京都著和服影相嘅時候，女仔要換衫要set頭搞好耐，佢一啲都冇投訴，仲行勻嗰一帶不斷幫我影相，加上對木屐著得唔舒服，佢又陪我龜速咁行，全程好照顧我。
嚟到大阪最後一夜，Nelson提出要求：「可唔可以幫我用口？」
其實我唔抗拒幫佢用口，我只係介意大家嘅第一次係用口，但我都答應咗，完事後，佢講咗句嘢令我有hard feeling：「點解你咁熟嘅？因為好多客要求齋用口？」
心裡面難受，但係全程旅行都算愉快，除咗第一晚佢知我嚟M同埋提出要我用口，所以我扮冇事答佢：「唔係呀，冇客要求齋用口。」
Nelson：「冇？我記得你價目表有個plan係BJ，仲括住環保吹。」
我：「都話冇咯，有呢個plan唔代表有人揀㗎嘛。」卒之都係衰收尾，忍唔住發咗脾氣。
嬲咗一晚，起身check out去機場，佢又對我好好，一切回復正常。之後拍拖嘅日子，呢個循環不斷發生，唔係做嗰樣嘢嘅時候，我哋兩個係好甜蜜，而且交流極多，佢會同我講好多遠景，講好多計劃，講好多佢公司嘅事，我亦會同佢分享屋企嘢，讀書嘢，同埋自己後來做part time sales嘅工作嘢，我哋同一般情侶無異，甚至乎，Nelson係細心過我以前認真拍拖嘅所有男朋友。
喺性方面，偶爾佢會提出一啲要求，例如玩唔同玩具，要我著唔同嘅衫同制服，我唔算好反感，但唔係太鍾意，因為Nelson畀咗一種好強烈嘅感覺我～～～以前啲客要我點就點，而家做我男朋友，唔係有少少要求都唔得呀？
唔太過份的話，我盡量滿足，何況我係真心鍾意呢個人，憧憬同佢有一個家。
Nelson對我無微不至，加上雙方家人推波助瀾慫恿結婚，Nelson同我終於坐低討論呢個問題，雖然酒席、婚紗相、置業…等等嘅事項只係構思同格價階段，但我承認過程係開心嘅。
每一次我哋咩咩，Nelson都會有意無意提起以前嘅事，例如有一次：「你話遇過一個客好大，咁我大啲，定佢大啲？係咪同我冇感覺？」
我：「可唔可以唔好再提呀？都過咗去啦！」
好後悔以前同佢講呢啲經歷，因為當時我冇諗過大家會發展為情侶。
Nelson：「結婚之前，我想你坦白，之後唔會提，因為我唔想你做咗我老婆先再問，我寧願一次過知道晒，其實仲有啲咩奇怪客？」
我：「真係冇喇，個個都變態咩？」
Nelson：「點會冇呀？正正常常唔使搵PTGF啦！嗰啲男人點會正常？」
我：「先生，聽講你都係搵PTGF先識到我。」
Nelson：「點同啫，我嗰陣都冇約你去酒店，點解淨係想搞你嗰啲人，你就咩都同佢哋做，我真心對你好，你就樣樣都有保留吖？」
我：「幾時有保留呀？唔好將自己同嗰啲人比較啦！」
每一次我哋搞嘢都係咁，Nelson有種心態係，以前啲男人對我做過嘅嘢，佢全部都要做返晒，而其他男人冇試過嘅嘢，佢要我將第一次奉獻出嚟，至於係乜嘢「第一次」，我唔想講喇，亦唔可以接受，就算係一個豪放女，都會有自己嘅底線，其實我唔係咁豪放，當時做呢行有自己嘅原因，我唔enjoy㗎！
有一次佢又提出同我發生某啲「第一次」，我唔肯，大家喺張床度赤裸全身鬧大交，佢冇氹我，我擰埋一邊喊，喊完之後，Nelson同我講對唔住：「以後唔再提以前。」
我：「冇用㗎，你講過好多次，但每次搞嘢你都提返。」
Nelson：「因為我無法想像自己女朋友以前同陌生人做，控制唔到自己嘅妒忌心。」
我：「都過咗去，點解仲要提？我之前係咁啫，同你一齊之後都冇啦！」
Nelson：「之後冇，唔代表冇發生過。」佢已經鑽緊牛角尖。
我：「你咁介意，當時唔應該同我拍拖，唔應該同我開始。」
Nelson：「因為當時我未諗過大家會嚟到結婚呢一步，你知唔知我好愛你？」
我又再爆喊，眼淚令到視線變得模糊：「其實我都好愛你，好後悔做過呢行，但我冇做過呢行，我又識唔到你，而家點算好呀？」
我哋兩個就咁樣喺張床攬住喊，我提議：「不如分手。」
Nelson不置可否。
唔記得嗰晚係點樣收拾殘局，只記得Nelson第二日若無其事再搵我出街，但我唔出。
之後幾日，Nelson主動想和好如初，不過我決心劃清界線，甚至開咗個新嘅銀行戶口，將舊嘅戶口取消，因為我唔想再收Nelson每個月嘅錢。
大家有keep住聯絡，我會接佢電話，會覆佢msg，但唔會出嚟，佢亦有提出一切照舊，而我知其實冇可能，佢心裡面條刺唔會消失。
好多人覺得上咗岸即係大富大貴，以後唔使撈，但我覺得唔係，只要唔再喺苦海掙扎，唔使再顛沛流離去生活，已經算係上咗岸，所以我直至呢一刻都好多謝Nelson，如果當時佢冇出現，唔知我會變成點，亦唔知再會遇到咩人，或者而家仲做緊PTGF安於現狀。
後來我冇讀書喇，全職做Sales，喺一個都幾出名嘅品牌做門市Sales，平均一個月底薪連佣金都有2萬幾蚊人工，有時會超過三萬，疫情後先至少咗。我公司係行公佣，所以我同舖頭幾個同事感情好好，有一班新嘅朋友。
同Nelson分開得乾乾淨淨，唔知佢而家點呢？唔知世伯鍾唔鍾意佢下一任女友呢？我好想Nelson同佢屋企人都幸福。
我自己未拍拖，因為Sales份工時間好長，根本識唔到人，舖頭有個女同事都係靠交友App識到男朋友，不過我唔想再喺網上識人喇，隨緣啦，一個人有一個人嘅開心同自在。
未來嘅嘢冇人知，但有一樣嘢可以好肯定，就係我唔會向下一任男友或者將來嘅老公透露以前嘅事，呢段過去連我都想忘記，要對方記住我嘅經歷其實係好殘忍，所以上咗岸，就唔好再提海裡面嘅事。
有兩樣嘢成日都會喺我腦海中出現，其中一樣係過往同Nelson相處嘅點滴，另一樣係一首舊歌，冇earphone都會喺個腦哼起：
如何承受這好奇，答案大概似剃刀鋒利，願赤裸相對時，能夠不傷你。
最後一次用Dada呢個名，給你，留喺度，唔帶走。
上了岸就別提海裡的事 1
👉 https://hkofficedaily.com/?p=15429
上了岸就別提海裡的事 2
👉 https://hkofficedaily.com/?p=15439
上了岸就別提海裡的事 3
👉 https://hkofficedaily.com/?p=15472
上了岸就別提海裡的事 4
👉 https://hkofficedaily.com/?p=15497