上了岸就別提海裡的事 4：前文提要，Dada完成三日工作，以為就咁收工，但係Nelson爸爸想Dada陪佢睇醫生，結果呢隻job要「加鐘」。與此同時，Nelson提出「轉正」，希望同Dada正式發展為情侶關係。
面對Nelson突如其來示愛，我唔識得畀反應，腦海中太多問號：
你意思係包我？
真拍拖又好，包我又好，之後呢？我仲做唔做PTGF？
以後計錢定唔計錢？
真拍拖唔計錢？問你拎錢又好奇怪，咁我要搵工？
Nelson應該知我好多疑問：「之前你講過想讀書，不如我幫你畀學費，讀full time好唔好？讀書期間我畀每月15000蚊零用錢你，但你要應承我兩件事，第一，唔好再做呢行；第二，讀完書一定要搵返份正職，我呢15000蚊你當係津貼，直至你讀完為止。」
我：「Er……我諗諗先。」
諗諗先，係因為我對Nelson冇乜感覺，而佢亦唔係我喜歡嘅類型。
返去將呢件事同Elaine講，佢第一句劈頭就話：「On9！」
我：「你都覺得On9？其實我冇乜feel。」
Elaine：「Feel唔Feel呢啲我唔知啦！15000蚊一個月？包唔包埋搞嘢？咁佢日日無限Q又得呀？如果做到咁爛，你唔止搵15000啦！當你ML plan齊頭收2000一次，減嚟M嗰7日，2000乘23日都42000啦！」
我：「2000乘23係46000……」
Elaine：「是但啦！我識得有啲女仔，一日都唔止約一個客，有時星期六日大時大節走兩三場，仲有啲真係搵到老細，包一個月至少都幾皮啦！15000你叫佢食屎！」
我：「又唔係嘅，你知我唔會長做，之前想找保險條數同埋讀書啫，我更加唔想畀老細包啦，總要有個終點，喺TG搵客又要傾，出嚟次次唔同人又要驚，好攰㗎嘛！」
Elaine：「你話唔想畀老細包，人哋話畀錢你讀書同埋一個月15000蚊你又心郁郁，咪一樣係包，多餘！15000蚊你使乜跟老細？求其打份工都得啦！」
係，每月15000蚊打份工好過跟老細，但我最急切嗰兩樣嘢，Nelson會幫手搞掂嘛，而且心郁郁係因為我認識呢個人，佢令我安心，人係會對未知數有一份恐懼，我起碼知道Nelson底蘊吖。
Nelson冇迫我答覆，隔咗幾日佢先再搵我，因為上次應承同世伯去醫院，Nelson建議：「陪阿爸睇醫生就用你上次提議，出街plan，可能會食埋飯，唔好又500又700啦，難計，1000一個鐘好冇？我估都要兩三個鐘。」
我：「好呀！」
去醫院當日，世伯表面輕鬆，其實憂心忡忡，佢點咗Nelson去買水之後就同我講：「醫生話我個心唔好，我知條命唔長㗎喇，不過呢，如果見到你同Nelson結婚，我走都走得安樂。」
我：「世伯唔好咁講啦，你會身體健康，長命百歲㗎！」
Nelson阿爸：「自己知自己事，雖然你哋拍咗半年拖，叫你哋今年結婚係好快，但我知你係好女仔，驚Nelson留唔住你。」
我：「下，好多女仔好過我。」世伯，我同好女仔三個字完全唔掛勾。
Nelson阿爸：「你唔使介意出身問題㗎！」唔通佢知我係PTGF？
Nelson阿爸繼續講：「上次婆婆一定同你講咗啲咩，我見Nelson之後都冇出街，鬧交呀？你唔好嬲佢呀，佢阿婆嗰邊係咁，有錢人係麻煩啲。」哦，原來講緊呢單。
我：「傻啦，冇擺喺心呀。」
Nelson阿爸：「住深水埗有咩問題？生長喺咩家庭冇得揀，同埋你媽咪好叻呀！咁辛苦養大你，仲教得你咁好，上次阿婆佢哋咁講嘢你都冇發脾氣，我真係想Nelson娶到你，由下一代開始，你都可以有一個完整嘅家庭。」
唔知點解，我聽完呢句之後好想喊，因為我唔止係單親家庭，而家做緊嘅職業連自己都鄙視自己，你同我講「家庭」一件咁遠大嘅事？我當時最擔心嘅係，第二日有個客約咗ML plan，好驚又遇到啲變態客，唔一定要綁手綁腳滴蠟先叫變態，對上一次有個男人同我喺酒店搞嘢，佢話自己硬唔到，做做下要用下體拍打我大腿內側，拍咗成15分鐘，話咁樣先會覺得興奮，咁樣先可以做埋落去，嗰個場面真係好嘔心好尷尬，仲有一次，個客太大，搞到好痛，但我仲要強顏歡笑扮享受。
每日面對呢啲猥瑣場面，一個完整嘅家庭對我嚟講太遙不可及。
我：「多謝你世伯，我真係冇你想像中咁好。」
Nelson阿爸：「你本質係好，值得有幸福，第時再好好孝順你媽咪。」
世伯講嘅說話喺我心𥚃面不斷翻滾，喺醫院忙咗一個下晝，又到Nelson同我道別嘅時候。
Nelson：「阿爸要留院，可能下次又要麻煩你出嚟，今日畀咗你先，搞咗兩個幾鐘，畀3000你吖。」
我：「唔使啦，之前兩日啲利是加埋都幾千，由佢啦！」
Nelson：「你……唔想再出嚟？」
我：「唔係咁嘅意思，上次你講嘅嘢，仲算唔算數？」
Nelson：「上次？你指做我女朋友？你肯呀？真㗎？」
我同Nelson就係呢種情況下「正式拍拖」，冇浪漫情節，咁就開始咗，好似傾生意一樣。
不過第二日個客，我推咗喇。
Nelson隔日已經過咗啲錢畀我，搞掂晒保險條數仲有錢剩，開始搵課程去進修。
由於我中五畢業，想讀書亦唔容易，要先報啲銜接課程，好幾次都想放棄，但Nelson好熱心幫忙：「我堅持要你讀書，唔係因為有個學位叻啲，而係想你以後有選擇，唔使為咗錢去做自己唔想做嘅嘢。」
好多人以為女仔一定鍾意高大威猛靚仔或者富二代，但其實講靚，永遠有人靚過你，講有錢，亦永遠有人比你更富貴，只有內涵係無可取代，所以我開始鍾意呢個人，我開始愛上Nelson。
拍咗拖幾個月，我哋同普通情侶一樣拍拖睇戲食飯，佢仲見埋我媽咪，一切都順利發展，直至Nelson提出去旅行。
Nelson：「日本台灣韓國你揀，有冇話想去邊？」
我：「其實我未去過日本，不如去吖。」
Nelson：「好呀，但係東京我去過幾次，去大阪好唔好？順便過埋京都，想唔想著和服影相？」
我：「得咩？」
Nelson：「點解唔得？咁我返公司拎完假再同你一齊睇機票酒店。」
由於大家都係同屋企人住，我同Nelson去到嗰一刻仍然……未搞過嘢，諗落都覺得荒謬，我用PTGF身份認識佢，同一時間都認識好多人，其他男人第一次見面已經開房，反而對住眼前嘅Nelson，一個用心對我好嘅男人，我竟然未同佢咩咩過。
好可惜旅行嗰陣，有啲嘢唔係好順利，我同Nelson經歷咗一次考驗。
投稿讀者：Dada
上了岸就別提海裡的事 1 👉 https://hkofficedaily.com/?p=15429
上了岸就別提海裡的事 2 👉 https://hkofficedaily.com/?p=15439
上了岸就別提海裡的事 3 👉 https://hkofficedaily.com/?p=15472