趁假期繼續大掃除，搵返當年做記者既termination letter，公司傳執笠都傳咗幾次，次次都勸人自己舉手，我冇舉呀，就係等呢封信同呢個moment，賠多一個月吖嘛😂
呢行好得意，收到風隔離報館執笠，其他行家會聞風而至，捕喺你公司門口影相，當然會做埋訪問啦！不過唔可以怪同行，佢哋都係職責所在啫。聽過有同事畀其他報館影住佢捧紙皮箱，然後個同事話：「唔好影啦，大家行家，畀條生路行下啦！」對方又答：「得得得，唔影大頭，會打格。」🙈 我比較好彩（可能係唔好彩），報館拉閘結業當日，我去咗旅行，係同事同埋HR打畀我通知，呢封termination letter都係過後去返英皇拎（新報係英皇既）。
回顧做記者嘅日子，有開心，有唔開心，開心因為份工係自己興趣，同事又玩得埋，冇office人咁多心計，比較單純同真摯；唔開心係人工長期跑輸大市，而且報業式微唔係新鮮事，大家都轉戰網上，我嗰間就冇發展online業務（其實有但谷唔起囉🤦🏻♂️），而且規模細，經常一人開幾個筆名寫稿，扮晒有勁多專家同作者，似足而家經常見到嘅一個留言：
「少年，你太年輕喇，你以為真係有咁多人覆你msg？其實都係我一個人覆㗎咋，唔信我再換個account覆同樣嘅嘢畀你睇。」
一個人，扮幾個人，日寫幾千字稿，人工就嚟連fresh grad個表弟都多過我，7日大假，台灣都去唔到兩次，當你儲假又好，夾硬放又好，成個部門得咁少人，唔該你旅行都send稿返嚟，醫療同洗牙嗰啲福利就唔好諗啦，聽都未聽過，人哋報館有Shuttle Bus有Canteen，我哋只可以問句：「咩嚟㗎？」至於雙糧……從來都冇雙糧，亦冇商量……Bonus我有呀！最多一次好似唔知1500定2500，普遍係幾百蚊，咁加人工呢？再講我就喊㗎喇😭
最近市道唔好，可能你都收咗termination letter，可能你被減薪，可能你工作唔如意但受制於環境而動彈不得，可能份糧連生活都成問題，甚至明知呢份工係唔會長做，不過希望你唔好灰，唔好對人生失去盼望，以上嘅辛酸其實可以幫你搞清楚自己鍾意啲咩？擅長啲咩？想之後條路點行？
你亦都可以藉此了解自己最受唔住啲咩？最唔想做啲咩？甚至想成為一個點樣嘅人？
有時挫折同埋阻滯可以避免自己過份膨脹，冤枉路諗返轉頭未必真係咁冤枉，或者幫你繞過咗一啲懸崖峭壁都唔定，又或者，你已經喺過程中練出一身好本領。
將我以上嘅經歷給每一個你／妳。