我個下屬係有錢女，淨係知佢老豆做工程生意，呢啲唔係重點，因為佢有錢唔關我事，又唔會屈佢請食飯，大家都係正常同事咁相處，直至兩個月前公司cut budget，除咗會計部同人事部之外，所有department都要交一個人名（裁員），跟住我先發現人同人之間嘅差距可以爭咁遠。
有錢女做嘢一向鳩流流，但鳩處未算鳩，我條team有另一個男仔再差啲，加上遲到早退乜都齊，一早想炒㗎喇，裁佢根本對成個department零影響，點知有錢女收到風之後自己向我「舉手」，話自願做被裁嘅人。知你有錢，不過另一條害蟲更值得裁吖嘛！我得呢個機會名正言順郁個男仔㗎咋！
有錢女畀我嘅原因係，自己其實一直唔想做嘢，只係老豆話咁樣會變廢人，係咁迫佢返工……
我：「咁我都唔想做嘢，但係人總要生活吖嘛，我都知你唔愁生活，做住先啦，要cut人真係未輪到你呀！」
有錢女：「唔係呀，我而家條仔唔係香港人，呢一兩年都係Long D，好想辭咗份工去搵佢呀！如果你cut我，咁就攞正牌同我老豆講公司裁員，唔使畀佢煩。」
我：「阿女，生性啦！知你唔等錢用，不過用自己錢唔係爽過攤大手板問屋企人攞咩？咁大個人問老豆攞錢都要睇面色啦！你人工幾多呀？冇記錯都有2萬幾，呢度又唔係忙，做住先囉！下次再裁員一定炒你，ok？」
作為上司，同個下屬講啲咁嘅嘢都幾神奇，佢求我炒佢，我求佢畀我炒咗另一個先，麻煩跟隊。
有錢女：「我知，我直頭冇咗4萬幾添，但係無所謂喎！阿媽會照我㗎啦！」
我：「咩4萬幾？」
有錢女：「老豆一直迫我出去做嘢，阿媽知我唔鍾意，所以私下應承畀獎勵，總之我一直返工，阿媽每個月就會再畀返同人工一樣嘅錢我，我出幾多糧，阿媽畀多一份，最緊要唔好激親老豆喎！超！佢想我討好老豆之嘛！」
我：「唔明，我聽咗啲咩？即係你人工2萬咁計，阿媽為咗鼓勵你做嘢，又私底下塞多2萬畀你做獎勵，目的係唔好激死老豆，所以你個個月出4萬咁呀？」
有錢女：「係呀，我份糧2萬，阿媽私下畀多2萬，我份糧3萬，阿媽又會私下畀多3萬，老豆唔知㗎！不過我唔會搵到份3萬蚊嘅工啦！」
我：「唔係唔係，我想再搞清楚啲，咁如果你呢度唔做，舉例去做麥記，做7仔，兼職，幾千蚊人工呢？阿媽都私底下塞多幾千蚊畀你呀？」
有錢女：「原則上係咁，但老豆唔會畀我返麥記同7仔，鬧爆我都有份呀！佢成日話女仔應該返寫字樓工，唔好拋頭露面。」
頂你個肺呀！聽完又震驚，又傷心，又沮喪，大家都係人，大家都有老母生，點解我出糧要畀家用老母，你出糧係老母畀多份獎勵你呀？你上一世救咗成條村嘅人，今世投胎先抽到支靚籤呀？
聽完呢啲咁荒謬嘅事之後，我覺得自己好似被掏空一樣，我認自己唔抵得人哋咁好命，但個天可唔可以公平啲呀？
本來裁員就唔輪到有錢女，而家我更加唔會炒佢，2萬定4萬對佢嚟講都係糞土，出唔出糧佢都有慈母照住，冇工返根本不痛不癢，佢最痛苦係咩吖？係返工吖嘛！我決定替天行道，要你呢啲毫無貢獻嘅有錢女日日朝九晚六坐喺office，等住條仔喺外國偷食然後飛咗你啦！呢啲食飽飯等屎屙嘅有錢人係要受下教訓！
手起刀落，即刻交嗰位遲到早退男同事嘅名畀人事部先，搞掂！然後你知唔知發生咩事？有錢女照同我辭職呀！仆你個街！
我：「點解要咁做呢？你唔係話唔想逆老豆意，阿媽又個個月出雙糧畀你咩？」
有錢女：「無所謂啦，我真係好掛住條仔，想即刻飛過去呀！反正我已經同老豆講咗公司裁員，吹水話炒好多人，佢唔會知得咁詳細啦！最緊要唔好畀佢知係我自己辭職，唔好畀佢覺得公司淨係炒我一個，咁就冇嘢㗎喇，阿媽仲會繼續畀錢我。」
我等自己冷靜咗幾秒先，再嘗試作最後挽留：「但係真裁員有錢賠，你自己走冇錢賠喎！」
講完都覺得on9，佢咁與別不同，數百萬當係碎銀，點會介意……
有錢女：「唔使賠呀，我賠返畀你添呀！想做多一個禮拜就走，因為買咗機票喇！我會去Amsterdam join咗男朋友先，然後順住落去Belgium玩。」
你知唔知有錢女咁樣走，對我嘅影響好大，唔係冇得替天行道嘅問題，係我已經炒咗個男同事，而家有錢女再走埋，老細話當自然流失，公司cut緊budget唔會再加返人畀我，即係我條team少兩個人之餘，亦永久cut多個headcount，報應呀真係！
如果有錢女上一世救咗成條村，咁我上一世應該殺咗好多人，好想大聲講粗口呀！（完）