想升職遇樽頸 人工又被封頂

「好細個就聽龜兔賽跑嘅故事，覺得慢慢嚟都可以贏，咁大個人先明白真實係咁殘酷。」

嘩！咩料呀？朋友Mandy叫我出嚟飲嘢，無啦啦喺度霎時感動？使唔使播埋背景音樂襯返個mood？問多兩句先知佢錯失咗個晉升機會，輸畀另一位年資冇佢咁長嘅同事。

我：「咁唔關烏龜同兔仔事喎，關隻貓事，因為老貓燒鬚呀！上次你明明講到坐定粒六㗎，公司開咗個新嘅Finance Manager職位吖嘛，你有7年財務範疇經驗，論資排輩應該輪到你升，出咗咩意外呢？」

Mandy：「我都以為自己終於等到，明明係成個部門資歷最深嗰個，老細仲成日讚我，心諗呢個position肯定係囊中之物喇啩！點知上頭同我講candidates preferably hold professional qualification，結果畀一個入行得5年，但係有CPA資格嘅同事攞搶走。」

我：「咁你係咪好嬲個同事，劇情會講到你個角色開始黑化喇？」

Mandy：「仲講笑！我冇嬲，係唔明啫，我7年經驗喎！呢7年白過㗎？總之而家考慮緊轉工，係時候離開傷心地喇，冇得升唔止title不變，連帶人工都冇得變，我唔想渾渾噩噩就咁一世呀！」

我：「一場朋友，唔好怪我直接，你而家遇到人生同職場嘅樽頸位，轉公司其實係換湯不換藥，冇分別㗎！」

Mandy：「你係咪咁呀！心情唔好先嗌你飲嘢，安慰都冇句，下下打沉我。」