我喺一幢商業大廈做客戶服務主任，千祈唔好畀呢個職位名呃咗，實情只係做保安，工作範圍仲廣泛啲，因為朝早同埋食晏呢啲繁忙時間，我係要幫手撳埋電梯，所以大約認得晒喺度返工嘅人，如果係靚女就特別有印象添啦！
早排發現有個生面口嘅鬼佬嚟咗呢幢大廈返工，佢都幾好禮貌㗎，日頭會主動同人講good morning，對住我哋班客戶服務主任又講，對住啲清潔阿姐又講，不過有一次放工同佢打招呼嘅時候，個鬼佬無啦啦向住我話：「DLLM！」
好在當時仲有個阿叔同事（佢又係客戶服務主任）企隔籬，否則真係以為自己聽錯。
我：「你聽唔聽到個鬼佬X我老母？」
阿叔同事：「點會聽唔到呀！我諗緊佢X你老母定係X我老母咋！」
我：「好似X晒兩個喎，佢嘅視線望完我又望你。」
阿叔同事：「你係咪得罪咗佢呀？」
我：「邊有呀？」
阿叔同事：「佢今朝返工先同我『骨摩寧』咋喎，跟住全日都未遇過佢，放工走嚟X我老母？」
我同阿叔同事百思不得其解，加上我哋有時會轉工作崗位，所以之後幾日都冇機會見到鬼佬，已經冇特別再諗㗎喇，點知過多一個星期之後，鬼佬放工出電梯門見到我又講：「DLLM！」
由於上次畀佢X完，今次冇咁錯愕，好想問佢做乜要鬧我，不過我唔識點問，隔咗陣阿叔同事就走嚟同我講：「頭先個鬼佬又X我老母，痴線，都唔知咩事，一陣間同阿頭report咗先喇，可能個鬼佬想投訴。」
我：「喂，我都畀佢X完喎，好想問佢點解要咁呀，但我英文好差。」
阿叔同事：「下次你試試問佢why囉，why係解為甚麼吖嘛係咪？」
我：「我知，但係Why完之後呢？如果佢用英文答，我都係聽唔明㗎喎，定係我哋用返中文問呢？既然佢都用中文X我老母，我咪用中文問返佢點解要X我老母囉！」
同一晚，原來仲有另外兩位客戶服務主任畀呢個鬼佬X老母，咁即係點呀？逢人就X呀？
隔多幾日，我又喺放工時間撞到鬼佬，今次佢同兩個同事一齊，行過身邊嘅時候又向我講：「DLLM！」
喂！真係佛都有火，生出嚟畀你X㗎！本身想趁住鬼佬身邊有香港同事就問下咩事啦，點知佢兩個同事已經即場爆笑。
佢其中一個同事話：「唔好意思，唔好意思，佢講笑咋。」
佢另一位同事就一路笑一路向鬼佬解釋啲唔知咩，因為講英文我聽唔明。
我：「講笑？條鬼佬晚晚放工都X我老母喎，點講笑呀！有咩唔滿意咪出聲囉！」
佢同事：「件事係咁嘅，我哋教咗佢少少中文，不過就同佢開玩笑，我哋話DLLM即係cantonese嘅辛苦晒，又同佢講如果就咁向人say goodbye好普通，一般收工係會講辛苦晒，結果佢咪係咁同你講DLLM囉。」
呢個時候鬼佬先知道自己講錯嘢，一臉惶恐咁行埋我面前say sorry，連續講咗幾次，同時又講咗堆英文指住佢兩個同事，雖然唔識聽，但我估係解釋冇心X我老母，一直以嚟只係畀同事玩啦。
咁樣整蠱同事真係冇陰公呀？雖然我讀得書少，英文唔叻，不過都想像到一個外國人嚟香港生活冇朋友，人生路不熟，好需要當地人協助，你哋反而扭曲啲中文嘅意思，又教人講粗口當打招呼，玩都適可宜止吖，玩完就糾正返佢吖嘛！
將呢單嘢同返阿叔同事講，佢話：「哦，個鬼佬以為DLLM係辛苦晒咁解呀？唔怪得啦！祝佢好運，遲早出事。」
我：「因為會畀人打？」
阿叔同事：「梗係啦，佢喺呢幢大廈X老母，話晒我哋只係打工，試下出去外面同人講DLLM吖，得罪啲大佬真係打到佢殘廢，鬼佬啲同事好玩唔玩走嚟玩呢啲，害死人咩！」
咁又係喎，唔知鬼佬班同事仲「傳授」咗幾多粗口，希望佢自己查清楚先，唔好亂咁用，否則都幾危險。