搵咗工3個月算唔算耐呀？今次係我空窗期最長嘅一次，加上失業嗰幾個月成日畀屋企人囉唆，所以對我嚟講簡直係度日如年，算耐㗎喇，不過咁辛苦搵到份工，返咗兩個月又冇做喇，啱啱先畀老母鬧完，而家心情好複雜，反思緊自己係咪太衝動。
間公司雖然細啲，不過待遇同福利都正常，最頂唔順嘅只係老細，同其他人有啲唔同，我並非頂唔順老細畀嘅工作指標或者工作壓力，我係頂唔順佢嘅個人衛生情況，以下冇加鹽冇加醋，聽完你就會明。
返工嘅第一日，我老細已經放咗個好大聲嘅響屁～～～呠！
我最初冇諗過有人會喺office肆無忌憚放響屁，所以一度以為係辦公室裡面物件移動發出嘅聲音，不過隔籬位個女同事好快就掩住個鼻，仲講咗句：「妖，又放屁！好臭呀！」
吓！真係有人放屁？說時遲那時快，浸屎味已經飄到埋嚟，我即刻掩住嘴同鼻。
跟住後面就傳嚟老細把聲：「Sorry，噚晚食咗紫菜，我食親紫菜就係咁放屁，唔知點解會咁。」
好在我同老細嘅座位隔幾行，後面有啲同事坐得仲近，理論上聞得更應，然後又有一個女同事搭嘴：「喂，你啲屁草味嘅，唔似食咗紫菜喎，你食完草嚟呀？好臭呀，我出走廊呼吸新鮮空氣。」
喂，先唔計佢係唔係老細，咁大聲喺office放響屁仲完全冇唔好意思，一個二個同事講下笑就算㗎喇？
有時響屁，有時係無聲屁，總之次次都好臭，草味又有，煤氣味又有，黑松露味都有，咁樣已經好難頂㗎啦，個老細仲要朝九晚六不停撩鼻屎，好誇張？冇屈佢㗎，親眼睇住㗎！我每次擰轉頭，又或者行埋去佢個位，條友都係撩緊鼻屎㗎！
嗰次我要拎份文件過去，順便交代少少嘢，企喺佢張枱前面等，佢就一路睇份文件，一路撩住鼻屎，咁要簽名吖嘛，老細隻手點都要hold一hold然後再遞返畀我，大佬呀，撩完鼻屎再掂個file，我點接呀？
結果我要捉住file隻角拎走，再急急腳去廁所洗手，其實都㗰氣啦，夾住文件份file都用咗唔知幾多次，如果佢次次撩完鼻屎再掂，我拎住邊個位都係一樣啫！但係自此之後，我就買咗支消毒藥水返公司用，係差在未戴住手套做嘢啫。
老細行埋去我個位講嘢仲恐怖，佢會撩撩下又掂下我張枱，究竟係咪「敏」啲鼻屎落去呀？即場用消毒藥水清潔又好似唔畀面佢，咁但係我做嘢做得好唔安樂喎，根本成個office都充斥住老細撩完鼻屎再周圍摸周圍掂嘅痕跡。
形容下呢個老細先，佢應該40幾50歲，阿叔一名，佢個鼻哥窿真係好大，無意貶低任何人，老細個鼻哥窿好似一個叫吳毅將嘅演員，如果唔知邊個就試下google啦，我估吳毅將係天生，而老細就係撩得太多先會咁大。
初初入嚟做都唔敢出聲，做咗兩個星期之後我就嘗試問喇，因為有次大家開會，老細隻手係無間斷撩住鼻屎，最奇怪係啲同事無論男男女女全部視若無睹，開完會我捉住個女同事講：「老細分分秒秒都撩鼻屎㗎喎！」
女同事：「慣㗎啦，咪當睇唔到囉，唔係可以點啫！」
我：「你哋唔覺得核突㗎咩？」
女同事：「覺㗎，咁但係可以點呀？好似放屁咁，話過佢好多次啦，咪又係照放，話佢有用咩？」
我：「點忍受到呀？」
女同事：「佢又唔係我條仔。」
其實我意思係大家喺咁嘅工作環境之下，真係覺得冇問題同埋可以忍受咩？不過呢位女同事成個態度都好似慣咗同埋化咗咁樣，再問落去都冇用。
或者我接受程度比較低啦，真係唔慣個老細成日放屁同埋擰親過去都撩緊鼻屎，好唔衛生，我自己喺度做嘢都好擔心，結果我返咗兩個月左右就辭職，其實未搵到新工㗎，但我好想作嘔呀！
老細同埋同事冇追問我辭職嘅原因，相信佢哋明顯見到我唔融入，反而屋企人就係咁問，我如實講返件事出嚟，老母仲要覺得我唔啱。
老母：「你公主病呀？你老細鍾意撩鼻屎關你咩事呀？人人都撩鼻屎放屁㗎啦，你唔撩㗎？你老豆都係咁㗎啦，我咪忍咗佢幾十年，你咪又喺度住咗廿幾三十年，咁你冇離家出走？」
我：「點同呀？」
老母：「有咩唔同呀？」
我：「第一，嗰個係老豆，第二，你會撩鼻屎啫，會唔會鍾意睇人撩吖，我擰親過去佢都撩緊，開會又撩緊，仲會用撩過鼻屎嘅手遞文件畀我，換轉係你忍唔忍到呀？」
老母：「有糧出咪忍到囉，佢又唔係撩畀我食，自己洗手咪得囉，就算你老細唔係咁呀，大把人都係咁啦，差在你見唔見到啫，少少事又話辭職唔做，你咁樣點搵工呀？冇嘢做就算洗廁所都要忍㗎啦！」
我都費事同老母爭辯，無可否認，我有諗過自己係咪反應過敏，太過衝動，接受能力太低，不過唔辭職都辭咗啦，真係好核突好難共事吖嘛，人人尺度唔同，我有錯咩？