公司請Sales，我收到份CV覺得幾啱，所以就約咗個求職者上嚟，做過健身中心果然唔同啲，真人好高，又大隻，加上幾識得講嘢，甚至有少少口甜舌滑，對方話之前份工除咗幫客人入會，仲要處理好多文書工作，聽落唔錯，我哋營業部manager實鍾意啦！
「做過呢間健身中心呀？咁我真係要見下喎，你陪埋我一齊in吖！」我見完覺得ok就即刻去問營業部manager Hazel想唔想見下，佢似乎都好有興趣，放低晒手上嘅工作拉埋我直接做second in。
入到房之後由得佢兩個發揮，我專心喺隔籬做旁聽同埋輔助。
Hazel：「Hello Peter，你之前份工係教健身定係sell人入會㗎？」
「我主要係sell人入會，處理文件嘢同埋follow up，健身另外會有教練。」
Hazel：「你個外型都好似教練喎！」
「咁我自己都有玩下嘅，本身做開gym。」
Hazel：「但係我哋份工真係要出去搵客見客，同你之前健身中心嘅形式似乎唔同喎，你覺得自己可以勝任？」
「我對自己好有信心，而且健身中心嗰邊都係長期搵新客，例如遇到啲人猶疑緊入唔入會，我哋一樣要sell，所以應該同sales嘅性質好相似。」
Hazel：「我哋公司好chur，同你講嗰啲想做健身嘅客好唔同，以前你點sell人？介唔介意示範一下？」
「我會問個客仲考慮啲乜嘢，另外公司會周不時做啲package，咁咪offer畀佢囉，同埋會盡力說服個客簽長約，可以綁實佢。」
Hazel：「淨係sell入會夠㗎喇，你健身中心冇其他數要跑？」
「有！最緊要sell個客搵教練，因為入會費係有限數，搵教練就唔同，會針對返個客嘅弱點去sell佢join多啲堂，呢啲先至搵到錢，其實心大心細想做gym嘅人，講到尾都係想操靚個body啫，通常我會同佢哋講，畀咗錢就會勤力啲，你冇搵教練冇畀錢join啲堂一定會懶，同埋我下面都有條team要管人，我會捽同事數。」
聽到呢度都唔錯吖，起碼個求職者夠進取，但正當我以為Hazel實啱用嘅時候，氣氛就忽然變晒調。
Hazel：「講開又講，做開健身中心點解無啦啦搵我哋呢啲行街sales嘅？」
「因為之前疫情吖嘛，公司執咗好多舖，有段時間開唔到門冇新客，加上又多咗啲咩24小時健身中心呢，我好多同事都要出去搵嘢做轉行喇。」
Hazel：「咁你啲同事有冇迫啲客簽單㗎？困住佢哋疲勞轟炸？聽講你呢間健身中心仲會迫啲客借財仔買package㗎喎！」
「Er……我諗每一行都有害群之馬嘅……」
Hazel：「害群之馬？你頭先話下面條team要管人，又要捽其他人數，如果同事真係有不良銷售手法，你冇理由唔知㗎，你點捽數呀？」
「Er……我通常叫佢哋畀啲心機。」
Hazel：「你有冇試過用以上招數先？」
「都唔係話招唔招數嘅，講真吖，入會呀，簽約呀，搵教練另外買package呢啲，其實都係你情我願㗎啫，有時個客真係未諗清楚，咪同佢入房傾耐啲囉，佢有腳㗎嘛，冇得困住佢㗎，要走一樣可以走。」
Hazel：「咁陰質嘅事你都做得出嘅？自己要追數就唔使理人哋死活呀？」
「咁真係冇話陰唔陰質㗎喎，睇你點睇啫，我一定係要幫公司追數，又唔係拎住把槍迫對方簽單簽約，啱唔啱先？」個求職者嘅面部表情同埋情緒都有多重變化，由最初滿懷自信，理直氣壯，到後來心虛，再到最後就有少少忟憎。
Hazel：「如果你問我，咁就一定唔啱，搵食還搵食，都要有底線，你幫公司賺咗呢筆錢，知唔知對方要幾耐先還得晒，可能啲錢仲係對方辛辛苦苦儲返嚟。」
「咁做sales係咁㗎啦，唔通關心埋個客嘅經濟狀況呀？我唔覺得自己咁做有咩問題喎！」
Hazel：「你嘅問題咪就係覺得自己冇問題囉，我哋公司好講求形象同信譽，你呢啲銷售手法就算一時三刻搵到錢，之後返嚟嘅feedback一定差，做sales開單唔代表要威迫利誘，賣一個service或者賣一個product畀客，應該要win win先至啱，今日到此為止，有消息再通知你。」
跟住Hazel就起身離開間房，嗰位求職者個樣已經變晒，臨尾仲不忘同我講：「你呢個manager都幾怪㗎喎，做sales梗係睇盤數㗎啦，佢理得我點sell啫！」
其實Hazel唔怪，佢平時並唔係咁，見見下工動真火我都係第一次見，所以做完善後工作，我就去咗搵Hazel傾計，原來佢個妹幾年前曾經喺呢間健身中心畀sales呃，簽咗份6位數嘅合約，過程中曾經被sales困喺房，唔止疲勞轟炸，幾個sales仲車輪戰咁唔畀佢個妹走。
Hazel：「頭先嗰個求職者講就講得好輕鬆，係咁話唔會迫客簽單，其實遇過呢啲事嘅人就會知係咩感受。」
我：「咁你個妹最後點呀？」
Hazel：「嗰一年我去咗荷蘭training，當時完全唔知有件咁嘅事，後來返香港先知，個傻妹因為咁欠好多卡數，你知唔知佢還咗幾多年先至還得完？我做家姐睇到都心酸，結果幫佢一筆過清咗條數，佢而家仲每個月分期還緊畀我，以後唔敢提咩做gym喇。」
我：「咁都叫做告一段落吖，算啦，唔開心嘢唔好提，即係頭先個求職者你唔會揀㗎啦！」
Hazel：「唔會啦，係見你份CV咁啱由呢間健身中心出嚟，咪去睇下咩料囉，其實搵錢真係有好多方法，做sales都有好多手法，唔係你要搵錢就唔使理其他人死活嘅，做人做事唔好咁陰質，呢啲人我唔會請。」
後來我將呢件事同其他朋友分享，有部分人覺得Hazel做得唔啱，因為又要見又要奚落對方，同玩個求職者冇分別，不過有另一堆friend覺得Hazel做得好，可能人人嘅經歷唔同，所以聽完就有唔同嘅感受啦！