今日我終於追得返條數喇，開心之餘，亦都想分享呢單半年前發生嘅事，成日聽到一句說話叫做人心難測，呢次真係兜口兜面感受到，事緣半年前嘅某日，我收到個candidate嘅電話。
「Hey Joyce，有樣嘢想講，希望你唔好嬲，我去咗你介紹嗰間公司做，而家做咗一個月多啲喇。」我係headhunt，電話裡面呢個係我嘅candidate，佢打嚟講呢番說話其實幾震撼，因為嗰間公司明明話唔請，點解最後會請咗，仲做咗一個月多啲？
我：「點解會咁㗎？當日佢哋同我講唔會考慮，仲話你唔適合㗎喎，你自己contact間公司呀？咁唔啱規矩喎。」Headhunt幫個客（公司）請人，一定簽晒agreement，對方半年內（間間headhunt唔同）聘用我哋介紹嘅candidate就要畀介紹費。
「唔係我主動contact，係個HR私底下搵我㗎，佢哋話如果經headhunt要畀幾萬蚊，只要我唔講佢唔講，請咗都冇人知，仲叫我唔好update個LinkedIn就得，慳咗嘅介紹費斬開加落去份糧度畀我。」
我：「咁你都係唔啱喎，明知咁樣做係唔得㗎嘛！」
「唔通間公司有offer畀我都唔要咩，你試下企喺我立場諗吖，作為求職者梗係想要份工啦，我理得你哋背後有咩deal啫，最緊要係唔好影響到我。」
以邏輯嚟講，佢的確係冇錯，求職者都係想要份工啫，唔通關心埋我哋headhunt同個客之間嘅合約條款咩，不過道義同埋誠信方面就好有問題。
我：「你而家係良心發現所以同返我講？冇辦法喎，我真係要問返佢哋收錢，有合約條款㗎！」
「嗱，我就係想你追返佢哋收錢，千祈唔好唔追呀！追到天腳底都要追！」
因乜事個情節會咁反轉呢？原來呢位candidate返咗工一個月左右就畀間公司炒咗，理由係佢工作態度欠佳，佢同個部門主管交惡，互相睇對方唔順眼，最後個candidate收咗大信封，唔怪得佢會打嚟「自首」，仲強調想我追返啲錢啦！
我：「即係你背住我accept咗個offer，而家出問題又想借刀，搵我去追錢搞間公司，幫你出返啖氣，係咪咁呀？」
「又唔好講得咁難聽，佢哋私底下contact我同埋請我真係違約喎，而家反正都畀人炒，一拍兩散囉，求職者呢邊唔使負責任㗎嘛！你快啲追佢哋收錢啦！」
雖然我明知呢位candidate係搵我過橋，想用我嚟公報私仇，不過揸正嚟做的話，我點都要向呢個客追收返應得嘅介紹費，否則真係會「搞彎」成個行業。
即刻打畀個客，講返呢件事同埋促請佢哋找數，個HR開頭仲要唔認。
HR：「唔知你講咩喎！」
我：「真係唔知？個求職者連staff card同合約都影埋相send畀我喎？有晒證據，你想點處理吖？」
我唔係拋個HR，因為candidate都諗過佢哋唔認，所以同時將有關文件同埋證明影晒相send嚟，你感唔感受到candidate嘅怨氣呀？佢冇咗份工，勢要搞到呢間公司付出代價，當初想慳介紹費吖嘛，而家咪要佢哋嘔返出嚟囉，擺明兩邊都唔係善男信女。
HR：「畀返錢你哋都得，咁唔該你哋照返agreement咁樣，搵個replacement畀我，我哋承認咗請呢個candidate，即係合約有效啦，你哋headhunt都履行返個責任吖！」
仲要咁寸，好在我呢趟電話係錄晒音，講agreement吖嘛，我咪同你講囉！
我：「麻煩你睇清楚，寫到明我哋嘅guarantee period係4個星期，你早兩日炒人，我對過你哋同佢之間嘅contract，過咗4星期喇，我哋冇義務幫你搵replacement㗎喎！」
你自己蠱惑在先，完全違反合約精神，理虧都算喇，仲同我講條款？其實好多客都會遇到相似問題，一般嚟講我會酌情處理，就算合約講咗guarantee period得4星期，唔係差太遠我都好願意搵replacement，但呢個客我就唔會開綠燈喇。
HR：「你唔肯搵replacement畀我，咁我點解要畀錢你呀？傻㗎？」
我：「唔緊要，我有晒證據，加埋個candidate而家咁憎你公司，我相信如果有咩事要告上法庭，佢都好樂意出席嘅。」
HR：「你咪告囉，你呢份介紹費頂盡上到小額錢債。」
我：「唔緊要，我做返我嘅責任啫，上小額錢債又好，上勞工處又好，上法庭都好，我公司有法律團隊跟進㗎喇，一陣send返invoice畀你，麻煩找數，否則出律師信，係咁多。」
呢次通話喺極不愉快嘅氣氛下完結，佢哋亦都冇如期找數，但我公司有人專搞法律層面問題係事實，唔係靠嚇，所以最終真係出咗律師信，正所謂唔見棺材唔流眼淚，前前後後搞咗半年，今日收到錢喇。
呢件事上面，個candidate同埋間公司都好冇道義，如果人人係咁，headhunt或者好似地產經紀呢類行業就等於玩完，辛辛苦苦同你搵人搵客，一個屈尾十跨過中介私下聯絡，我哋都有付出㗎，錢就人人都想慳㗎啦，不過唔係咁樣囉！
我會用四個字形容，就係奸有奸輸，間公司冇正規地履行合約，結果得唔到保障，最後咪又要畀錢，仲教唆人哋唔好update LinkedIn咁「低莊」，作風好有問題，candidate走去accept offer都係一場賭博，最後做得唔開心不歡而散，某程度上算係情理之中。