上回提要：做Headhunt巧遇一位叫Anika嘅求職者，佢唔止靚女，而且仲談吐得體，畢業後幾份工都做唔長，後來自己做網店生意，算係一個小老闆，無奈生意額浮動，所以周不時會出嚟搵嘢做幫補。由於係自己公司嘅緣故，Anika有商業登記，有公司heading信紙，有公司印，Reference Check又識得搵朋友幫手扮上司，故此佢見工無往而不利，因為佢份CV會因應唔同嘅工作去話自己做開乜嘢position，剛剛就介紹咗4份工畀佢，包括Marketing, CS, Receptionist同埋一份行街Sales，4個客見完都話請。
Anika嘅選擇並唔意外，佢take咗Receptionist嘅offer，月薪$17,000，雖然冇雙糧冇花紅，但Anika完全唔care，因為冇諗過長做，佢睇中呢份工唔使跟太多嘢，只係接下電話同埋招呼Walk-in嘅客人，夠鐘可以即刻收工。
Anika返咗兩個星期已經開始抱怨：「唔掂呀，Receptionist要做少少文書嘢我理解，但佢哋拎成疉文件出嚟，原來呢個位要兼任埋Clerk，係咁入資料，想問下係咪要做夠一個月你先有佣收？」
「係，真係咁難做？如果你想走都冇辦法啦，我會幫佢哋搵replacement㗎喇。」
Anika：「咁又唔好，我都唔想你難做，橫掂返咗兩個禮拜啦，減埋星期六日，仲有一日紅日，我都係返多9日工啫，幫你頂埋佢。」
我都唔知應唔應該多謝佢，其實你夾硬做夠一個月先走，雖然我份佣照收，但係客嗰邊始終會詐型，只係經驗話我知Anika勉強留低都冇用。
最終Anika真係做夠一個月即閃，好在我有兩手準備，一早send咗另一個replacement畀客，所以人哋冇詐型不特止，仲覺得我有交帶，唔係收完佣就神仙，仲彈多兩隻job叫我搵，算係因禍得福啦！
過咗兩個月左右Justin同我講：「喂，我有份工要請Sales，指明要靚仔靚女，我想搵Anika試下。」
「唔好啦，一陣佢返一個月唔做，你咪又係煩。」
Justin：「咁一早知Anika個style係咁啦，而且我冇你咁有良心，總之做夠guarantee period我就唔會搵replacement，你估啲客又係好人咩，唔使對啲客咁好。」
Headhunt呢行有好多唔同嘅人，有種同事會幫求職者爭取最好待遇；有種同事就會企喺客人嗰邊幫手壓價；亦有種同事會將獵頭當做終身職業，無論同客或者求職者都保持良好關係，因為佢哋睇得好長遠；當然都有Justin呢種，只係睇短期嘅自身利益。
所以點解有啲人鍾意同獵頭打交道，但有啲人就好憎獵頭，一樣米養百樣人，睇你好唔好彩遇到一個負責任嘅Headhunt啦！其實每個行業都有好人同壞人，不能一概而論。
Justin同Anika直頭變咗「戰友」，成日彈工畀佢見，仲要見親都請，繼續保持100%命中率，果然係見工達人，有時Anika自己嘅網店生意好就唔睬Justin，不過短短兩年間，Justin淨係靠Anika都賺到唔少佣，雖然每份工都係做一個月，留多一日都唔會。
後來我有個客非常麻煩，畀任何CV佢都reject，就算有得見都唔會請，偏偏呢個又係公司嘅大客，阿姐落咗order一定要湊，所以我都好困擾。
Justin：「你呢個西客咩都唔啱，唔知自己想要乜，send CV去仲要畀佢鬧，不如你搵Anika見一見啦，應付下啫，好過冇candidate畀佢吖嘛！」
「呢份唔得啦，Senior position嚟㗎！Anika平時都係貪方便見埋啲萬幾二萬蚊嘅工。」
Justin：「Anika咁吹得，畀佢試下啦，Marketing嗰範佢實應付到。」
本身都冇考慮，但係Justin個死仔竟然私下同Anika講。
Anika：「喂，你係咪有份$40,000嘅Assistant Marketing Manager？我想做呀！」某日朝早Anika打畀我。
「你都識講係Assistant Manager啦，你唔得㗎喇！」
Anika：「我得㗎，你畀我試下啦！聽講有雙糧有花紅，仲要保證花紅有最少一個月人工。」
「你會做夠一年先算啦！」
Anika：「如果四皮嘢人工我會呀，近排網店生意好差，畀我試下先啦，或者人哋唔請呢！」
「呢間大公司嚟㗎，除咗要睇CV，仲要check payslip，你之前唔係搵開呢份人工，佢哋唔會開$40,000畀你。」
其實坊間好多公司會問求職者拎payslip，用以證明你填嘅last salary係真，當然你可以唔畀，但係唔畀亦都會冇咗個機會，求職者可以自行決定。
Anika：「我有自己出糧畀自己，銀行記錄齊晒，每個月1號我都會出$35,000落去戶口，少擔心啦！」
「嘩！又話每個月賺得萬幾兩萬蚊，但係你又出三萬幾畀自己？」
Anika：「左手交右手之嘛，啲錢都係我嘅，同埋我固定每個月出三萬幾蚊糧係有原因，因為要申請信用卡，信用卡平時用嚟入貨好重要，人工高咪批你個額大啲囉！」
犀利犀利，除咗係見工達人，仲係天才兒童。
估唔到Anika越級挑戰呢間大公司一樣過關，雖然前後去咗兩次interview，不過兩次返嚟嘅feedback都好好，連個西客都畀佢搞掂。
只係歷史不斷重演，返咗工差唔多一個月又收到Anika電話：「我想唔做喇，你收到佣未？」
「又唔做？之前你唔係話$40,000有雙糧有花紅一定唔止做一年咩？」
Anika：「你唔知㗎喇，個阿哥好衰㗎，畀勁多嘢我做，好辛苦呀！又大壓力，我捱唔住喇。」
「其實以你嘅學歷，外表，談吐舉止同埋英文，真係唔應該長期搵啲萬幾二萬蚊嘅工，我知你貪呢類工容易見容易請，但係同你一樣35歲嘅人，好多已經搵到前景同收入都唔錯嘅工作，唔通你想一世都好似炒散咁咩？」
Anika口裡說明白，但最終都係辭職，我畀個客鬧到狗血淋頭，呢個position到而家都仲未請返人。
其實個客咁難搞都畀Anika收服，證明佢真係好有親和力同埋天份，可惜對於工作唔夠耐性同埋韌力。
事隔一排，某日Justin好似發現新大陸咁：「喂，有個男版Anika，我今朝分別出兩個job ad，收到兩份CV，同一個人，但係職位唔同，佢應該又係in唔同嘅工就改之前嘅title，不過呢個好笑，28歲，一份係寫CEO，另一份就寫Clerk，唔通CEO真係傳說中嘅Check Email Officer？見唔見呀？」
「不如你見之前打去同佢傾啦，慳返大家時間，唔使特登約人上嚟。」
Justin：「都好。」
結果Justin打去同個男仔傾，聽講對答甩甩咳咳，上文又唔接下理，問之前嘅工作內容全部支吾以對，淨係知個男仔自己上網賣嘢，IG shop嗰種，拎咗個無限公司嘅BR，CV任佢改，好可惜一交流就見真章。
人人都可以開公司，無限公司BR幾百蚊，有限公司就二三千，印公司信封信紙有平有貴，整個公司印亦不過幾廿蚊，雖然見工係睇CV先，但臨場表現先係最重要，所以Anika真係獨一無二，唔知呢個見工達人而家點呢？希望佢嘅網店生意可以越做越好，否則去到四五十歲仍然用呢種方法不斷搵工，就算你份CV砌得幾靚都可能冇用，衷心祝福Anika搵到一條啱自己嘅路。（完）