35歲嘅Anika大學畢業後入咗間大公司，主要負責企業印刷解決方案嘅工作，不過返咗9個月就冇做，佢話太無聊喎，始終當時後生，唔知自己鍾意做啲乜都好正常，有時真係要做多幾份工比較下。
Anika睇落頂盡似30，靚靚女女外表斯文，加上英文OK談吐得體，性格亦外向，所以搵工對佢嚟講冇乜難度，當年佢離開嗰間大公司之後好快已經搵到新工，不過做咗兩個月又唔做，唔使兩個星期又再搵到，呢次仲短，做咗一個月都唔夠，總之冇一份做得長。
可能Anika都知道自己嘅性格鍾意無拘無束，所以後來開始咗「自僱生涯」，嗰陣佢喺ebay賣嘢，乜都賣一餐，衫又賣，電話殼又賣，Mon貼又賣，記得佢曾經咁講過：「其實我只不過將女人街嘅嘢擺上網，但真係有market，鬼佬好buy，買啲人主要來自歐美。」
好快佢就喺ebay成為其中一個best seller，扣除成本，平均月入有萬幾二萬，有時生意好甚至試過有三萬以上，不過Anika話paypal食水好深：「喺ebay賣嘢通常用paypal畀錢，成交手續費一筆，佢個匯率仲要特別低，1對7.7美金，佢轉換港幣就得1對7.5，呢度又畀paypal食一浸，後來咪索性自己開online store加個舖頭仔，拉ebay啲客出嚟，再做埋本地囉！」
Anika最初開網店係用Yahoo Small Business，後來都冇咗喇，跟住試過用Wix，而家又用Shopline，絕對係資深嘅賣家，只係同行競爭比佢剛畢業嗰陣多咗，畢竟成個世界都進入咗online shopping時代。
Anika：「以前香港人好少網購，除非淘寶，因為香港細，可以的話你都想去睇下件貨，摸下件貨，甚至係試上身先決定買唔買，而家唔同晒，香港都慣咗online shopping，你睇HKTVMall，買肉買生果都係上網撳個掣，普及晒喇！」
就係因為普及晒，以Online Store作為全職嘅Anika有感個餅太多人分，收入少咗，早兩年開始搵返工作，打算以一份full time加一份freelance嘅形式去做，而首先「發掘」到Anika嘅唔係我，係我同事Justin，忘記咗介紹，我做Recruitment Consultant，即係獵頭。
Justin：「有個candidate好搞笑，想約佢見下，明明之前apply Marketing，而家又apply CS，連resume都改埋，你睇下，同一間公司，同一個時段，job title唔同嘅。」
見到resume右上角張相係一個靚女：「車，你見個女仔靚，想見下人之嘛。」
呢個女仔就係Anika，因為我手上仲有另一隻job係receptionist，個客冇咩要求，淨係想要靚女，所以我就問Justin介唔介意到時畀我in埋。
Justin：「咁一齊in啦，唔好嘥candidate咁多時間。」
嗰陣見到Anika真人嘅感覺係，除咗好sweet之外，佢份人仲好好傾，其實我同Justin年紀都細過Anika，但係成個interview就好似同輩朋友傾偈一樣，我哋好老實咁問佢點解兩份resume嘅last position會唔同。
Anika：「間公司係我開，自己生意仔，咁我鍾意填自己做乜嘢position都得，因應我要見乜嘢工囉，咁當然啦，我唔會去apply醫生護士IT，因為呢啲我真係唔識，冇得呃，一般文職其實完全冇問題，嗰份Marketing嘅工作內容，同我平時宣傳自己網店嘅工作一樣，CS都係，我日日都要對客，Receptionist更加冇問題啦，因為我有樓上舖，成日要招呼啲人上嚟攞貨同埋換貨。」
其實……又合理喎。
Justin：「但係我介紹畀你呢兩份工都要Reference Check，佢哋真係會打畀你前上司。」
Anika：「冇問題呀，我個網店真係有商業登記，其實之前見工試過㗎喇，我會搵朋友或者家姐做我上司應付Reference Check，好小事。」
我：「你之前都係咁樣見工？但網店生意唔忙咩？」
Anika：「網店一時時啦，講真我都係呢排生意唔好先會搵工幫補下，之前都有你啲行家介紹工畀我，如果apply出面公司我係唔會咁樣send CV，不過我知道獵頭有好多consultant，所以先會Marketing又apply，CS又apply，而家你哋仲有份Receptionist，冇諗過你哋一齊見我啫，但係對獵頭坦白ok啦，都係你幫我，我幫你，出去見工我唔會話自己係老闆，因為人哋通常會唔請。」
Anika講得好啱，站於獵頭立場，最緊要見得成份工，你有工返，我有佣收，Win Win，不過最好做夠一個月啦，否則我哋就要搵Replacement㗎喇。
Justin：「我仲有份行街Sales，你想唔想見埋？」
Anika：「見埋囉！你將我last position改做Sales畀個客吖。」
你兩個都得㗎喇……
Anika嘅外型同談吐去見工已經有一定優勢，因為佢真係咩都識少少，就算有啲位明知佢係吹都有板有眼，例如Marketing個position咁，佢話自己會幫公司搞Facebook同IG，每日都會出post，仲試過搵KOL合作，直頭兼任埋類似網站小編嘅工作，而且resume任佢噏，佢話做過咩職位都得，話自己lead過十幾個下屬又得，鍾意扮係junior都冇問題，何況佢自己公司商業登記個名好中性，XXX Limited，所以Anika因應唔同工作話自己做唔同行業一樣得，一張BR，一疊有公司header嘅信紙，一個公司印，世界任佢行。
差啲唔記得講，由於resume佢鍾意寫乜就寫乜，之前就算中間出過去做其他工作，Anika都唔會list喺resume入面，變相望落去仲係一份工做咗好長時間，大家都知外面嘅公司係點㗎啦，見你咁穩定近年冇乜轉工，印象分自然大增。
最經典係咩？Total 介紹咗4份工畀Anika，4個客見完都話請佢，命中率高達100%，Marketing嗰份$19,000但辭職要兩個月通知，CS 得$16,000不過有雙糧，Receptionist $17,000乜都冇，行街Sales 底薪$16,000另外加佣，你估佢最後揀邊份？（未完待續）