「阿耀，唔怕老實同你講，我無兒無女，今年都62歲喇，過多幾年強積金都攞得，好話唔好聽，而家身體愈嚟愈差，仲可以搏幾多年吖，出面啲人我就信唔過㗎喇，你就唔同，我知你本性好，對工作要求又高，畀心機啦，我而家嘅王國，即係你將來嘅王國，第時將間公司交畀你。」
聽到老細同我講呢番說話嘅時候真係好滾動，佢平時已經分享好多經營公司嘅學問，而且為人好貼地，記得有一年同佢去廣州個廣交會，真係冇諗過貴為老細竟然唔住花園酒店，反而book咗旁邊嗰間叫「七天」嘅連鎖式旅館，佢話要識得量入為出，業務先可以走到最闊最遠。
毫無老細架子，日日都係食嗰啲廿幾蚊兩餸飯，我身邊好多朋友賺到幾個錢已經餐餐米芝蓮，老細話佢以前捱過窮，絕對唔會畀自己做一個暴發戶，白手興家從低做起嘅人，果然有非一般嘅閱歷，呢啲都好值得我學習。
可惜嘅係，我唔似老細孑然一身，兩年前結婚嘅我，而家已經係一子之父，就算廣告話養個小朋友要幾百萬可能太誇張，不過有咗BB之後真係一闊三大，原諒我冇辦法睇住呢間公司成長，因為Headhunt穿針引線之下，見咗一份月薪有35%增長嘅新工作，我覺得好抱歉，辜負咗老細嘅期望同栽培。
老細：「真係唔諗住留低？新公司嘅Offer好好咩？」
我：「都係，人工多咗35%，不過你唔好誤會，我唔係跳草裙舞扭計加薪，只係做咗爸爸之後開支好大，老婆又日日畀壓力我，不斷叫我轉工，兩公婆為咗呢件事嘈過好多次。」
老細：「好啦，阿耀，我真係當你親生仔一樣，走之前我同你跟埋個project，希望將我識嘅嘢盡量教晒畀你，公司大門永遠為你打開，你做得唔開心就返嚟啦！」
唉，咁好嘅老細邊度搵，其實佢就算加我一千幾百，我都可能會心軟留低，但係老細係以一種「唔想阻我發達」嘅心態去面對，臨走嗰個月唔單止冇將我投閒置散，仲十分倚重我，呢份恩情一世唔會忘記，所以最後嘅project真係赴湯蹈火都要做好佢。
當年未有疫情封城，一班同事為我餞行，個別走咗嘅舊同事都有出嚟，場面好熱鬧。
我：「可惜老細話有嘢做嚟唔到。」
同事A：「屌！咁大棚人，佢驚要埋單吖嘛，梗係有嘢做嚟唔到啦！」
我：「唔好咁衰啦，老細唔係咁嘅人。」
同事B：「佢唔係？咁呢個世界冇人係。」
已離職同事甲：「好撚老土㗎佢，早幾年同佢去廣交會，仆街住花園酒店……隔籬間七天賓館，好似周星馳去錯麗晶咁。」
我：「其實間七天唔太差吖，係細啲啫，都企理㗎！」
已離職同事乙：「條友雞蟲嚟㗎，花園酒店同七天附近好多企街，百零蚊有交易，嗰次我跟佢去，夜晚落便利店買煙買薯片，睇住老細帶個企街上房。」
同事C：「你唔報公安？拉柒佢吖嘛！」
已離職同事乙：「如果唔係佢見到我見到佢，我一早報咗啦！」
同事D：「唔好呀，一陣要畀錢公安放人，隨時問你出住先！」
同事A、B、C、D仲有已離職同事甲乙，係咁交流老細嘅縮骨行徑，我忍唔住要求證一件事。
我：「老細有冇話當你哋係親生仔？」
已離職同事甲：「有呀，上次我話加得$500人工咁少所以轉工，佢有同我講過，差啲忍唔住笑。」
同事A：「佢仲同我講，咩佢嘅王國，即係我將來嘅王國，我心諗咩料呀？查理斯王子呀？」
已離職同事乙：「其實係咪邊套電影嘅對白嚟㗎？唔知佢有冇同茶水間阿姐咁講呢？」
原來在座咁多位同事都聽過相同嘅說話，我太天真喇，畢竟呢份工係我出嚟社會之後第一份長工，個心雖然沉咗落去，但都唔可以比其他人知道自己咁傻，鬼話連篇都相信。
同事C：「老細一定有同你講啦阿耀，唔係信佢會畀間公司你呀？」
我：「冇冇冇，冇咁嘅事。」
同事C：「唔係問你有冇呀？問你係咪信呀？」
我：「痴線啦！我有冇咁幼稚呀？」
其實我就係咁幼稚，但係呢啲嘢經歷一次就夠，而家已經學精咗，我嘅好同埋心思只會留畀老婆同個仔，至於老細……以後只會講金，唔會再講心，傻仔唔可以做兩次。