「拍拖半年就講定第日結婚要比佢管數，仲叫我一齊開聯名戶口，早排大家成日爭論呢個問題，無日安寧，終於分咗手，其實我有一句說話差啲衝口而出，好在忍住，因為想講佢未夠班同我管數，但咁講好似有啲hurt人。」
朋友喺WhatsApp group分享感情事，佢同女友係friend搭friend認識，日常出街男方比晒錢，唔會AA，咁呢個朋友亦的確幾多嗜好，打機、波鞋、模型、相機，樣樣都啱，佢自己都承認經常買無謂嘢，所以女友就開聲要管數。
「人哋都係為你好啫，驚你洗大咗吖嘛！」啲朋友開始七嘴八舌比意見。
當事人：「但我冇洗大喎，從來都唔等錢洗，你知我份人㗎，莫講話同女友出街會比晒錢，就算同你哋食飯，我都成日請客㗎啦！」
咁又好似係，呢個朋友一直以嚟都係豪爽，對錢唔計較，印象中幾年前佢提及過人工，嗰時好似月入5萬幾。
我：「你而家人工幾多？介唔介意講下。」
當事人：「咪講過囉，轉咗一次工之後已經7萬啦，而家咪8萬鬆啲囉！」
8萬鬆啲係講緊月薪，呢個喺銀行內部做嘢嘅朋友好似仲有雙糧，花紅就唔清楚有冇，咁佢打機都係買下game幾嚿水一隻，波鞋耐唔耐買一兩對，相機雖然玩得貴，不過唔係每個月都買鏡頭換機，加上同屋企人住，唔賭錢冇不良嗜好，佢份糧又真係有資格買無謂嘢嘅。
當事人：「我咁諗好似好衰，女友做一般文職，佢月入$18,000，唔係睇唔起人，但我唔理解個邏輯，$18,000人工管一個$80,000人工？講得通咩？好喇，當我哋去開聯名戶口，你儲幾多？我儲幾多？當我儲佢3倍好未？咁有意思咩？我係成日買嘢，不過全部係有限錢，你估我份工8皮嘢冇壓力㗎咩？日日比人插比人捽，仲有銀行幾多山頭文化，呢啲嘢又冇人睇到㗎啫，買下game減壓你管咩啫？唔係大口氣，咁真係唔入肉吖嘛！」
冷靜啲先，唔使愈講愈激動嘅，我認識呢個朋友，明白佢心態上嘅矛盾同糾結，一方面覺得自己好衰，好似有啲階級觀念，話人哋月入$18,000未夠班管佢月入$80,000，而另一方面又真係過唔到心理關口，自己咪做Banking and Finance囉，8皮嘢一個月都反映咗好資深啦，要畀人調返轉管自己條數，感覺上本末倒置。
客觀咁講，我諗好多人阿媽都係全職主婦，好多年冇做嘢，而阿爸就撐起頭家甚至將成份糧比阿媽分配，其實道理係一樣，關鍵在於呢個女仔要管數同埋開聯名戶口嘅要求嚟得太早，雙方嘅感情未達到某個境界同埋地步，所以個男仔先至咁反感。
WhatsApp group裡面另一個朋友聽完我分析，自己再套落其他場景去理解：「哦，我明喇，即係兩個人拍拖，遲早都會搞嘢㗎啦，但你識咗幾日已經要對方著制服玩SM，咁咪早咗囉，咁咪嚇親人囉，係咪咁呀？」
是但你啦……