有咩慘過失業搵工仲要撞到變態佬？早排去咗一間公司interview，基本上一入房見到個男HR已經覺得唔對路，自我介紹都唔使，一嚟就指住我份resume問係咪英國畢業，都寫咗讀邊間啦！然後佢話自己都係，希望帶我返英國一轉……
變態佬：「London我好熟㗎！以前想退休先返去住，但係而家人人都講移民，搞到我想提早過去，其實我返London都搵到工，不如你同我一齊返去吖，我帶你周圍去玩。」初時唔知佢咩料，我就笑一笑冇答任何嘢。
可能笑都係太親切喇，條變態佬愈講愈起勁，講完英國，第二個話題都仲未講返呢份工，反而係約我食飯，嚴格嚟講都唔係約，而係叫我去食飯。
變態佬：「我知道有間西班牙餐廳好正，你一陣仲有冇工見吖？而家都4點幾，我哋傾多陣就差唔多收工，你等埋我囉，今晚同你去食，我有車，可以載埋你。」
我：「今晚約咗人呀，唔好意思。」諗返轉頭，真係唔應該同佢講唔好意思。
變態佬：「咁聽晚呢？」
我：「都……唔得閒。」
變態佬：「後晚吖，我大後晚都得喎！」佢又真係問得出，當時我已經好想走。
我：「不如我哋interview先。」
變態佬：「In乜鬼吖，我話請就請㗎啦，個Line Manager信晒我㗎，我講一句ok，佢畀晒我決定，呢度幾個department啲阿頭都係咁，你係咪對份工有興趣吖？我一陣講聲，你聽日即刻可以返工。」
信我啦，呢條友真係唔正常㗎！
我：「因為我都唔知份工具體係點樣，同埋福利都未知，我諗我會考慮下先。」
變態佬：「呢啲好小事啫，最緊要你鍾意，具體係點即係咩意思？你指工作內容？同個job ad差唔多㗎咋，我寫得嚴重咗，其實要求冇咁高，所以你一定做得掂，福利係講大假同花紅嗰啲？我哋呢度14日大假，不過我可以額外同你要到15日，花紅你放心啦，呢間公司一個月花紅走唔甩，係呢，你有冇男朋友呀？」
咩HR嚟㗎，員工幾多日大假可以個個唔同，由佢一個人話事㗎咩？
因為坐咗入房20分鐘，我已經唔耐煩同埋確定唔會做，所以冇回應佢問題，跟手話有另一份工趕住見，當時個變態佬都冇留難我，淨係臨尾遞咗張卡片叫我call佢。
變態佬：「如果你真係想做就同我講得㗎喇，虛位以待，最好今個星期內決定，咁我就唔in其他人，留返個position畀你，不過我最想你打嚟話同我食飯，就算唔食飯都得㗎，你有咩心事都可以同我傾，卡片有我手提電話號碼，WhatsApp都係呢個number，隨時搵我吖！」
邊個想同佢講心事呀？其實呢個變態佬唔係好大年紀，目測三十幾歲，外表望落係正常，但係行為就好唔正常，我梗係冇WhatsApp佢啦，點知佢同一晚竟然主動WhatsApp我，仲好明顯想用份工作為魚餌，以下係變態佬打字過嚟嘅msg內容：
「Virgin，我係Ryan，今日個HR，介唔介意我咁叫你？」因為我個英文名係Virginia，我唔係介意佢叫我Virgin，我係直頭介意佢經WhatsApp聯絡我。
我：「咩事？」
「冇呀，想問多你一次係咪想入嚟做？我同咗Line Manager講，冇問題㗎喇，你ok就ok！」
我：「唔考慮，我已經有新offer，thx！」
變態佬：「咁唔緊要，食飯呢？一齊食飯吖，做唔到同事都可以做個朋友，我見你今日填張form係single未結婚，嗱！你single嘅意思係咪冇男朋友先？如果你有男朋友，我都唔怕公平競爭㗎！其實我有車去邊都好方便，我可以揸到去你樓下等你，間西班牙餐廳真係好得㗎！」
我冇再覆第三句，亦都冇block佢，我就係想cap晒佢講嘅嘢，再聯絡佢公司，如果有更過份同騷擾嘅說話就直接報警，我份resume係搵工用，唔係畀你睇我個人資料然後約食飯用。
我選擇用最直接嘅方式投訴，第二日打去佢公司總機，同聽電話嘅receptionist大約講咗件事，再麻煩佢駁畀高層或者老闆，估唔到個receptionist又真係肯幫我駁，有個女人自稱係老闆（希望真係啦），佢有同我講sorry同埋答應會處理。
之後我冇再收條變態佬嘅msg，暫時都冇事，但近期返屋企都會提高警覺，唔多唔少有啲心理陰影，希望嚟緊interview唔好再遇到呢啲奇怪人。