因為有同事批咗移民，所以離開得比較急，公司趕住要搵佢嘅replacement返嚟交接工作，老細提議雙管齊下，先喺求職網登招聘廣告，同一時間搵獵頭斟斟，有需要就直接喺出面撬人，總之愈快愈好，嗱嗱聲填補返個空缺。
好記得喺求職網登招聘廣告嘅第三日，其中一份CV好match份工嘅要求，咁我就即刻打去想約個求職者上嚟interview，可惜朝早同晏晝先後打咗兩三次電話都冇人聽，留言冇覆，嘗試直接email對方亦都冇回應。
眼見距離嗰位移民同事要走嘅日子愈嚟愈近，最終都係要出絕招，就係落實叫獵頭幫幫手搵人，個headhunt好快手，我同佢講完之後唔夠兩個鐘已經彈咗份CV過嚟，熟口熟面嘅……咪係我收到佢CV，不過一直打去想約都搵唔到嗰位求職者？
我：「呢個Ruby Tang我都收到喎，打去冇人聽，email又唔回，都約唔到佢。」
Headhunt：「我有辦法啦！」
公司錢我當然冇所謂啦，但係呢單嘢因為比較急趕，所以我個HR Manager都有參與，佢知道咗之後就要親自打畀個headhunt，咁我都明嘅，呢個position人工3萬，如果要畀佣金獵頭公司，埋單幾萬蚊走唔甩。
HR Manager：「而家個求職者入邊個數先？其實我哋都收到佢嘅CV喎！」
Headhunt：「梗係入我哋數啦！你收到CV冇用㗎，你都搵唔到人，如果唔係我約，你點會in到佢呢？」
平心而論，個headhunt講呢句都唔係冇道理嘅，咁我哋真係約唔到吖嘛！
HR Manager雖然唔係好忿氣，明明我哋收到同一份CV，可以就咁約interview，而家竟然要經headhunt去進行，無啦啦要畀幾萬蚊埋單，但係呢個replacement實在太急喇，只可以講句：畀啦！冇得避㗎喇！
最終經headhunt約到個Ruby Tang嚟interview，點知face to face嘅時候又不似預期，張CV砌得好靚，傾落先發現好多嘢都冇solid嘅experience，甚至係唔識，事後我都有同HR Manager傾過：「會唔會係知道要畀錢headhunt之後，我哋要求高咗呢？」
HR Manager有相同疑惑：「我都問過自己，但真係唔關事，有啲嘢佢完全冇做過，根本講都講唔出，畀埋department head見，個department head都話唔適合，相信唔係我哋先入為主啦！」
最好笑係當我問呢位Ruby小姐，點解之前send CV嚟但又搵唔到佢，會唔會係填錯電話？佢又真係答得好老實喎！
Ruby：「個headhunt叫我唔好覆你哋，等佢安排。」
我：「下！但係你搵工喎，而家份工直接call你都唔覆，你等headhunt安排，如果我哋冇叫headhunt搵你上嚟，咁你咪白白錯失咗個interview嘅機會囉？」
Ruby：「哈哈，我又冇諗過呀，因為我經求職網站send完CV畀你哋之後，同日個headhunt又搵我，初時我以為係你哋，傾多幾句先知係agent，佢叫我唔好聽你哋電話，因為經佢介紹可以爭取到好啲嘅人工同埋待遇。」
講真，我哋個position 3萬蚊人工唔算多，不過你賺得3萬蚊都預計到係senior level，佢講嘢會唔會太唔經大腦呢？
因為我完全冇諗過headhunt搶人會咁樣同個求職者講，真係大開眼界，而Ruby呢番說話就直接擺咗個headhunt上枱，亦同時反映咗佢唔識得包裝同修飾，而且冇判斷能力，任人擺佈，同埋我哋聽完之後個心都唔好受啦，冇expect呢位求職者會咁樣答我。
諗返轉頭，雖然我哋係出咗招聘廣告之後先正式搵headhunt，不過因為當時好急，的確有同headhunt事先提過，估唔到佢同時搵到呢位求職者，仲使橫手叫人唔好直接嚟in，要經佢介紹……下次記得同個求職者夾口供吖嘛！
最終我哋喺招聘網站收到嘅CV裡面搵咗另一位求職者上嚟，雖然佢嘅履歷睇上去冇咁亮麗，但係interview嘅表現就好好，以為係退而求其次，點知係寶物尋歸底，所以請人唔好淨係睇CV就否定對方，要畀個機會求職者上嚟見下，對大家都公平啲。
後來個headhunt仲打嚟煩我，佢問係咪因為叫對方唔好覆我哋，為咗慳佣金先特登唔請Ruby？其實根本唔關事，我哋冇諗過幫老細慳錢，只係你個Ruby唔爭氣，不過下次使橫手真係唔該醒少少喇。