瘦田無人耕，耕開有人爭，年頭嗰陣搵咗工兩個幾月嘅我，之前唔係send CV冇回音，就係見完工冇下文，可能係否極泰來，又或者係個天可憐我，後來我同日見咗兩份工，竟然仲要同日畀晒offer，講真嗰句，有得揀梗係開心嘅。
幸福的煩惱係，A公司份糧多啲，返工近啲，office靚啲，不過interview嘅時候連續見晒HR同部門主管，feel到佢哋唔係咁nice，而且望到其他同事都好似黑口黑面咁，直覺話我知呢度做嘢壓力會幾大，同埋會唔多開心咁囉，個氣場你真係好易feel到。
然後到B公司，今次唔係連續見HR同主管，而係佢兩個一齊入房in，可能係想精簡程序同埋慳時間啦，呢兩個人就友善好多，interview過程亦都同我有講有笑，再加埋出入會議室嘅時候又係行經其他同事個位，聽到佢哋成班人笑聲笑聲滿載溫馨，工作環境明顯愉快好多。
不過我年紀唔細喇，人工、地點、前景，全部都係考慮一份工嘅因素，同埋A公司份糧唔係多一千幾百，而係多咗$2,500，加上有bonus，如果真係要計數，返A公司一定會比起B公司賺多最少一個月糧，呢度都爭幾遠㗎！
好喇，問題嚟喇，次序上我係朝早見A公司，下午見B公司，其實當我見緊B公司期間，電話已經震咗幾次（我interview轉咗震機擺喺袋），一離開B公司即刻跟住個missed call打返去，原來係A公司致電叫我過幾日返工。
B公司啱啱見完未有回音，何況態度親民可能係佢哋style，未必一定請我，所以無論從任何角度出發，我都冇理由推咗A公司嘅offer，嗰陣我失業咗兩個幾月喇，話多唔多，話少唔少，自己其實都好心急想搵到工。
喺電話同A公司講冇問題，會按照佢指定嘅日期返工，跟住我就去搵咗個同樣失緊業嘅friend食下午茶，因為當時我同佢都冇嘢做，邊個call邊個都會即刻出嚟。
Friend：「你而家唔係失業啦，已經有offer，真係羨慕你，我send CV出去完全冇回音，見都冇得見。」
我：「你都好快有offer啦，我計過呢兩個月send咗120幾份CV出去，唔開心嗰陣冇同你講啫，信我啦，你都好快會搵到嘢做……」
我嘅安慰說話都未講完，電話又響起，今次輪到B公司打嚟，由於我聽之前係唔知，所以喺毫無心理準備之下……
「你好，你頭先上嚟interview之後，我同Manager傾過都覺得好適合，想問你5號返工有冇問題？如果冇問題就9點鐘，你嚟到同receptionist講搵Cindy先，同你搞齊啲入職手續，至於人工同埋其他細節，頭先interview都同你傾咗，我會另外再send個email畀你confirm，你一陣收到email如果有問題就打返畀我吖！」
幸福來得太突然，A公司人工好，B公司就係人好，而且我心大心細得嚟仲要成個人亂晒，再加上之前受到失業折騰而有種「餓狗搶屎」咩工都想做嘅心態，嗰一刻我好不負責任咁回覆：「好，5號ok，多謝你哋！」
收咗線之後我同坐對面嘅friend講：「頭先晏晝見嗰間都請咗我，而家我有兩個offer，點算？」
Friend：「嘩！好唔公平呀個天，我都好努力搵工㗎！點解我一份都冇，讓一份畀我啦！」
我：「仆街！」
Friend：「講下啫，唔使鬧我仆街呀？」
我：「唔係呀！頭先應承咗B公司5號返工，唔記得咗A公司都係叫我5號返工呀！」
Friend：「咩呀？你唔係揀其中一份咩？你鍾意邊份多啲？」
我：「A公司前景同待遇好啲，B公司就工作氣氛同埋啲人好啲，兩份都有好有唔好。」
Friend：「世事就係冇完美㗎啦！」
我：「如果A公司有B公司嘅工作氣氛，咁就真係perfect喇！」
Friend：「不如你返咗A公司先，睇下咩環境，唔好推B公司，試一兩日已經知咩料啦，到時再決定繼續做A公司定係去 B公司囉！」
我：「都話兩間公司都叫我5號返工，點樣返咗A公司先呀？」
Friend：「好簡單啫！教埋你點講，B公司係第二選擇吖嘛係咪？咁你同B公司講，因為屋企有啲事要處理，但你係一個有責任心嘅人，唔想返咗幾日工就請假，咁倒不如遲多幾日先返，咁你就趁住喺A公司嗰幾日慢慢思考下，到時就有得比較啦！」
我：「話自己係一個有責任心嘅人嗰句，好似over咗喎！」
Friend：「唔使講到一模一樣嘅，總之你表達到個意思就得啦！」
我：「不過我仲係覺得好假，呢個藉口真係好咩？」
Friend：「點會唔好呀？毫無破綻喎！但係佢可能都估到你係搵藉口。」
冇錯，我最驚就係呢樣，結果我諗咗成晚，第二日鼓起最大勇氣打去B公司講想遲幾日先返工……
我：「Hello Cindy，唔好意思呀，我可唔可以遲多幾日先返？」
Cindy：「點解呀？」
我個腦一直諗起朋友教嗰番說話～～～屋企有啲事要處理，唔想返咗幾日工就請假，咁倒不如遲多幾日先返～～～但唔知點解我講唔出，因為真心覺得好假同埋唔work，結果我講咗……
我：「我……中咗……兩條線……」
Cindy：「下！幾時check㗎？即係你噚日嚟見工可能已經中咗？」
死喇，我講完都知後悔，呢個藉口真係衰過屋企有事。
最終嗰位Cindy雖然好慌張，但不忘叫我休息多啲，又冇講到係咪接納我遲啲先返工嘅提議，唉，我估都係冇下文啦，仲要返咗一日A公司已經知道唔適合自己，嗰度根本係西人集中營，啲人嘅語氣同態度差到呢！正所謂條路自己揀，仆街唔好喊，鬼叫我情急之下用咗「兩條線」做藉口同B公司講遲啲先返工咩！
硬住頭皮繼續返A公司嘅第3日，B公司嘅HR Cindy竟然打畀我，佢同我夾可唔可以月中返工，Oh My God，佢竟然肯等我，仲前事不計，冇怪我「中招」之後上佢公司見工，我即刻答應，仲好想同Cindy講其實我冇中招，可以即刻返，不過做戲點都要做全套，唔扮抖返十日八日就冇辦法圓謊。
後來我真係去咗B公司做，再知道我「報稱」中招之後，我間新公司幾乎癱瘓咁滯，佢哋成班同事即時work from home，又搵咗人上嚟消毒同清潔，聽講有個別同事怕惹到屋企人，仲特登book咗酒店出去住幾日🤦🏻♂️🤦🏻♂️🤦🏻♂️
好抱歉講咗呢個大話，特別係返咗B公司之後，發覺呢度啲人真係好好，雖然我唔會向佢哋坦白，不過一定會好畀心機做，內疚當然係其中一個因素啦，但係有班好同事，仲有可以同A公司對比過，更令我覺得自己要珍惜而家呢份工。