之前去一間公司interview，冇諗過會遇到自己嘅夢中情人，我唔敢講呢個HR好靚，但佢嘅外型同埋把聲都係我杯茶，肉肉型，唔係瘦妹，最怕係啲腳好似火柴咁幼嘅女仔，肥妹可塑性好高㗎，何況佢個樣仲好甜，簡直一笑傾城。
呢個HR開聲就更加不得了，唔係嗲，唔係倔，我都唔知應該點形容，如果真係做女朋友，平時有咩唔開心同埋煩惱只要聽一聽佢把聲，相信成個人嘅心情會即時好返，好想瘋狂同佢晚晚煲電話粥。
Interview嗰日我已經覺得自己好失禮，因為掛住望佢，好多問題都遲咗兩拍先答，有啲又答非所問，表現應該好差，但好肯定自己之前嘅經驗同學歷都符合公司要求，否則呢位HR都唔會叫我上嚟見工，我亦唔會有緣識到佢啦！
去到Interview尾聲嘅時候，佢問我點解會想入嚟呢間公司做。
我：「其實我都係就咁搵工，本來唔係特別話想去邊間公司做，但係而家識到你，我諗自己終於搵到原因喇，我真係好想好想入嚟做，想成為你嘅同事。」
或者我咁答好唐突，佢都呆咗一呆，不過一切都係出於真心，當時我面對心目中嘅女神如果老作其他藉口去兜，例如咩一向有留意你哋公司呀、一直係用家呀、覺得你哋個brand好好呀，反而會有一種好假嘅感覺，我唔想第一日認識佢就講大話。
「咁你仲有冇咩問題想問？」好明顯，佢畀我搞到有啲唔好意思，即刻轉話題。
我：「有呀，想問你喺度做咗幾耐？會唔會有辭職打算。」
佢又一陣猶豫：「我喺度做咗幾耐有咩關係？」
我：「因為我怕入咗嚟做之後你會走。」
我有留意到㗎，呢位HR聽完之後微微笑咗一下，或者佢當我傻傻地，但點都算引到佢笑吖，HR都唔易做㗎，一日要睇咁多份resume，又要見咁多人，相信工作壓力會好大，你估個個求職者都可以令到佢笑一笑放鬆下咩！
雖然HR例牌叫我返去等消息，但我知道呢句說話基本上係interview指定動作，始終佢係負責請人，決定權唔喺佢手上，所以就乖乖地離開靜待佳音，亦希望今次可以喺佢心目中留低深刻印象，份工對我唔係最重要，佢先係最重要。
等咗幾日完全冇消息，我自己都好心急，唔係心急份工唔請我，我係心急唔知幾時先再見到佢咋，坦白講當時我已經有另一個offer喇，不過對於呢位HR就念念不忘，當然啦，我都有接受咗另一個offer先，唔會畀自己失業嘅。
咁又過咗一個星期，我忍唔住直接打去問下個interview結果，HR話仲未見晒啲人，但如果兩個星期都冇feedback，咁就可以當係已經落選，聽到呢度我個心不禁下沉，如果以後都見唔返呢個HR點算呢？
我：「其實人工唔重要，我個expected salary可以減㗎，咁樣會唔會有利啲？」
「唔關事㗎，如果係適合就會請，你唔需要刻意減人工，我哋各方面都會考慮。」
我：「因為我真係好驚見唔返你，唔好介意我咁直接，嗰日interview我直情覺得你係天使，一入房好似識發光咁，可以同你做同事固然好，但如果你公司真係唔請我，或者……我哋可唔可以做朋友？嗰日in完之後，你送我出返房嗰個笑容，我到呢一刻仲記得好清楚。」
HR冇回應，佢只係重複如果有消息就通知我，過咗兩個星期就會當落選，容許我老實咁講句，若然間公司係請，我相信自己唔會咁急進，咪做下同事先囉，但係一直都冇回音，我怕連同事都冇得做，咁我同佢之間嘅關係就會斷，見唔返㗎喇！
我唔係咩變態佬，更加唔係痴漢，只係遇到心儀嘅女神想盡地一煲啫，努力爭取自己所愛都有錯咩？之後我仲打咗兩次電話去，好想將呢種心情同佢分享，不過佢冇聽，我相信都係做嘢行開咗，因為公司電話冇可能話唔聽就唔聽。
如果呢位HR直接講對我一啲好感都冇，咁我會用啲比較soft嘅方法去追佢，例如叫人送花上去，又或者得閒寄啲小禮物，希望佢喺每日繁忙嘅工作裡面都有啲驚喜，苦中一點甜，我唔係想咁煩㗎，不過好怕失去呢個人呀！愛一個人有罪咩，就算大家嘅身份係HR同求職者咁又點，返工只係人生一部分啫，點解我唔可以追佢？
投稿亦唔係為咗攞稿費，我更加想集思廣益，如果去interview見到HR係自己心儀對象，好想知道可以點做？我怕唔夠進取，佢會畀人追咗，太過進取，又會變成騷擾，真心想知道多啲人嘅意見，如果有做緊HR嘅女仔答我就更好。
如果冇follow辦公室日報IG，可能會miss咗呢篇稿，擺喺度方便大家睇：
《在日本遇到的三個中國人》
https://hkofficedaily.com/?p=22214