可能有啲讀者冇follow我IG，所以呢度又會重複一次《在日本遇到的三個中國人》嘅IG內容，想睇下除咗小池之外，另外兩位中國人係點樣認識，可以直接跳去下半部分。
嚟到日本之後仲未正式同大家分享我嘅生活，不如就由落機嗰一刻開始講啦好冇？反正抵達成田機場就已經有一單奇遇。
一早喺某網站book咗機場接載嘅車，只可揀車款，唔可以揀司機，嚟到之後係一位來自黑龍江嘅男人，全程都ok嘅，佢亦分享咗好多自己喺日本嘅經歷，例如住咗7年、剛剛喺上野買咗樓、老婆係點、佢嘅司機工作又係點等等。
講下講下就快到酒店，呢位叫小池嘅司機忽然問我：「你需要偉哥嗎？」
我：「誰是偉哥？」
小池：「那個藥，壯陽藥，你們香港不是叫偉哥嗎？」
個腦一時轉唔切，哦，偉哥唔係一個人，係壯陽藥，明喇明喇。
我：「我不需要……」
小池：「我跟這裡一間日本公司合作，生產了自己品牌的偉哥，你需要可以跟我拿。」
我：「好的好的。」咁猛？自己偉哥自己出產？
小池：「有沒有香港的女生介紹過來？我這裡有個群，都是俄羅斯和中國的女孩，如果有香港應該挺受歡迎的，香港的女生先辦個簽證，過來做一個月才回去，我們拿三十個巴，她們拿七十個巴，客戶不用擔心，我自己的群都有七千多人。」
又群又巴，即係……叫我做馬佚呀？
我：「沒有……」
小池：「沒關係，你要不要試一下俄羅斯？我先帶你去食麻辣燙，再帶你去其他地方玩，我跟你說，遊客找女孩子不要去新宿，歌舞伎町都騙人的。」
我：「我不是遊客，我來做生意的。」
小池：「做生意好呀，要偉哥嗎？」
……
第二個遇到嘅中國人叫小張，因為我嚟到嘅第二日就要去開電話卡，否則冇日本電話號碼就好多嘢都搞唔到，呢度最常見就係SoftBank同Y!mobile，呢兩間公司嘅關係我就唔多解釋喇，總之佢哋就梗有一間喺左近，分店遠多於大家都聽過嘅Docomo同au，咁我又冇乜所謂嘅，最緊要方便，反正細佬都用緊Y!mobile，咁啱路過一間就入去搞啦！
招呼我嘅人就係小張，事前冇預約，亦冇得揀由邊位員工幫手，排到係邊個就邊個啦！其實搞開台手續嘅時候，小張已經sell好多嘢，申請PayPay卡又關佢事，裝隻鑊睇波又關佢事，連申請一張叫My Number Card嘅嘢都關佢事。
搞到一半嘅時候小張仲同我講：「幫幫忙，我的壓力很大，公司要一個銷售額，暫時還不到，你要買iPhone嗎？」
我：「我的iPhone是最新的（當時仲未出iPhone14），而且是Pro Max。」
小張：「那你看球賽嗎？可以幫幫我安裝，公司給我的壓力很大。」
其實我睇波嘅，不過日本唔同香港，呢度啲波係拆散晒，例如英超係由一個台播，意甲法甲德甲又係另一個台播，而小張公司所播嘅足球賽事淨係有德甲，一來我少睇德甲，二來佢哋係要喺露台裝隻鑊，英超都同你諗諗，德甲就唔需要喇。
因為一路開台一路比小張sell嘢，所以搞咗好耐，後尾細佬同佢老婆都嚟埋，小張又用好慘嘅態度同我講：「你的朋友要開電話嗎？他們要PayPay卡嗎？有My Number Card嗎？幫幫忙。」
我：「他們住這裡，已經有了，不用，謝謝。」
真心覺得當日好似去咗傳銷畀人禁錮一樣，不過我除咗出電話number之外，其實仲幫襯埋佢裝寬頻，始終屋企都要上網，又再去搵盞浪費時間，所以就裝埋啦，只係冇咩事我都唔會踏入Y!mobile喇，抵受唔到呢種疲勞轟炸。
第三個遇到嘅中國人就喺ビックカメラ，即係Bic Camera，你當佢係豐澤百老匯啦，因為入住新屋有好多嘢要買，細佬已經講過排緊隊等畀錢嘅時候會有人sell你呢樣嗰樣，果然係咁！（後來我發現新宿先係，我去渋谷嗰間完全冇人sell）
先有一個日本人sell我裝部水機，好似office要訂水嗰隻，我真係冇興趣，其實用英文講嘢就輕鬆打發到佢走，因為佢哋真係好驚英文，點知轉頭又有一個叫小祖嘅人走嚟同我講普通話，不過佢唔係sell水機。
小池、小張、小祖呢啲名唔係我幫佢哋改，全部都係佢哋咁樣介紹自己，咁小祖又sell咩呢？原來又係Y!mobile……
新宿嗰間Bic Camera同Y!mobile有合作關係，駐場極多Y!mobile sales，咁唔緊要啦，我咪啱啱喺Y!mobile上咗台同埋裝咗寬頻囉，用緊你哋喇，唔使sell啦！
小祖：「這樣子，沒關係，你先終止服務，再幫我申請。」
喂咪住先，我已經用緊Y!mobile，你而家又sell我Y!mobile，然後叫我cut咗個Y!mobile，再重新申請一次Y!mobile，我有冇理解錯呀？
小祖：「是，是，就是這樣。」
我：「那不是搶了你同事的單？」
小祖：「哈哈，沒有影響的。」
我：「沒有影響，那我的電話會停嗎？寬頻會停嗎？」
小組：「停一天而已。」
有冇搞錯呀？雖然我唔係咁鍾意小張，但都冇可能為咗成全你開單，cut咗佢張單再重新搞過啩，我個電話同寬頻仲會停一停先再用得喎，你講出嚟唔會覺得唔好意思㗎咩？
佢哋就係我目前為止喺日本遇到嘅3位中國人，先唔講國籍，淨係講銷售手法就已經不敢恭維，後來細佬話佢兩年前去Bic Camera買嘢都有同樣遭遇，但係嗰次個sales就係日本人，又係叫佢cut咗合約再重新開，真係好想知道Y!mobile平時係點樣迫啲員工開單，究竟佢哋係一間點樣嘅公司。