見工前特登上網睇咗一堆教學，其中一條問題係我成日遇到，又唔知點應對嘅，就係當HR問你有冇嘢想問返佢嘅時候，其實我問乜先會加分呢？網上有人教可以問：「我入職頭3個月，最重要嘅工作係咩呢？」或者係問：「呢個職位可以有咩發展空間或者晉升前景？」唔……我覺得麻麻，除非份工志在必得啦，否則好似問早咗。
又有人教可以用訪問形式去問返HR，例如：「你會點樣形容公司嘅文化？」亦可以問：「公司對於未來五年嘅業務發展有咩期望？」聽落係好正路，不過就抽象啲囉，未來五年喎，對方就算肯請，我都冇把握自己會做5年啦！所以睇完啲教學都冇頭緒，直至我真係interview當日，HR真係問咗呢條問題。
HR：「今日差唔多喇，你有冇咩想問返我吖？」
結果我咁問：「請問幾時知道請定係唔請？因為我想預下大約等幾耐。」係咪好直接呀？
呢位HR真係好nice，佢個答案好明確：「過埋今個禮拜就會知，因為聽日有兩個嚟見，星期五就有一個。」
我：「Ok！」
HR：「不過就算唔請我都會話聲你知，你有冇其他工見緊吖？」
佢坦白，我都坦白：「聽日有一份要見。」
HR知我有其他interview之後，亦大方送上祝福：「好，咁Good luck喇！我呢邊無論係好消息定壞消息都會通知你，唔會要你無了期咁等。」
可能我見工數唔多，第一次interview係唔請都會收到通知，如果香港個個HR係咁就好喇！
然後星期五晏晝我真係收到電話，可惜係壞消息，個HR表示Manager揀咗另一位candidate，唔緊要啦！我覺得有交代已經算係咁。
不過搵工嘅嘢好神奇，一係冇人請，一係人人爭住請，因為再過多一個星期之後，呢位HR竟然call返我，佢問：「你搵到工未呀？我哋之前請咗個女仔，佢返咗幾日就話唔做，如果而家想叫你返工介唔介意？」
其實我唔介意執二攤，好可惜另外一份工已經請咗我。
我：「Sorry呀，我有offer喇，聽日就返新工，真係唔好意思！」
HR：「幾好喎！唔使唔好意思㗎！係我哋遲咗搵返你啫，希望你新工順利啦！」
未試過見一份工可以同HR有咁良好嘅溝通，通常都好對立㗎嘛！你唔請我，我就嬲你；我唔take個offer，佢又唔順氣，大部分係呢種劇情推進，所以好難得遇到一個會互相尊重，而且咁善良嘅HR！
原來良好溝通係幫我埋下伏筆，因為好不幸地，嗰份新工好似唔係太適合。
新工頭幾日完全冇人教我做嘢，誇張啲講仲要冇人同我講嘢，投閒置散嗌我睇公司年報同埋啲產品說明書，班同事仲要食lunch都冇叫我……
內心糾結咗一陣，結果我選擇做衰仔，試下打返畀嗰位善良HR睇下有冇機會執死雞……
我：「唔好意思呀，我係xxx，之前嚟見過工，你話有個女仔做幾日冇做，當時我真係有offer，但而家想問你哋請到人未？」
HR：「我記得你，未請到人呀，你係咪ok吖？係我就del咗個請人廣告！」
結果我即日辭咗份冇人理我嘅新工，再同日去搵呢位HR簽約，好在我唔怕樣衰肯打去咋！
簽約嗰陣我分享咗點解自己做做下覺得唔適合，個HR勁nice，佢冇踩嗰間公司，仲向我解釋人哋可能太忙先唔得閒分配工作。
而家我做得幾開心呀！唔知大家覺唔覺得，見工嘅時候如果HR好，雖然唔代表公司裡面其他人都好，但多少反映到呢間公司嘅文化，相反地，若然個HR勁西，其實份工都唔慌會好做，呢啲或者係大環境氣氛做成。
另外我都領略到少少嘢，就係有啲嘢唔好去得太盡，例如今次見工同個HR保持良好關係，其實係留咗條後路畀自己走位。（完）