「放工飲唔飲嘢？」同事Andy無端端想去Happy Hour，不過我拒絕咗，事關而家落bar要出示快測陰性證明，煩到hihi，普通食飯就冇所謂，一陣喺酒吧飲飲下又要畀人突擊檢查，真係咩心情都冇晒。
Andy突然撩飲嘢，原來係因為無聊睇fb嘅時候見到前女友結婚，佢哋係中學同學，所以好多common friends，有人參加完婚禮再post相，所以Andy就有少少感慨，但咁樣並唔代表佢餘情未了，因為佢同呢個ex已經分咗手10年有多。
其實我都唔記得Andy做咗幾多年喇，4年？定係5年呢？不過就好記得佢見工嗰陣係點，因為我作為Department Manager，真係第一次遇到呢種事同埋情況。
當時個interview已經去到尾聲，我覺得Andy都唔錯，所以直接問佢最快可以幾時返工，你知唔知條友講咩？
「我有案底，係咪冇問題？如果有問題都唔緊要，我想坦白講咗先。」
雖然我都有返咁上下年紀，可以大膽講句有咩風浪未見過，但確實冇諗過呢個求職者會突然自爆有案底，一來我冇問，二來嗰陣嘅氣氛已經同講明請佢冇分別，竟然喺重要關頭坦白到咁？
見到我唔識畀反應，Andy仲自己補充多句：「因為你哋張application form冇呢一欄，即係問人有冇案底呢一欄，所以我填唔到，又唔想你請咗我之後先知道。」
我：「哦，因為公司張application form咁多年都冇改動過。」
稍稍定下神，我先識得問Andy：「係咪之前見過其他工，有啲唔開心嘅事呀？」
「唔知算唔算呢，有間公司嘅application form又係冇呢一欄，佢哋請咗我，然後HR過咗幾日先畀一張類似聲明嘅嘢我簽，呢張聲明就問到有冇犯罪紀錄，我都唔知點解佢哋會分兩張form處理，所以最後就冇得做喇。」
我：「明白，介唔介意講下係咩案底？」
當時我心諗，如果你係強姦非禮，咁真係唔好意思喇，我都唔會請。
「衰傷人呀！」
聽Andy講，佢同嗰陣個女朋友係中學認識，跟住讀大學，再出嚟社會都仲係一齊，有次出街佢女朋友畀條飛仔撩，Andy護花心切，即場就同對方打起上嚟，互相打到爆晒缸，直至警察嚟到先停手。
「我以為自己出手都算係自衛，但原來唔係……」
我：「呢啲唔係要睇環境證供或者現場搵證人咩？」
「總之就留咗案底。」
最後我都有請Andy，首先佢具備我要求嘅能力，其次係我覺得佢份人都幾誠實，大家都係男人，年少氣盛呢啲嘢都明白嘅。
事實都證明咗我請Andy呢個決定係冇錯，呢幾年佢喺公司好幫得手，唔知係咪我嘅錯覺呢，或者真係經一事長一智，Andy反而係我部門裡面EQ最好嘅一個，無論啲客點無賴都好，佢依然會好冷靜咁處理，呢啲就係所謂嘅－－－成長。
我曾經八卦問過Andy係咪因為打交同案底嘅事同呢個女友分手，佢話唔係，我亦冇再追問。
由於大家已經共事多年，Andy都曾經同我透露好後悔，話自己後生嘅時候太衝動，因為佢未入嚟做之前就試過in大公司失敗，填form時剔咗有犯罪紀錄，人哋睇到之後問都唔問，即刻就終止咗面試叫佢返屋企等消息，當然仲有嗰單返咗幾日工先冇得做嘅經驗啦。
「真係覺得當年好傻，特別係見到佢婚禮啲相，做埋人哋老婆喇，唔知佢仲記唔記得以前有個男仔因為佢而留案底呢？」
我：「邊有得咁計吖，而且你而家喺度做都幾開心吖！」
唔識安慰人，不過點講都好啦，經歷嚟嘅。