同事拍拖唔關我事，不過影響到人就唔係咁講。公司有對情侶年紀都唔輕，男嘅叫Lawrence，32, 33歲左右，女嘅叫Momoko，都29歲㗎喇，佢兩個應該冇當過公司係做嘢嘅地方，好嘅時候就打情罵俏，唔好嘅時候就公然鬧交。
我就冇咁好彩，坐Momoko隔籬，中間隔住條僅僅容納到一個人行嘅走廊，每日我坐低之後望去右手邊都會見到一個屁股，冇錯就係Lawrence嘅屁股，因為佢喺office有一半時間都會走埋嚟同自己條女吹水打牙骹，返埋位用內線傾啦，mark到咁實，驚條女畀人搶咗咩！
人哋傾計關我咩事？因為我每次出出入入、斟水、拎copy，或者去廁所嘅時候，都要同Lawrence講聲唔該借借，條走廊位得一個正常人嘅闊度同距離咋，咁樣日日頂住條路真係好煩呀，其他同事都有同感，返埋位或者行出去好似多咗度人肉閘門一樣。
Lawrence同Momoko簡直係天生一對，佢兩個有一樣嘢好夾，雙方都係大醋埕，如果有女同事同Lawrence傾計，Momoko係會嬲，而其實有男同事同Momoko傾計呢，Lawrence一樣會黑面同埋衝過嚟打斷，唉，做男人做到你咁……
不過Momoko都唔好得幾多，初初入嚟呢間公司做嘅時候就中過伏，有次食lunch我約咗人但係未夠鐘，Momoko係咁話等埋我一齊落樓，我公司就3樓，由行出去Office到坐電梯再到樓下，前後可能係兩三分鐘嘅事，你咁堅持要等埋我做咩呢，我又唔係同你食。
嗰陣時唔知咩事，咁同佢一齊落樓啦，原來Lawrence已經喺樓下等緊，一開電梯門，Momoko冇理到所有人嘅目光，箭步衝出去攬住條仔，跟住用一把好嬌嗲嘅聲線同Lawrence講：「唔好意思呀，等咗好耐？我頭先同Dave一齊走。」
有同事同我講，Momoko係專登，亦都唔係第一次，呢條女成日想個男朋友覺得有其他男同事想追佢，唔係咁喪啩！呢啲究竟係乜嘢計謀？我最初唔信㗎，邊有人咁低B做埋呢啲嘢，不過自從嗰一次之後，Lawrence就成日行埋嚟我個位旁邊，長時間同Momoko打牙骹打情罵俏，間唔中仲feel到Lawrence睥住我。
喂你兩個真係極品嚟㗎，快啲結婚啦，互相唔好放過對方，亦唔好放對方出嚟呢個社會連累其他人喇好冇？
唔止一個女同事見過Lawrence同Momoko喺女廁嗰邊嘅後樓梯坐喺度傾計，有時仲會搭膊頭攬住，其實後樓梯又焗又暗，你真係當正嗰度係大草地睇星星咩！仲要係office hour嚟㗎，不如放工先去卿卿我我啦好冇？而家啲酒店好平㗎咋！
最癲係前一排公司開大會，留意返，係大會，十幾人喺會議室，仲有視像裡面其他地區嘅同事，開開下會Senior問大家有咩意見，初時都好正常，真係有同事發表咗幾句，不過Lawrence突然舉手打斷咗個meeting。
Lawrence：「唔好意思，我想講幾句。」
Senior以為佢畀意見，所以交畀Lawrence發言，我當時都係咁諗，點知條友仔講啲咁嘅嘢。
Lawrence：「我想借呢個機會同Momoko講聲對唔住，噚日係我唔啱，我真係好有誠意喺咁多人面前同你道歉，原諒我啦！」
唔止Senior同我，其他同事都呆咗，開緊會呀喂，你兩個耍花槍？全場得一個人有反應，就係Momoko，條女仲喺度笑笑口，好似默認已經原諒Lawrence咁。
礙於視像裡面有其他地區嘅同事喺度，雖然大家都驚訝Lawrence做乜春，但Senior亦好快搵咗第二個同事發表意見當打圓場，開完會捉Lawrence入房鬧咗一餐，後來Senior亦同我哋講：「Lawrence同Momoko呢pair真係好經典，好聽係痴纏，難聽係CLS！」
呢個Senior不嬲係仁慈底，真係鬧兩句就算，佢話呢pair情侶太癲，如果炒咗是但一個，驚另一個會向公司報復喎！
最近Lawrence的確收斂咗少少，而家又輪到Momoko成日行過去Lawrence嗰邊，佢兩個唔係撈㗎，當正office係自己屋企咁，公司有呢啲人真係好難頂。