唔知好嬲定好笑，上星期有個同事無啦啦著住成套西裝返工，須知道佢平時只係牛記笠記，有時仲會著露趾涼鞋（同事係男），所以突然間執到咁正，我第一個諗法係咪轉頭要出去見工，又或者嗰晚要去咩結婚飲宴。
「唔係呀，我阿媽一陣上嚟公司，幾分鐘㗎啫，我保證幾分鐘就叫佢走，大家可唔可以幫幫手呀？大恩大德，沒齒難忘，一陣食lunch好唔好？」個同事就嚟急到瀨屎，問題係我隻隻中文字都聽得明，夾埋一齊反而諗極唔明。
我哋公司得十幾人，唔大，不過我同另一位女同事嘅反應都係：「你阿媽做咩上嚟公司？我哋又幫咩忙？」
「係咁嘅，我同阿媽講，我係呢度嘅經理，佢就快返英國，走之前想上嚟公司行一轉，睇下我做成點。」
我：「都仲係未講到重點，即係點幫？」
「嗌我經理，當我經理，再幫多一個忙，到時打完招呼之後，我會帶佢入經理房，你過兩三分鐘就敲門話個客上緊嚟，問我係咪一齊開會？」
呢條友應該係high大咗，扮經理都算，仲要我哋扮下屬，再徵用埋經理間房同你做場戲，幾廿歲人啦，呢啲咪正宗媽寶囉！你估細個讀書返學咩，家長日呀？父母要嚟睇下學校環境同設施咁呀？
另一位同事：「嘩，你搞啲咁嘅嘢呀？」
「真係死人㗎，老細而家又好少返呢度，我都係借間房兩三分鐘啫，十萬火急呀，我阿媽喺樓下喇，點都好，陪我做場戲啦，一陣食lunch再同大家好好解釋，唔該晒唔該晒！」
幾位同事都未嚟得切考慮同答應，公司已經有人撳鐘仔，阿「經理」急急腳自己走去開，講真呢下都穿崩啦，邊有經理去做開門呢啲下欄嘢㗎！
同事阿媽係普通師奶一名，年紀同外型有啲似一位甘草演員馮素波，佢一行入office已經左顧右盼，咁我哋可以點吖，由知道要演呢場戲去到睇住伯母入嚟，前前後後都係幾分鐘嘅事，換言之即係得3個動作可以做，一係配合，一係踢爆，一係置身事外唔睇、唔知、唔見、唔理，既然思考唔到，呢位同事平時又冇乜嘢，唯有配合下啦！
我：「呢位梗係經理嘅媽媽，你好呀伯母。」
我旁邊個女同事都有交戲：「伯母你好。」
同事阿媽：「乖喇乖喇，你班員工好有禮貌喎！」
「係呀，佢哋平時做嘢都好勤力㗎！係呢，你又話約咗舅父佢哋飲茶嘅，我送你落樓啦！」
同事阿媽：「都未夠鐘，你好趕咩，帶我行個圈先啦！」
「其他同事做緊嘢呀，驚影響佢哋，不如入我房坐陣就走啦好冇？」
唔係個個同事都配合㗎，公司雖然得十幾人，但係事出突然，好明顯有一批坐得開啲嘅同事唔知發生緊咩事，個個露出奇怪表情，而我身邊幾位同事雖然聽到個過程同因由，不過就冇配合演出，佢哋當時選擇低頭做嘢唔參與，等到呀伯母入咗老細房先至走埋嚟竊竊私語。
大家都覺得呢個場面匪夷所思，好在老細好少返嚟，就算返，都一定唔會朝早返，希望老細間房冇任何相片相架啦，否則一定穿煲。
同事間係咁講呢單嘢，差啲忘記咗要入房「救人」，送佛送到西，我硬住頭皮入房做埋呢場戲。
我：「經理，有個客上緊嚟，你一唔一齊開會？」
點知伯母搶答：「開！做經理點可以唔開會㗎！」
「冇錯冇錯，咁我送阿媽你落樓先，一陣個客會入我房傾。」
伯母：「畀心機呀知唔知呀！唔使送喇，你準備開會啦！」
「唔怕，我送你去電梯口啦！」
好在真係幾分鐘就完結件事，總算無驚無險，不過點解要吹水話自己係經理，仲要伯母上嚟都唔通知聲呀，你自己著晒西裝，即係一早知道阿媽會上嚟啦，last minute先同我哋講，老馮同你做場戲咩，由頭到尾都係得我同另一位女同事配合，個氣氛咁奇怪都冇畀伯母發現，真係執返身彩。
聽返個同事講，佢阿媽講咗好多次要上嚟公司睇，噚晚仲實牙實齒話會嚟，但係佢仲係想盡最大努力勸止，又唔知點樣叫我哋幫忙，因為好難為情，今朝雖然著晒西裝返工有晒準備，不過仲係好難開口，結果阿媽真係到咗公司樓下先至硬住頭皮叫我哋扮嘢。
我：「咁點解要作到自己做經理呢？坦白啲咪仲好。」
「我三十幾歲人仲係一事無成，喺阿爸阿媽嘅角度係好失敗，佢哋成日話邊個邊個嘅仔做到好高級，邊個邊個嘅女搵好多錢，如果我話自己係一個萬幾蚊嘅文員仔，佢哋接受唔到。」
我：「自己仔女嚟㗎喎，點可以用職位同人工去衡量個仔成功定失敗㗎！」
「咁可以點啫？開始時講完第一個大話，已經返唔到轉頭啦，其實上一份工我已經同佢哋講自己係經理㗎喇。」
我：「人工呢？做經理得萬幾蚊人工，你又點交代呀？」
「佢又唔會check我account出幾多糧，不過我話自己呢份工有4萬幾一個月囉！」
我：「4萬幾？我同你加埋都冇啦！咁你畀家用都會穿崩㗎喎！」
「我阿媽唔使我畀家用，所以你話佢畀咗啲心理壓力我係一回事，但佢錫我都係千真萬確，我出嚟做嘢咁耐，阿爸阿媽真係一蚊家用都唔使我畀，就算夾硬畀，最後都會塞返畀我。」
聽完之後個感覺好奇怪，如果我家用畀少一個崩，老母一定會嘈到拆天，不過佢從來唔會將我同其他人嘅仔女比較，經理又好，文員仔又好，就算我出去做侍應樓面都冇所謂，準時畀家用就得，反而我呢位同事嘅阿媽就剛好相反。
不斷講大話其實好攰，我相信呢位同事開咗個頭，就冇得返轉頭，好在佢阿媽即將離開香港，或者之後再努力啲啦，有一日真係升做經理咪唔使講大話囉，但係30幾歲人搵萬幾蚊人工真係好失禮咩，好多嘢都係睇自己心態㗎啫，夠用夠食，唔使周圍問人借，咁都唔錯㗎喇。