早排見咗一份工，一次過做晒1st in同2nd in，先見HR，再見Line Manager，過程輕鬆順利，最後HR入返房同我講：「呢個position其實都急住要人，所以最遲最遲今個禮拜尾有結果，但係我唔知個Manager最後會揀邊個，無論點，我都會打返電話同你講聲。」
我冇計過自己人生見過幾多份工，30幾歲人，幾廿份點都有，印象中冇一份係唔請都主動通知我，反而我打返去間公司問result就試過，見今次呢個HR好nice，趁佢送我出門口時邊行邊問咗句：「你真係會逐個candidate打去通知請定係唔請㗎？咁咪好唔得閒囉？」
HR：「都唔會呀，雖然出完招聘廣告會收到好多resume，但係約上嚟interview都係幾個啫，公司又唔係每日都請人，所以打幾個電話通知candidate，當你每個講幾分鐘，嘥得幾多時間吖，有啲candidate知道最終冇請佢，得個知字都收線啦，前後唔使一分鐘。」
我：「你都幾盡責，出面唔請通常唔會同返candidate講，呢個都明，不過最唔明係有啲工係由headhunt搵我，安排我去見工，點知最後唔請，headhunt作為中間人角色連交代都冇句，所以感覺唔係幾好，點形容呢……好似用完你即棄咁囉！」
係咪得我有呢啲經歷？唔知其他人有冇試過？
HR：「我覺得send完resume再去見工，雖然係一個正常嘅程序，不過對方過嚟我哋公司，始終都係付出咗金錢同時間，例如車錢，甚至係特登請假，咁最後結果請定係唔請，你同人講一聲都好合理啫，雖然而家係我in你，但我都見過工，齋等唔知結果先最難捱，早啲講聲，等個candidate有自己打算唔好咩？」
好！梗係好啦！然後第二日我真係收到呢位HR嘅電話，可惜佢唔係通知我獲取錄，我成為咗被淘汰嘅其中一位candidate，失落一定有㗎喇！不過就完全冇hard feeling，HR略略解釋咗Line Manager揀另一位candidate嘅原因，仲同我講咗啲勉勵嘅說話。
HR：「希望你之後見其他工順利，如果你之後睇到我哋公司請人，又覺得個position適合，隨時再send resume過嚟啦！」
我仲趁機請教咗呢位HR幾個問題，包括覺得我當日interview有咩要改善？同埋對比起last salary，我填呢個expected salary合唔合理？
估唔到HR又真係肯畀意見，特別係expected salary呢部分，佢都講咗啲好有用嘅建議。整個對談用咗7至8分鐘左右，令我對呢間公司加晒印象分，或者你會話我只係candidate，邊個care我啲印象分呀？咁我見工以外嘅身份都係一個普通人，一個消費者，一個顧客，我真係特別留意咗呢間公司嘅產品，仲有幫襯添！
相隔個半月後，我再次收到呢位HR電話，佢問我仲喺之前間公司做，定係已經搵到另一份新工？
我：「有新工喇，返咗兩星期，做咩呀？之前請嗰個人走咗？」正常你唔會搵返我啦，唔通我真係特別靚仔咩！所以一估就估佢要搵replacement。
HR：「唔係，而家個department開多一個位，相同嘅position要多一個，咁我咪試下問咗你先囉！如果你未搵到工又或者仲想轉工，我就唔出招聘ad，諗住直接同你傾offer，你份新工點吖？」
我諗咗一陣，不過都係忍痛拒絕。
因為我份新工其實唔差，當時返咗兩個星期嘅感覺都好好，班同事又好肯教，雖然呢間公司個HR勁nice，個department開多一個位都即刻打畀我（雖然係佢Line Manager嘅意思），又唔使再從頭in多次，但既然新工做得幾好，待遇又ok，咁就無謂轉嚟轉去，同時祝佢哋快啲搵到人。
最後冇做呢間公司，成個經歷好似講完等於冇講咁，但一般而言，間公司第一次唔請你，隔成個月再問你有冇興趣，正常會覺得嬲同躁，不過呢位HR善後工作做得太好喇，招聘無論結果如何都有交代，所以接到佢電話嗰陣，我完全唔覺得反感，其實請人又好，見工又好，不外乎係互相尊重，即使大家無緣做同事，過程同結局都可以好愉快。